ಮಡಿಕೇರಿ NEWS DESK ಅ.30 : ಕೊಡವಲ್ಯಾಂಡ್‌ನ ಭೌಗೋಳಿಕ-ರಾಜಕೀಯ ಸ್ವಾಯತ್ತತೆ, ಸ್ವ-ಆಡಳಿತ ಹಾಗೂ ಆಂತರಿಕ ರಾಜಕೀಯ ಸ್ವ-ನಿರ್ಣಯದ ಹಕ್ಕು ಸೇರಿದಂತೆ ವಿವಿಧ ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ಕೊಡವ ನ್ಯಾಷನಲ್ ಕೌನ್ಸಿಲ್ (CNC) ವತಿಯಿಂದ ನವೆಂಬರ್ 1ರಂದು ಮಡಿಕೇರಿಯಲ್ಲಿ ಶಾಂತಿಯುತ ಸತ್ಯಾಗ್ರಹ ಹಮ್ಮಿಕೊಳ್ಳಲಾಗಿದೆ. ರಾಜ್ಯ ಪುನರ್ ವಿಂಗಡಣಾ ದಿನದಂದು ಬೆಳಿಗ್ಗೆ 10.30ಕ್ಕೆ ಮಡಿಕೇರಿ ಜಿಲ್ಲಾಧಿಕಾರಿ ಕಚೇರಿ ಆವರಣದ ಬಳಿ ಸತ್ಯಾಗ್ರಹ ನಡೆಯಲಿದೆ. ಈ ಹಿಂದೆ ದೆಹಲಿಯಲ್ಲಿ ನಡೆಸುತ್ತಿದ್ದ ಸತ್ಯಾಗ್ರಹವನ್ನು ಈ ಬಾರಿ ಕೊಡವಲ್ಯಾಂಡ್‌ನಲ್ಲಿಯೇ ನಡೆಸಲು ನಿರ್ಧರಿಸಲಾಗಿದೆ ಎಂದು CNC ಅಧ್ಯಕ್ಷ ಎನ್.ಯು. ನಾಚಪ್ಪ ತಿಳಿಸಿದ್ದಾರೆ. **ರಾಜ್ಯ ಪುನರ್ ವಿಂಗಡಣಾ ಕಾಯ್ದೆಯ ಭರವಸೆಗಳ ಉಲ್ಲಂಘನೆ ಆರೋಪ** 1956ರ ರಾಜ್ಯ ಪುನರ್ ವಿಂಗಡಣಾ ಕಾಯ್ದೆ ಮತ್ತು 7ನೇ ಸಂವಿಧಾನ ತಿದ್ದುಪಡಿಯ ಜಾರಿಯ ನಂತರ ಕೊಡಗು ಮೈಸೂರು ರಾಜ್ಯದಲ್ಲಿ ವಿಲೀನಗೊಂಡು, ಪ್ರಸ್ತುತ ಕರ್ನಾಟಕದ ಭಾಗವಾಗಿದೆ. ಈ ಪ್ರಕ್ರಿಯೆಯಲ್ಲಿ ರಾಜ್ಯ ಪುನರ್ ವಿಂಗಡಣಾ ಕಾಯ್ದೆಯ ಭರವಸೆಗಳನ್ನು ಉಲ್ಲಂಘಿಸುವ ಮೂಲಕ ಕೊಡವರ ಜನಾಂಗೀಯ ಅಸ್ಮಿತೆ, ಭಾಷೆ, ಸಂಸ್ಕೃತಿ, ಪರಂಪರೆ ಹಾಗೂ ಸ್ವಾಭಿಮಾನಕ್ಕೆ ಧಕ್ಕೆ ಉಂಟಾಗಿದೆ ಎಂಬುದು CNCಯ ಪ್ರಮುಖ ಆರೋಪವಾಗಿದೆ. ಕೊಡವರ ಪೂರ್ವಜರ ನೆಲ, ಭಾಷೆ, ಸಾಂಸ್ಕೃತಿಕ ಪರಂಪರೆ, ಜಲಸಂಪನ್ಮೂಲ, ಮಂದ್, ದೇವಕಾಡು, ಪವಿತ್ರ ಸ್ಥಳಗಳು, ಪರಿಸರ, ಯುದ್ಧ ಸ್ಮಾರಕಗಳು ಹಾಗೂ ಆರ್ಥಿಕ ಮತ್ತು ರಾಜಕೀಯ ಸ್ವಾತಂತ್ರ್ಯಕ್ಕೆ ಸೂಕ್ತ ಸಾಂವಿಧಾನಿಕ ರಕ್ಷಣೆ ದೊರೆಯಬೇಕೆಂದು ಸಂಘಟನೆ ಒತ್ತಾಯಿಸಿದೆ. **CNCಯ ಪ್ರಮುಖ 10 ಬೇಡಿಕೆಗಳು** 1. ಸಂವಿಧಾನದ ವಿಧಿ 244, 371 ಹಾಗೂ 5 ಮತ್ತು 6ನೇ ಅನುಸೂಚಿಗಳ ಆಶಯದಂತೆ ಕೊಡವಲ್ಯಾಂಡ್‌ಗೆ ಭೌಗೋಳಿಕ-ರಾಜಕೀಯ ಸ್ವಾಯತ್ತತೆ ಮತ್ತು ಸ್ವ-ಆಡಳಿತದ ಹಕ್ಕು ನೀಡಬೇಕು. 2. ಕೊಡಗಿಗೆ ಕೇಂದ್ರಾಡಳಿತ ಪ್ರದೇಶದ ಸ್ಥಾನಮಾನ ನೀಡಿ, ಹಿಂದಿನ ಪಾರ್ಟ್-ಸಿ ರಾಜ್ಯದ ಸ್ಥಾನಮಾನವನ್ನು ಪುನಃಸ್ಥಾಪಿಸಬೇಕು. 3. ವಿಶ್ವಸಂಸ್ಥೆಯ ಮಾನದಂಡಗಳ ಪ್ರಕಾರ ಕೊಡವರಿಗೆ ಆದಿಮ ಸಂಜಾತ ಜನಾಂಗದ (Indigenous People) ಸ್ಥಾನಮಾನ ನೀಡಬೇಕು. 4. ಕೊಡವ ಪರಂಪರೆ, ಬೆಟ್ಟಮೆ ಮತ್ತು ಮಂದ್ ವ್ಯವಸ್ಥೆಗೆ ಯುನೆಸ್ಕೋ ವಿಶ್ವ ಪರಂಪರೆಯ ಮಾನ್ಯತೆ ದೊರಕಿಸಬೇಕು. 5. 2026-27ರ ಜನಗಣತಿಯಲ್ಲಿ ಕೊಡವ ಏಕ-ಜನಾಂಗೀಯ ಸಮುದಾಯಕ್ಕೆ ಪ್ರತ್ಯೇಕ ಕೋಡ್ ಮತ್ತು ಕಾಲಂ ಕಲ್ಪಿಸಿ, 1871ರಿಂದ 1941ರವರೆಗಿನ ಜನಗಣತಿಗಳಲ್ಲಿ ಇದ್ದ ಪ್ರತ್ಯೇಕ ಗುರುತಿನ ಸ್ಥಾನಮಾನವನ್ನು ಪುನಃಸ್ಥಾಪಿಸಬೇಕು. 6. ಕೊಡವರ ಪೂರ್ವಜರ ಭೂಮಿಗೆ ಸಾಂವಿಧಾನಿಕ ರಕ್ಷಣೆ ಒದಗಿಸಿ, ಸಂವಿಧಾನದ 371A ವಿಧಿಯ ಮಾದರಿಯಲ್ಲಿ ಭೂಮಿ ವರ್ಗಾವಣೆಗೆ ನಿರ್ಬಂಧ ವಿಧಿಸಬೇಕು. 7. ಭೂಮಿ, ಸಂಸ್ಕೃತಿ ಮತ್ತು ಜನಸಂಖ್ಯೆಗೆ ಸಂಬಂಧಿಸಿದ ವಿಷಯಗಳಲ್ಲಿ ನಿರ್ಣಾಯಕ ಅಧಿಕಾರ ಹೊಂದಿರುವ ಕೊಡವ ಸ್ವಾಯತ್ತ ಮಂಡಳಿ ಸ್ಥಾಪಿಸಬೇಕು. 8. ಕೊಡವ ವೈಯಕ್ತಿಕ ಕಾನೂನು ಹಾಗೂ ತೋಕ್ (ಗನ್), ಗೆಜ್ಜೆತಂಡ್ ಸೇರಿದಂತೆ ಕೊಡವರ ಸಾಂಪ್ರದಾಯಿಕ ಆಚರಣೆಗಳಿಗೆ ರಕ್ಷಣೆ ನೀಡಬೇಕು. 9. ಮಂದ್, ದೇವಕಾಡು, ಕೈಮಾಡ, ಯುದ್ಧ ಸ್ಮಾರಕ ಸೇರಿದಂತೆ ಕೊಡವರ ಪವಿತ್ರ ಸ್ಥಳಗಳನ್ನು ರಕ್ಷಿಸಿ ಪುನಃಸ್ಥಾಪಿಸಬೇಕು. ಸಾಂಪ್ರದಾಯಿಕ ಕಾನೂನು ಮಂಡಳಿ ರಚಿಸಬೇಕು. 10. ಕೊಡವರ ಆರ್ಥಿಕ, ರಾಜಕೀಯ ಹಾಗೂ ಶೈಕ್ಷಣಿಕ ಹಕ್ಕುಗಳನ್ನು ರಕ್ಷಿಸುವುದರೊಂದಿಗೆ ಒಳರೇಖೆ (Inner Line) ಮಾದರಿಯ ರಕ್ಷಣಾ ವ್ಯವಸ್ಥೆ ಜಾರಿಗೊಳಿಸಬೇಕು. ಕಳೆದ 36 ವರ್ಷಗಳಿಂದ ಕೊಡವರ ಅಸ್ಮಿತೆ, ಹಕ್ಕುಗಳು, ಸ್ವಾಯತ್ತತೆ ಹಾಗೂ ಸ್ವ-ನಿರ್ಣಯದ ಹಕ್ಕಿಗಾಗಿ ಕೊಡವ ನ್ಯಾಷನಲ್ ಕೌನ್ಸಿಲ್ ನಿರಂತರವಾಗಿ ಶಾಂತಿಯುತ ಹೋರಾಟ ನಡೆಸುತ್ತಾ ಬಂದಿದೆ. ಭಾರತ ಸರ್ಕಾರ ಮತ್ತು ಕರ್ನಾಟಕ ಸರ್ಕಾರದ ಮುಂದೆ ಈ ಬೇಡಿಕೆಗಳನ್ನು ಮಂಡಿಸಲಾಗಿದ್ದು, ಸತ್ಯಾಗ್ರಹದ ಬಳಿಕ ಭಾರತ ಸರ್ಕಾರಕ್ಕೆ ಮತ್ತೊಮ್ಮೆ ಜ್ಞಾಪನ ಪತ್ರ ಸಲ್ಲಿಸಲಾಗುವುದು ಎಂದು ಎನ್.ಯು. ನಾಚಪ್ಪ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
