ಮಡಿಕೇರಿ ಜೂ.11 NEWS DESK : ಆಯುಷ್ ಇಲಾಖೆಯ ವತಿಯಿಂದ 12ನೇ ಅಂತರಾಷ್ಟ್ರೀಯ ಯೋಗ ದಿನಾಚರಣೆ ಜೂ.21 ರಂದು ನಗರದ ಕಾವೇರಿ ಹಾಲ್ ನಲ್ಲಿ ನಡೆಯಲಿದೆ. ಸುದ್ದಿಗೋಷ್ಠಿಯಲ್ಲಿ ಈ ಕುರಿತು ಮಾಹಿತಿ ನೀಡಿದ ಜಿಲ್ಲಾ ಆಯುಷ್ ಇಲಾಖಾ ಅಧಿಕಾರಿ ಡಾ. ಶೈಲಜಾ ಅವರು ಯೋಗ ದಿನಾಚರಣೆಯಂದು ಬೆಳಗ್ಗೆ 6.45 ಗಂಟೆಗೆ ಕಾರ್ಯಕ್ರಮ ಉದ್ಘಾಟನೆಯಾಗಲಿದೆ. ನಂತರ 7 ಗಂಟೆಯಿಂದ 8 ಗಂಟೆಯವರೆಗೆ ಯೋಗ ಪ್ರಾತ್ಯಕ್ಷಿಕೆ ಪ್ರದರ್ಶನಗೊಳ್ಳಲಿದೆ. ಉದ್ಘಾಟನಾ ಕಾರ್ಯಕ್ರಮದಲ್ಲಿ ಜನಪ್ರತಿನಿಧಿಗಳು ಕೂಡ ಪಾಲ್ಗೊಳ್ಳಲಿದ್ದು, ಯೋಗ ದಿನಾಚರಣೆಯ ಯಶಸ್ಸಿಗೆ ಜಿಲ್ಲಾ ಮತ್ತು ತಾಲ್ಲೂಕು ಮಟ್ಟದ ಎಲ್ಲಾ ಅಧಿಕಾರಿಗಳು ಸಹಕರಿಸುವಂತೆ ಮನವಿ ಮಾಡಿದರು. ಯೋಗ ದಿನಾಚರಣೆÉಗೆ ಪೂರ್ವಭಾವಿಯಾಗಿ ಜೂ.19 ರಂದು ಸಂಜೆ 5 ಗಂಟೆಗೆ ಯೋಗ ಪ್ರೊಟೋಕಾಲ್‍ನ ಪ್ರಕಾರ ಯೋಗಾಸನಗಳ ಪೂರ್ವಾಭ್ಯಾಸ ನಗರದ ಸರಕಾರಿ ಬಸ್ ಡಿಪೋ ಬಳಿಯ ಜಿಲ್ಲಾ ಸರ್ಕಾರಿ ಆಯುರ್ವೇದ ಆಸ್ಪತ್ರೆಯಲ್ಲಿ ನಡೆಯಲಿದೆ. ಅಂತರಾಷ್ಟ್ರೀಯ ಯೋಗ ದಿನಾಚರಣೆಯ ಹಿನ್ನೆಲೆಯಲ್ಲಿ ಜೂ.16 ರಂದು ಬೆಳಿಗ್ಗೆ 8 ಗಂಟೆಗೆ ನಗರದ ಗಾಂಧಿ ಮೈದಾನದಿಂದ ಜನರಲ್ ತಿಮ್ಮಯ್ಯ ವೃತ್ತಕ್ಕಾಗಿ, ಹಳೆಯ ಖಾಸಗಿ ಬಸ್‍ನಿಲ್ದಾಣ, ಇಂದಿರಾಗಾಂಧಿ ವೃತ್ತವನ್ನು ಬಳಸಿ ಮತ್ತೆ ಗಾಂಧಿ ಮೈದಾನಕ್ಕೆ ಬರುವಂತೆ “ಯೋಗ ಜಾಥ”ವನ್ನು ಹಮ್ಮಿಕೊಳ್ಳಲಾಗಿದೆ ಎಂದು ತಿಳಿಸಿದರು. *ಆನ್‍ಲೈನ್ ಯೋಗ* ಕೊಡಗು ಜಿಲ್ಲಾ ವೈದ್ಯಕೀಯ ವಿದ್ಯಾಸಂಸ್ಥೆಯ ಬೋಧಕ ಆಸ್ಪತ್ರೆಯ ಡಾ.ಪಿ.ಜಿ.ಅರುಣ್ ಅವರು ಮಾತನಾಡಿ, ಜಿಲ್ಲಾಡಳಿತ, ಜಿಲ್ಲಾ ಪಂಚಾಯತ್ ಒಳಗೊಂಡಂತೆ ವಿವಿಧ ಸಂಘ ಸಂಸ್ಥೆಗಳ ಸಹಕಾರದೊಂದಿಗೆ ಆಯೋಜಿತ ಯೋಗ ದಿನಾಚರಣೆ ಪ್ರಯುಕ್ತ “ಆನ್‍ಲೈನ್ ಯೋಗ” ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿದೆ. ಇದರಲ್ಲಿ ಆಯುಷ್ ಮಂತ್ರಾಲಯದ ಅಧಿಕೃತ ಪೋರ್ಟಲ್ https;//moa.habit.yoga?ref=karnataka ದಲ್ಲಿ ಜಿಲ್ಲೆಯಲ್ಲಿ ಕಾರ್ಯನಿರ್ವಹಿಸುತ್ತಿರುವ ಎಲ್ಲಾ ಸರ್ಕಾರಿ ಅಧಿಕಾರಿಗಳು, ಸಿಬ್ಬಂದಿಗಳು, ಎಲ್ಲಾ ಶಾಲಾ ಕಾಲೇಜು ವಿದ್ಯಾರ್ಥಿಗಳು, ಸಿಬ್ಬಂದಿಗಳು, ಸಾರ್ವಜನಿಕರು ನೋಂದಾಯಿಸಿಕೊಳ್ಳುವ ಮೂಲಕ ಜೂ.21ರವರೆಗೆ ಯೋಗ ತರಬೇತಿಯನ್ನು ಆನ್ ಲೈನ್‍ನಲ್ಲಿ ಪಡೆಯಲು ಅವಕಾಶವನ್ನು ಕಲ್ಪಿಸಲಾಗಿದೆ. ಆಯುಷ್ ಮಂತ್ರಾಲಯದ ಈ ಪ್ರಯತ್ನ ಜೂ.21ರ ಯೋಗ ದಿನಾಚರಣೆಯಂದು ಅಧಿಕೃತವಾಗಿ ಗಿನ್ನಿಸ್ ದಾಖಲೆಗೆ ಸೇರ್ಪಡೆಗೊಳ್ಳಲಿದೆ ಎಂದರು. *ಸರ್ವರಿಗೂ “ವೈ-ಬ್ರೇಕ್”* ಯೋಗದ ಮಹತ್ವವನ್ನು ಸಮಾಜದ ಎಲ್ಲಾ ಸ್ತರಗಳ ಮಂದಿಗೂ ತಲುಪಿಸುವ ಉದ್ದೇಶÀದಿಂದ “ವೈ-ಬ್ರೇಕ್” (ಯೋಗ ಬ್ರೇಕ್) ಎನ್ನುವ ಕಾರ್ಯಕ್ರಮ ಆಯೋಜಿಸಲಾಗಿದೆ. ಇದರಡಿ ವಿವಿಧ ಸರಕಾರಿ ಕಚೇರಿಗಳು, ಸರಕಾರೇತರ ಸಂಸ್ಥೆಗಳು, ಶಾಲಾ ಕಾಲೇಜುಗಳಲ್ಲಿ 10 ರಿಂದ 15 ನಿಮಿಷಗಳ ಯೋಗ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗುತ್ತದೆ. ಇದರ ಮೂಲಕ ಯೋಗದ ಮಹತ್ವವನ್ನು ತಿಳಿಸುವ ಪ್ರಯತ್ನ ನಡೆಯಲಿದ್ದು, ಇದಕ್ಕಾಗಿ 7 ಮಂದಿ ಯೋಗ ಶಿಕ್ಷಕರು ಕಾರ್ಯನಿರ್ವಹಿಸಲಿದ್ದಾರೆ ಎಂದು ಡಾ.ಅರುಣ್ ಹೇಳಿದರು. *”ನಿತ್ಯ ಯೋಗ”* ಪ್ರಸಕ್ತ ಸಾಲಿನಲ್ಲಿ ಆನ್ ಲೈನ್‍ನ ಗೂಗಲ್ ಮೀಟ್, ಝೂಮ್ ಮೀಟ್ ವೇದಿಕೆಗಳಲ್ಲಿ ಯೋಗ ಸ0ಸ್ಥೆಯ ತರಬೇತುದಾರರು, ಆಯುಷ್ಮಾನ್ ಆರೋಗ್ಯ ಮಂದಿರದ ಯೋಗ ತರಬೇತುದಾರರಿಂದ ಬೆಳಗ್ಗೆ ಮತ್ತು ಸಂಜೆ 45 ನಿಮಿಷಗಳ ಅವಧಿಯ ಯೋಗ ತರಬೇತಿ ಮತ್ತು 15 ನಿಮಿಷಗಳ ಆರೋಗ್ಯ ಸಂಬಂಧಿ ಉಪನ್ಯಾಸವನ್ನು ಆಯೋಜಿಸಲಾಗಿದೆ. ಇನ್ನಷ್ಟೆ ಈ ಕಾರ್ಯಕ್ರಮದ ಆನ್‍ಲೈನ್ ಲಿಂಕ್‍ನ್ನು ಒದಗಿಸಬೇಕಾಗಿದೆ. ಈ ಲಿಂಕ್‍ನಲ್ಲಿ ಆಸಕ್ತರು ಸೇರ್ಪಡೆಗೊಂಡು ಬೆಳಗ್ಗೆ ಮತ್ತು ಸಂಜೆ ತಲಾ ಮೂರು ಅವಧಿಗಳಲ್ಲಿ ತಮಗೆ ಸೂಕ್ತವಾದ ಸಮಯವನ್ನು ಆಯ್ದುಕೊಂಡು 365 ದಿನಗಳ ಕಾಲ ಯೋಗಾಭ್ಯಾಸವನ್ನು ಮಾಡಬಹುದೆಂದು ತಿಳಿಸಿದರು. ನ್ಯಾಷನಲ್ ಇಂಟಿಗ್ರೇಟೆಡ್ ಮೆಡಿಕಲ್ ಅಸೋಸೊಯೇಷನ್(ನೀಮ) ಸಂಸ್ಥೆಯ ಕೊಡಗು ಘಟಕದ ಅಧ್ಯಕ್ಷರಾದ ಡಾ.ರಾಜಾರಾಮ್ ಅವರು ಮಾತನಾಡಿ, ಯೋಗ ದಿನಾಚರಣೆಗೆ ನೀಮಾ ಸಂಘ0ಟನೆಯು ಕೈಜೋಡಿಕೊಂಡು ಬರುತ್ತಿದೆ. ಈ ಬಾರಿ “ಸೆಲ್ಫಿ ವಿದ್ ಯೋಗ ಕೇಂದ್ರ” ಎನ್ನುವ ಸ್ಪರ್ಧೆಯನ್ನು ಸಾರ್ವಜನಿಕರಿಗೆ ಆಯೋಜಿಸಲಾಗಿದೆ. ಈ ಸ್ಪರ್ಧೆಯಲ್ಲಿ ಯೋಗ ಕೇಂದ್ರಗಳಿಗೆ ತೆರಳಿ, ಅಲ್ಲಿ ಯೋಗಾಭ್ಯಾಸ ಮಾಡುವ ಅತೀ ಹೆಚ್ಚು ಸೆಲ್ಫಿಗಳನ್ನು ತೆಗೆದು ಕಳುಹಿಸುವವರಿಗೆ ಯೋಗ ದಿನಾಚರಣೆಯಂದು ವಿಶೇಷ ಬಹುಮಾನವನ್ನು ನೀಮ ವತಿಯಿಂದ ನೀಡಲಾಗುತ್ತದೆ. ಸೆಲ್ಫಿಗಳನ್ನು ಮೊ.9886266120ಕ್ಕೆ ಕಳುಹಿಸಬೇಕೆಂದು ಮನವಿ ಮಾಡಿದರು. ಸುದ್ದಿಗೋಷ್ಠಿಯಲ್ಲಿ ಆಯುಷ್ ಇಲಾಖೆಯ ಸಹಾಯಕ ಆಡಳಿತಾಧಿಕಾರಿ ಕೆ.ಟಿ.ಕಾವೇರಪ್ಪ, ಭಾರತೀಯ ವಿದ್ಯಾಭವನದ ಯೋಗ ಶಿಕ್ಷಕ ಕೆ.ಕೆ.ಮಹೇಶ್ ಕುಮಾರ್ ಹಾಗೂ ಪತಂಜಲಿ ಯೋಗ ಶಿಕ್ಷಣ ಕೇಂದ್ರದ ಸುಧಾಕರ್ ಉಪಸ್ಥಿತರಿದ್ದರು.
