ಉತ್ತಮವಾದ ಸೌಂದರ್ಯ ಮತ್ತು ಬಣ್ಣವನ್ನು ಪಡೆಯಲು ಪಪ್ಪಾಯಿ ಫೇಸ್ ಪ್ಯಾಕ್

10/11/2021

ಪಪ್ಪಾಯಿಯು ಎಲ್ಲಾ ಋತುಮಾನದಲ್ಲಿಯು ದೊರೆಯುವ ಹಣ್ಣಾಗಿದ್ದು, ದೇಹಕ್ಕೆ ಅಗತ್ಯವಿರುವ ಎಲ್ಲಾ ಪೋಷಕಾಂಶಗಳನ್ನು ಒದಗಿಸುತ್ತದೆ. ಇದರಲ್ಲಿ ಮುಖ್ಯವಾಗಿ ವಿಟಮಿನ್ ಎ ಯಥೇಚ್ಛವಾಗಿದೆ. ಪಪ್ಪಾಯಿ ಹಣ್ಣನ್ನು ನಿಯಮಿತವಾಗಿ ಸೇವಿಸುವುದರಿಂದ ದೃಷ್ಟಿ ದೋಷವು ನಿವಾರಣೆಯಾಗುವುದಲ್ಲದೇ, ಚರ್ಮ ಹಾಗು ಕೂದಲ ಸೌಂದರ್ಯವನ್ನು ಕಾಪಾಡುತ್ತದೆ.

ಮುಖ್ಯವಾಗಿ ಪಪ್ಪಾಯಿಯಲ್ಲಿರುವ ಕಿಣ್ವಗಳು ಚರ್ಮವನ್ನು ತೇವಗೊಳಿಸುತ್ತದೆ. ಈ ಸಿಹಿಯಾದ ಹಣ್ಣನ್ನು ಸೇವಿಸುವುದರಿಂದ ಚರ್ಮವನ್ನು ಒಳಗಿನಿಂದ ಹೈಡ್ರೇಟ್ ಮಾಡುತ್ತದೆ. ಸತ್ತಚರ್ಮ ಕೋಶವನ್ನು ನಿಧಾನವಾಗಿ ಗುಣಪಡಿಸುತ್ತದೆ. ಕಣ್ಣಿನ ಕೆಳಗೆ ಇರುವ ಕಪ್ಪು ವಲಯವನ್ನು ಮತ್ತು ಮೊಡವೆಗಳನ್ನು ದೂರವಾಗಿಸುತ್ತದೆ. ಉರಿಯೂತವನ್ನು ಶಮನ ಮಾಡುವುದಲ್ಲದೇ, ಅನೇಕ ಚರ್ಮ ತೊಂದರೆಗಳನ್ನು ಬಾರದಂತೆ ರಕ್ಷಿಸುತ್ತದೆ.

ಪಪ್ಪಾಯಿಯಲ್ಲಿರುವ ಹೆಚ್ಚಿನ ವಿಟಮಿನ್ ಎ, ಸಿ ಮತ್ತು ಆಂಟಿಆಕ್ಸಿಡೆಂಟ್ ಲೈಕೋಪೀನ್ ನಿಮ್ಮ ಚರ್ಮವನ್ನು ಕಾಂತಿಯುತವಾಗಿಸಿ, ಯೌವನದಿಂದ ಕಾಣುವಂತೆ ಮಾಡುತ್ತದೆ.

ಎಣ್ಣೆ ಚರ್ಮದವರಿಗೆ ಪಪ್ಪಾಯಿ ಫೇಸ್ ಪ್ಯಾಕ್ ಅತ್ಯುತ್ತಮ ಸೌಂದರ್ಯದ ಮೂಲವಾಗಿದೆ. ಏಕೆಂದರೆ, ಎಣ್ಣೆಯುಕ್ತ ತ್ವಚೆ ಹೊಂದಿರುವವರು ಕೇವಲ ತ್ವಚೆಯಲ್ಲಿನ ಬೇಡವಾದ ಎಣ್ಣೆಯನ್ನು ಮಾತ್ರ ನಿಯಂತ್ರಣವನ್ನು ಗುರಿಯಾಗಿಸಿಕೊಂಡರೆ ಸಾಲದು, ಏಕೆಂದರೆ ಅದು ನಿಮ್ಮ ತ್ವಚೆಯನ್ನು ಅತಿಯಾಗಿ ಒಣಗಿಸಬಹುದು. ಇದನ್ನು ಸರಿದೂಗಿಸಲು ಎಣ್ಣೆಯುಕ್ತ ಚರ್ಮದವರು ತಪ್ಪದೇ ಪಪ್ಪಾಯಿ ಫೇಸ್ ಪ್ಯಾಕ್ ಧರಿಸಿ. ಇದು ನಿಮ್ಮ ಚರ್ಮದಲ್ಲಿನ ಎಣ್ಣೆಯನ್ನು ಕಡಿಮೆ ಮಾಡಿ, ಹೊಳಪಿನಿಂದ ಕೂಡಿರುವಂತೆ ಮಾಡುತ್ತದೆ. ಉತ್ತಮವಾದ ಬಣ್ಣವನ್ನು ಕೂಡ ನೀಡುತ್ತದೆ.

ಪ್ಯಾಕ್ ತಯಾರಿಸುವ ವಿಧಾನ ;

ಹಿಸುಕಿದ ಪಪ್ಪಾಯಿಗೆ, ಕೆಲವು ಹನಿ ನಿಂಬೆ ರಸ ಅಥವಾ ಕಿತ್ತಳೆ ರಸದೊಂದಿಗೆ ಮಿಶ್ರಣ ಮಾಡಿ. ನಿಮ್ಮ ತ್ವಚೆಯ ಮೇಲೆ ಹಚ್ಚಿ, 15 ನಿಮಿಷಗಳ ಕಾಲ ಬಿಡಿ. ನಂತರ ತಣ್ಣೀರಿನಿಂದ ಸ್ಚಚ್ಛವಾಗಿ ತೊಳೆಯಿರಿ. ಹೀಗೆ ವಾರಕ್ಕೊಮ್ಮೆ ಪುನರಾರ್ವತಿಸಿ.

ಪಪ್ಪಾಯಿ ಹಣ್ಣು ಆರ್ಧ್ರಕ ಅಂಶವನ್ನು ಹೊಂದಿದೆ. ಶುಷ್ಕ ಚರ್ಮದವರಿಗೆ ಪಪ್ಪಾಯಿ ಫೇಸ್ ಪ್ಯಾಕ್ ಅನೇಕ ಚರ್ಮ ಸಮಸ್ಯೆಗಳನ್ನು ಗುಣಪಡಿಸುತ್ತದೆ. ಮುಖ್ಯವಾಗಿ ಜೇನುತುಪ್ಪವನ್ನು ಸೇರಿಸಿದ ಪಪ್ಪಾಯಿ ಫೇಸ್ ಪ್ಯಾಕ್ ಧರಿಸುವುದರಿಂದ ಒಡೆದ ಹಾಗು ಕೆರಳಿದ ಚರ್ಮಕ್ಕೆ ಚಿಕಿತ್ಸೆ ನೀಡುತ್ತದೆ. ಇದು ರಂಧ್ರಗಳನ್ನು ಮುಚ್ಚುವುದಲ್ಲದೇ, ಮೃದುವಾದ ಚರ್ಮವಾಗಿಸುತ್ತದೆ. ಜೇನು ತುಪ್ಪದ ಬದಲಾಗಿ ಮೊಸರನ್ನು ಕೂಡ ಬಳಸಬಹುದು.

ಪ್ಯಾಕ್ ತಯಾರಿಸುವ ವಿಧಾನ : 

ಕೆಲವು ಪಪ್ಪಾಯಿ ಚೂರುಗಳನ್ನು ಚೆನ್ನಾಗಿ ಕಿವುಚಿ, ಅದಕ್ಕೆ ಮೊಸರು ಅಥವಾ ಜೇನುತುಪ್ಪವನ್ನು ಸೇರಿಸಿ ಮಿಶ್ರಣವನ್ನು ತಯಾರಿಸಿಕೊಳ್ಳಿ, ಈ ಮಿಶ್ರಣವನ್ನು ನಿಮ್ಮ ತ್ವಚೆಯ ಮೇಲೆ ಹಚ್ಚಿ, ನಂತರ ನೀರಿನಿಂದ ತ್ವಚೆಯನ್ನು ತೊಳೆಯಿರಿ.

ನಿಮ್ಮ ಚರ್ಮವು ಬಿರುಕುಗಳಿಂದ ಹಾಗು ಮೊಡವೆಗಳಿಂದ ಕೂಡಿದ್ದರೆ, ಅಂತವರು ತಪ್ಪದೇ ಪಪ್ಪಾಯಿ ಫೇಸ್ ಪ್ಯಾಕ್ ಬಳಸಿ. ಈ ಫೇಸ್ ಪ್ಯಾಕ್ ನಲ್ಲಿ ಮೊಟ್ಟೆಯ ಬಿಳಿಭಾಗವನ್ನು ಬಳಸಿ. ಇದು ರಂಧ್ರಗಳನ್ನು ಬಿಗಿಗೊಳಿಸುವುದಲ್ಲದೇ, ಮೊಡವೆಗಳನ್ನು ಹೋಗಲಾಡಿಸುತ್ತದೆ. ಮುಖ್ಯವಾಗಿ ಇದರಲ್ಲಿರುವ ವಿಟಮಿನ್ ಗಳು ಹಾಗು ಅಮೈನೋ ಆಮ್ಲಗಳು ಮೊಡವೆ ಪೀಡಿತ ಚರ್ಮಕ್ಕೆ ಅತ್ಯುತ್ತಮವಾಗಿದೆ.

ಹಿಸುಕಿದ ಪಪ್ಪಾಯಿಗೆ ಮೊಟ್ಟೆಯ ಬಿಳಿಭಾಗವನ್ನು ಸೇರಿಸಿ, ಮಿಶ್ರಣವನ್ನು ತಯಾರಿಸಿಕೊಳ್ಳಿ. ಈ ಮಿಶ್ರಣವನ್ನು ತ್ವಚೆಯ ಮೇಲೆ ಹಚ್ಚಿ 15 ನಿಮಿಷಗಳ ಕಾಲ ಬಿಡಿ. ನಂತರ ಸ್ವಚ್ಛವಾದ ನೀರಿನಿಂದ ತೊಳೆಯಿರಿ. ವಾರಕ್ಕೊಮ್ಮೆ ಪುನರಾವರ್ತಿಸಿ.

ಸಾಮಾನ್ಯ ಅಥವಾ ನಾರ್ಮಲ್ ಸ್ಕಿನ್ ಹೊಂದಿರುವವರಿಗೆ ಪಪ್ಪಾಯಿ ಫೇಸ್ ಪ್ಯಾಕ್ ಉತ್ತಮವಾದ ಬಣ್ಣ ನೀಡುತ್ತದೆ. ಕಳೆಗುಂದಿದ ಚರ್ಮಕ್ಕೆ ಇದೊಂದು ಅದ್ಭುತವಾದ ಚಿಕಿತ್ಸೆಯನ್ನು ನೀಡುತ್ತದೆ. ಸೂಕ್ಷ್ಮವಾದ ತ್ವಚೆಗೆ ಯಾವುದೇ ರೀತಿಯ ಕಿರಿಕಿರಿ ಉಂಟು ಮಾಡದೇ, ಸುಂದರವಾದ ತ್ವಚೆಯನ್ನು ನೀಡಲು ಪಪ್ಪಾಯಿ ಸಹಕಾರಿಯಾಗಿದೆ. ಮುಖ್ಯವಾಗಿ ಈ ಫೇಸ್ ಪ್ಯಾಕ್ ನಿಮ್ಮ ತ್ವಚೆಗೆ ತಾಜಾ ಅನುಭೂತಿಯನ್ನು ಉಂಟು ಮಾಡುತ್ತದೆ.

ಪ್ಯಾಕ್ ತಯಾರಿಸುವ ವಿಧಾನ

ಕಿವುಚಿದ ಪಪ್ಪಾಯಿಗೆ ಸೌತೆಕಾಯಿಯ ರಸವನ್ನು ಮಿಶ್ರಣ ಮಾಡಿ, ನಿಮ್ಮ ತ್ವಚೆ ಹಾಗು ಕುತ್ತಿಗೆಗೆ ಹಚ್ಚಿ. ೧೫ ನಿಮಿಷಗಳ ನಂತರ ಉಗುರು ಬೆಚ್ಚಗಿನ ನೀರಿನಲ್ಲಿ ತೊಳೆಯಿರಿ. ಹೀಗೆ ಮಾಡುವುದರಿಂದ ನಿಮ್ಮ ಚರ್ಮವು ರೇಷ್ಮೆಯಂತೆ ಕಂಗೊಳಿಸುವುದು.