ಕಲ್ಯಾಣಿ: ರಣಜಿ ಟ್ರೋಫಿ ಕ್ರಿಕೆಟ್ ಇತಿಹಾಸದಲ್ಲಿ ಕಣಿವೆ ರಾಜ್ಯ ಜಮ್ಮು ಮತ್ತು ಕಾಶ್ಮೀರ ಹೊಸ ಮೈಲಿಗಲ್ಲು ಸ್ಥಾಪಿಸಿದೆ. ಮೊಹಮ್ಮದ್ ಶಮಿ ಅವರಂತಹ ಘಟಾನುಘಟಿ ಬೌಲರ್ ಮತ್ತು ಅಭಿಮನ್ಯು ಈಶ್ವರನ್ ಅವರಂತಹ ಬ್ಯಾಟರ್ಗಳಿದ್ದ ಬಲಿಷ್ಠ ಬಂಗಾಳ ತಂಡವನ್ನು 6 ವಿಕೆಟ್ಗಳಿಂದ ಪರಾಭವಗೊಳಿಸುವ ಮೂಲಕ ಜಮ್ಮು ಮತ್ತು ಕಾಶ್ಮೀರ ತಂಡ ಮೊದಲ ಬಾರಿಗೆ ರಣಜಿ ಫೈನಲ್ ತಲುಪಿ ಇತಿಹಾಸ ನಿರ್ಮಿಸಿದೆ.
ಪಂದ್ಯದ ಗತಿಯನ್ನೇ ಬದಲಿಸಿದ ಅಖಿಬ್ ನಬಿ
ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ್ದ ಬಂಗಾಳ ತಂಡ, ಸುದೀಪ್ ಕುಮಾರ್ ಘರಮಿ (146) ಅವರ ಅಮೋಘ ಶತಕದ ನೆರವಿನಿಂದ 328 ರನ್ ಗಳಿಸಿತು. ಇದಕ್ಕೆ ಉತ್ತರವಾಗಿ ಜಮ್ಮು ಕಾಶ್ಮೀರ ಮೊದಲ ಇನ್ನಿಂಗ್ಸ್ನಲ್ಲಿ 302 ರನ್ ಗಳಿಸಿ 26 ರನ್ಗಳ ಹಿನ್ನಡೆ ಅನುಭವಿಸಿತು. ಬಂಗಾಳದ ಪರ ವೇಗಿ ಮೊಹಮ್ಮದ್ ಶಮಿ ಭರ್ಜರಿ ಬೌಲಿಂಗ್ ಪ್ರದರ್ಶಿಸಿ 90 ರನ್ ನೀಡಿ 8 ವಿಕೆಟ್ ಕಬಳಿಸಿ ಸಂಚಲನ ಮೂಡಿಸಿದರು.
ಆದರೆ, ಎರಡನೇ ಇನ್ನಿಂಗ್ಸ್ನಲ್ಲಿ ಕಣಿವೆ ರಾಜ್ಯದ ಬೌಲರ್ಗಳು ಕೆರಳಿದ ನಾಗರಂತೆ ದಾಳಿ ನಡೆಸಿದರು. ಕೇವಲ ಡ್ರಾಗೊಳಿಸಿದರೂ ಫೈನಲ್ ತಲುಪಬಹುದಾಗಿದ್ದ ಬಂಗಾಳ ತಂಡವನ್ನು ಜಮ್ಮು ಕಾಶ್ಮೀರದ ಅಖಿಬ್ ನಬಿ (4 ವಿಕೆಟ್) ಮತ್ತು ಸುನಿಲ್ ಕುಮಾರ್ ಅಲ್ಪ ಮೊತ್ತಕ್ಕೆ ಕಟ್ಟಿಹಾಕಿದರು. ಯಾರೂ ಊಹಿಸದ ರೀತಿಯಲ್ಲಿ ಬಂಗಾಳ ತಂಡ ಎರಡನೇ ಇನ್ನಿಂಗ್ಸ್ನಲ್ಲಿ ಕೇವಲ 99 ರನ್ಗಳಿಗೆ ಆಲೌಟ್ ಆಯಿತು.
ವಂಶಜ್ ಶರ್ಮಾ – ಅಬ್ದುಲ್ ಸಮದ್ ಜವಾಬ್ದಾರಿಯುತ ಆಟ
ಗೆಲುವಿಗೆ 126 ರನ್ಗಳ ಸುಲಭ ಗುರಿ ಬೆನ್ನಟ್ಟಿದ ಜಮ್ಮು ಕಾಶ್ಮೀರ, ಮೂರನೇ ದಿನದ ಅಂತ್ಯಕ್ಕೆ 43 ರನ್ಗಳಿಗೆ 2 ವಿಕೆಟ್ ಕಳೆದುಕೊಂಡಿತ್ತು. ಇಂದು (ಬುಧವಾರ) ಪಂದ್ಯದ ಆರಂಭದಲ್ಲಿ ಶಮಿ ಮತ್ತು ಆಕಾಶ್ ದೀಪ್ ವಿಕೆಟ್ ಕಿತ್ತು ಬಂಗಾಳಕ್ಕೆ ಆಸೆಯಾಗಿದ್ದರು. ಆದರೆ, ವಂಶಜ್ ಶರ್ಮಾ (ಅಜೇಯ 43) ಮತ್ತು ಅಬ್ದುಲ್ ಸಮದ್ (ಅಜೇಯ 30) ಐದನೇ ವಿಕೆಟ್ಗೆ ಅಜೇಯ 56 ರನ್ಗಳ ಜೊತೆಯಾಟವಾಡಿ ತಂಡವನ್ನು ಇತಿಹಾಸದ ಹೊಸ್ತಿಲಿಗೆ ತಂದರು.
ಪಂದ್ಯಶ್ರೇಷ್ಠ: ಇಡೀ ಪಂದ್ಯದಲ್ಲಿ 9 ವಿಕೆಟ್ ಕಬಳಿಸಿದ ವೇಗಿ ಅಖಿಬ್ ನಬಿ ಅವರಿಗೆ ಅರ್ಹವಾಗಿಯೇ ಈ ಪ್ರಶಸ್ತಿ ಲಭಿಸಿತು.
ಸಂಕ್ಷಿಪ್ತ ಸ್ಕೋರ್ ವಿವರ:
-
ಬಂಗಾಳ (1ನೇ ಇನ್ನಿಂಗ್ಸ್): 328/10 (ಸುದೀಪ್ ಕುಮಾರ್ 146; ಅಖಿಬ್ ನಬಿ 5/87)
-
ಜಮ್ಮು ಕಾಶ್ಮೀರ (1ನೇ ಇನ್ನಿಂಗ್ಸ್): 302/10 (ಅಬ್ದುಲ್ ಸಮದ್ 82; ಮೊಹಮ್ಮದ್ ಶಮಿ 8/90)
-
ಬಂಗಾಳ (2ನೇ ಇನ್ನಿಂಗ್ಸ್): 99/10 (ಶಾಬಾಝ್ ಅಹ್ಮದ್ 24; ಸುನಿಲ್ ಕುಮಾರ್ 4/27, ಅಖಿಬ್ ನಬಿ 4/36)
-
ಜಮ್ಮು ಕಾಶ್ಮೀರ (2ನೇ ಇನ್ನಿಂಗ್ಸ್): 126/4 (ವಂಶಜ್ ಶರ್ಮಾ 43*, ಅಬ್ದುಲ್ ಸಮದ್ 30*; ಆಕಾಶ್ ದೀಪ್ 3/46)
ಫೈನಲ್ನಲ್ಲಿ ಕರ್ನಾಟಕ – ಜೆ&ಕೆ ಮುಖಾಮುಖಿ?
ಇನ್ನೊಂದು ಸೆಮಿಫೈನಲ್ ಪಂದ್ಯದಲ್ಲಿ ಉತ್ತರಾಖಂಡ ವಿರುದ್ಧ ಕರ್ನಾಟಕ ತಂಡ ಸುಸ್ಥಿತಿಯಲ್ಲಿದ್ದು, ಫೈನಲ್ ತಲುಪುವ ಸಾಧ್ಯತೆ ದಟ್ಟವಾಗಿದೆ. ಹೀಗಾದಲ್ಲಿ, ಪ್ರಶಸ್ತಿಗಾಗಿ ದೇವದತ್ ಪಡಿಕ್ಕಲ್ ನಾಯಕತ್ವದ ಕರ್ನಾಟಕ ಮತ್ತು ಐತಿಹಾಸಿಕ ಫಾರ್ಮ್ನಲ್ಲಿರುವ ಜಮ್ಮು ಕಾಶ್ಮೀರ ತಂಡಗಳು ಮುಖಾಮುಖಿಯಾಗಲಿವೆ.