ಮಳೆಗಾಲದಲ್ಲಿ ತ್ವಚೆಯ ಆರೋಗ್ಯ ಕಾಯ್ದುಕೊಳ್ಳಲು ಕೆಲವು ಸಲಹೆಗಳು

June 28, 2021

ಬೇಸಿಗೆಯ ಬಿಸಿಯಿಂದ ಮಳೆಗಾಲಕ್ಕೆ ಕಾಲಿಡುತ್ತಿದ್ದಂತೆ ತಂಪಾದ ಅನುಭವ ದೊರೆಯುವುದು. ಜೊತೆಗೆ ಬೇಸಿಗೆಯ ಶಾಖ ಮತ್ತು ಉರಿಯಿಂದ ಒಮ್ಮೆ ತಾಜಾತನವನ್ನು ಪಡೆದುಕೊಳ್ಳಬಹುದು ಎನ್ನುವ ಭಾವನೆ ಇರುತ್ತದೆ. ಒಂದು ಋತುವಿನಿಂದ ಇನ್ನೊಂದು ಋತುವಿಗೆ ಕಾಲಿಡುತ್ತಿದ್ದಂತೆ ಆರೋಗ್ಯದಲ್ಲಿ ಕೆಲವು ಬದಲಾವಣೆ ಕಾಣಿಸಿಕೊಳ್ಳಬಹುದು. ವಿಶೇಷವಾಗಿ ಚರ್ಮದ ಆರೋಗ್ಯದಲ್ಲಿ ವ್ಯತ್ಯಾಸ ಕಾಣಿಸಿಕೊಳ್ಳುತ್ತವೆ.

ಮಳೆಗಾಲದಲ್ಲಿ ಚರ್ಮದ ಸಮಸ್ಯೆ : ಮಳೆಗಾಲಕ್ಕೆ ಕಾಲಿಡುತ್ತಿದ್ದಂತೆ ವಾತಾವರಣದಲ್ಲಿ ಸಾಕಷ್ಟು ಬದಲಾವಣೆಗಳು ಉಂಟಾಗುತ್ತವೆ. ಅವು ವ್ಯಕ್ತಿಯ ಆರೋಗ್ಯ ಹಾಗೂ ಆಹಾರ ಕ್ರಮಗಳಲ್ಲಿಯೂ ಬದಲಾವಣೆಯನ್ನು ಪ್ರಚೋದಿಸುತ್ತವೆ. ಚರ್ಮದ ವಿಚಾರಕ್ಕೆ ಬಂದರೆ ಮಳೆಗಾಲದಲ್ಲಿ ಚರ್ಮವು ಜಿಡ್ಡು, ಮೊಡವೆ, ತೇವಾಂಶದಿಂದ ಉಂಟಾಗುವ ಅಲರ್ಜಿ, ಚರ್ಮದಲ್ಲಿ ತುರಿಕೆ ಮತ್ತು ಶಿಲೀಂಧ್ರಗಳ ಸೋಂಕು ಸೇರಿದಂತೆ ಇನ್ನಿತರ ಸಮಸ್ಯೆಗಳು ಕಾಡಬಹುದು. ಅಂತಹ ಸಮಸ್ಯೆಗಳನ್ನು ನಿಯಂತ್ರಣದಲ್ಲಿ ಇಡಲು ಕೆಲವು ಆರೋಗ್ಯ ಕ್ರಮಗಳನ್ನು ಅನುಸರಿಸಬೇಕಾಗುವುದು.

ಹೈಡ್ರೇಟ್ : ಮಳೆಗಾಲದಲ್ಲಿ ಹೆಚ್ಚಿನ ಆದ್ರ್ರತೆಯಿಂದ ಚರ್ಮವು ಹೆಚ್ಚು ತೇವಾಂಶಕ್ಕೆ ಒಳಗಾಗುವುದು. ಕೆಲವರು ಅತಿಯಾಗಿ ಬೆವರುವ ಸಾಧ್ಯತೆಗಳು ಇರುತ್ತವೆ. ಚರ್ಮವು ಪದೇ ಪದೇ ಕೊಳೆ ಹಾಗೂ ಜಿಡ್ಡಿನಿಂದ ಕೂಡಿರುವ ಸಾಧ್ಯತೆಗಳು ಇರುತ್ತವೆ. ವಾತಾವರಣವು ತಂಪಾಗಿರುವುದರಿಂದ ಬಯಾರಿಕೆಯ ಸಂವೇದನೆ ಕಡಿಮೆ ಆಗುವುದು. ಆಗ ಹೆಚ್ಚು ನೀರನ್ನು ಕುಡಿಯದೆ ಇರುತ್ತಾರೆ. ಅದು ಚರ್ಮದ ಆರೋಗ್ಯ ಹಾಳಾಗುವುದು. ಹಾಗಾಗಿ ಮಳೆಗಾಲ ಆದರೂ ದಿನಕ್ಕೆ 3-5 ಲೀಟರ್ ನೀರು ಕುಡಿದರೆ ಚರ್ಮಕ್ಕೆ ಸಾಕಷ್ಟು ನೀರು ದೊರೆಯುವುದು. ಚರ್ಮದ ಆರೋಗ್ಯವು ಉತ್ತಮವಾಗಿರುತ್ತದೆ.

ಎಣ್ಣೆಯುಕ್ತ ಆಹಾರ : ಮಳೆಗಾಲದ ತಂಪು ವಾತಾವರಣವು ನಮಗೆ ಬಿಸಿಯಾದ ಕುರುಕಲು ತಿಂಡಿಯನ್ನು ತಿನ್ನಲು ಪ್ರಚೋದನೆ ದೊರೆಯುವುದು. ಆದರೆ ಅಂತಹ ಆಹಾರವನ್ನು ಸೇವಿಸುವುದು ತಪ್ಪಿಸಬೇಕು. ಸಂಸ್ಕರಿಸಿದ ತೈಲ ಹಾಗೂ ಅಧಿಕ ಎಣ್ಣೆಯಿಂದ ಕೂಡಿರುವ ಆಹಾರವು ಚರ್ಮದ ಆರೋಗ್ಯವನ್ನು ಕೆಡಿಸುತ್ತದೆ. ಹಾಗಾಗಿ ಆದಷ್ಟು ಅಂತಹ ಆಹಾರವನ್ನು ಸೇವಿಸಬಾರದು.

ಹಣ್ಣುಗಳನ್ನು ಸೇವಿಸಿ : ಮಳೆಗಾಲದಲ್ಲಿ ವಿಶೇಷವಾಗಿ ಕೆಲವು ಹಣ್ಣುಗಳು ದೊರೆಯುತ್ತವೆ. ಅವು ಚರ್ಮ ಮತ್ತು ದೇಹದ ಆರೋಗ್ಯವನ್ನು ಕಾಪಾಡುತ್ತವೆ. ಮಳೆಗಾಲದಲ್ಲಿ ವಿಶೇಷವಾಗಿ ಚೆರ್ರಿ, ಪ್ಲಮ್, ಪೀಚ್, ಲಿಚಿ, ದಾಳಿಂಬೆ ಮತ್ತು ನೇರಳೆ ಹಣ್ಣುಗಳು ದೊರೆಯುತ್ತವೆ. ಅವುಗಳಲ್ಲಿ ಫೈಟೊನ್ಯೂಟ್ರಿಯೆಂಟ್‍ಗಳು, ಜೀವಸತ್ವಗಳು, ಖನಿಜಗಳು, ಆಂಟಿಆಕ್ಸಿಡೆಂಟ್‍ಗಳು ಕಾರ್ಯನಿರ್ವಹಿಸುತ್ತವೆ. ಅವು ಚರ್ಮವನ್ನು ಆಂತರಿಕವಾಗಿ ಪೋಷಿಸುತ್ತವೆ.

ನಾರು ಭರಿತ ಆಹಾರ ಸೇವಿಸಿ : ಧಾನ್ಯಗಳು, ಹಸಿರು ಸೊಪ್ಪು, ತರಕಾರಿ ಮತ್ತು ಹಣ್ಣುಗಳನ್ನು ಹೆಚ್ಚು ಬಳಸಬೇಕು. ಅವು ಕರುಳಿನ ಕೆಲಸವನ್ನು ಚುರುಕುಗೊಳಿಸುತ್ತವೆ. ಕರುಳಿನ ಸೂಕ್ಷ್ಮಾಣುಗಳಿಗೆ ಆಹಾರವಾಗಿ ಕಾರ್ಯ ನಿರ್ವಹಿಸುತ್ತವೆ. ಕರುಳಿನ ಆರೋಗ್ಯವನ್ನು ಉತ್ತಮವಾಗಿಟ್ಟುಕೊಂಡರೆ ಚರ್ಮಕ್ಕೆ ಆಳವಾದ ಪೋಷಣೆ ದೊರೆಯುವುದು.

​ಮನೆಯ ಆರೈಕೆಗಳು : ಮಳೆಗಾಲದಲ್ಲಿ ಚರ್ಮದ ಆರೋಗ್ಯವನ್ನು ಉತ್ತಮವಾಗಿಟ್ಟುಕೊಳ್ಳಲು ಕೆಲವು ಕ್ರಮವನ್ನು ಕೈಗೊಳ್ಳಬಹುದು. ಸಾರ ಭೂತ ತೈಲದ ಲೇಪನ, ಬೇವಿನೆಲೆಯ ನೀರಿನ ಸ್ನಾನ, ಅಲೋವೆರಾ, ಅರಿಶಿನ, ಗುಲಾಬಿ ನೀರು, ಮೊಸರು, ಕಡ್ಲೇ ಹಿಟ್ಟು ಹೀಗೆ ವಿವಿಧ ನೈಸರ್ಗಿಕ ಉತ್ಪನ್ನಗಳನ್ನು ಬಳಸಿ ಚರ್ಮದ ಲೇಪನವನ್ನು ಹಚ್ಚಿಕೊಳ್ಳಬೇಕು. ಅವುಗಳನ್ನು ಬಳಸುವ ಮೊದಲು ನಿಮ್ಮ ಚರ್ಮ ಯಾವ ಬಗೆಯದ್ದು? ಅದಕ್ಕೆ ಯಾವ ಉತ್ಪನ್ನ ಸೂಕ್ತವಾದುದ್ದು? ಎನ್ನುವುದನ್ನು ತಿಳಿದು ಕೊಳ್ಳುವುದು ಉತ್ತಮ.

error: Content is protected !!