ಬಿಸಿಲ ನಾಡು ಕೊಪ್ಪಳ ಜಿಲ್ಲೆಯಲ್ಲೊಂದು ರಮಣೀಯ ತಾಣ

November 12, 2020

ಕೊಪ್ಪಳ ಜಿಲ್ಲೆ ಕುಷ್ಟಗಿ ತಾಲೂಕಿನ ಕಬ್ಬರಗಿ ಪ್ರದೇಶದಲ್ಲಿರುವ ಕಪಿಲತೀರ್ಥ ಜಲಪಾತ ಜಿಲ್ಲೆಯ ಏಕೈಕ ಫಾಲ್ಸ್.

ಮಳೆಯಾಶ್ರಿತ ಜಲಪಾತ ಇದಾಗಿದ್ದು, ದೊಡ್ಡಮಳೆಯಾಗಿ ಬೆಟ್ಟದಲ್ಲಿ ಸೆಲೆ ಉಂಟಾಗಿ ಚಿಕ್ಕ ತೊರೆ ಮೂಲಕ ನೀರು ಸಾಗಿ ಬಂದು ಸುಮಾರು 20ಅಡಿ ಮೇಲಿನಿಂದ ಕೊಳಕ್ಕೆ ಧುಮ್ಮಿಕ್ಕುತ್ತದೆ. ಜಲಪಾತಕ್ಕೆ ಹೊಂದಿಕೊಂಡೇ ಶಿವಲಿಂಗವಿದೆ. ಇದನ್ನು ಹಿಂದೆ ಕಪಿಲಮುನಿ ಎಂಬ ತಪಸ್ವಿ ಸ್ಥಾಪಿಸಿದ್ದರು. ಅವರು ಈ ಸ್ಥಳದಲ್ಲಿ ತಪಸ್ಸು ಮಾಡಿದ್ದರು ಎಂಬ ಪ್ರತೀತಿಯಿದೆ. ಕಪಿಲಮುನಿ ಹೆಸರೇ ಜಲಪಾತಕ್ಕೆ ಬಂದಿದ್ದು ’ಕಪಿಲತೀರ್ಥ’ ಎಂದು ಕರೆಯಲಾಗುತ್ತದೆ. ಪ್ರವಾಸಿ ತಾಣವಾಗಿ ಈ ಸ್ಥಳ ಅಭಿವೃದ್ಧಿಯಾಗಿಲ್ಲ. ಹೊರಗಿನಿಂದ ಬರುವವರಿಗೆ ವಸತಿ, ಉಪಹಾರ ಸೇರಿ ಯಾವುದೇ ವ್ಯವಸ್ಥೆ ಇಲ್ಲ. ಇಲ್ಲಿಗೆ ಬರುವವರು ತಾವೇ ಆಹಾರದ ವ್ಯವಸ್ಥೆ ಮಾಡಿಕೊಳ್ಳಬೇಕು.

ಜಿಲ್ಲಾ ಕೇಂದ್ರ ಕೊಪ್ಪಳದಿಂದ 76 ಕಿ. ಮೀ. ಅಂತರದಲ್ಲಿದೆ. ಕೊಪ್ಪಳದಿಂದ ಕುಷ್ಟಗಿ, ಹನುಮಸಾಗರ ಮೂಲಕ ಜಲಪಾತ ಇರುವ ಕಬ್ಬರಗಿ ಗ್ರಾಮ ತಲುಪಬಹುದು. ಹನುಮಸಾಗರವರೆಗೆ ಸಾರಿಗೆ ಬಸ್ಸಿನ ವ್ಯವಸ್ಥೆ ಇದೆ. ಕಬ್ಬರಗಿಗೆ ಖಾಸಗಿ ವಾಹನಗಳಲ್ಲಿ ತೆರಳಬೇಕು. ಗ್ರಾಮದಿಂದ ಪಶ್ಚಿಮಭಾಗದಲ್ಲಿನ ಬೆಟ್ಟದ ಮಧ್ಯೆ ಜಲಪಾತ ಇದೆ. ಕಬ್ಬರಗಿಯಿಂದ 3 ಕಿ.ಮೀ. ನಡೆದು ಹೋಗಬೇಕು.