ಮಡಿಕೇರಿ, NEWS DESK ನ. 14: ನಗರದ ಕೊಡಗು ವಿದ್ಯಾಲಯದಲ್ಲಿ ಮಕ್ಕಳ ದಿನಾಚರಣೆಯನ್ನು ಶಿಕ್ಷಕರು ತಮ್ಮ ವಿಶಿಷ್ಟ ಪ್ರತಿಭೆ, ಮನರಂಜನೆ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳ ಮೂಲಕ ಅತ್ಯಂತ ಸಂಭ್ರಮದಿಂದ ಆಚರಿಸಿದರು.
ಶಾಲೆಯ ಶ್ರೀ ಬಿ.ಕೆ. ಸುಬ್ಬಯ್ಯ ಸಭಾಂಗಣದಲ್ಲಿ ನಡೆದ ಕಾರ್ಯಕ್ರಮದ ಅಧ್ಯಕ್ಷತೆಯನ್ನು ಶಾಲಾ ನಾಯಕರಾದ ನಿರಂಜನ್ ಎನ್., ನಾಯಕಿ ಲಕ್ಷ್ಯ ಪೊನ್ನಕ್ಕ, ಸಾಂಸ್ಕೃತಿಕ ನಾಯಕಿ ಕಿರಣ್ ಹಾಗೂ ಕ್ರೀಡಾ ನಾಯಕಿ ತೇಜಲ್ ಬೋಪಯ್ಯ ವಹಿಸಿದ್ದರು.
ಶಿಕ್ಷಕಿಯರಾದ ಚಿತ್ರಾ ನಂಜಪ್ಪ, ರಾಜೇಶ್ವರಿ ಹಾಗೂ ಮಮತಾ ಅವರಿಂದ ಮೂಡಿಬಂದ ಸ್ವಾಗತ ನೃತ್ಯ ಕಾರ್ಯಕ್ರಮಕ್ಕೆ ವಿಶೇಷ ಮೆರುಗು ನೀಡಿತು. ಕಾರ್ಯಕ್ರಮದ ವಿಶೇಷ ಆಕರ್ಷಣೆಯಾಗಿದ್ದ ಜಾದೂಗಾರ ವಿಕ್ರಂ ಶೆಟ್ಟಿ ಅವರ ಮ್ಯಾಜಿಕ್ ಪ್ರದರ್ಶನ ಮಕ್ಕಳಲ್ಲಿ ಅಚ್ಚರಿ, ಕುತೂಹಲ ಹಾಗೂ ನಗುವಿನ ಅಲೆಗಳನ್ನು ಮೂಡಿಸಿತು.
ಶಿಕ್ಷಕಿ ಜಯಶ್ರೀ ಅವರ ತಂಡದಿಂದ ಪ್ರದರ್ಶನಗೊಂಡ ಹಾಸ್ಯಮಯ ನಾಟಕ ಮಕ್ಕಳನ್ನು ನಗೆಗಡಲಲ್ಲಿ ತೇಲಿಸಿತು. ಶಿಕ್ಷಕರು ವಿವಿಧ ಕ್ಷೇತ್ರಗಳ ವಿಶಿಷ್ಟ ಉಡುಗೆ-ತೊಡುಗೆಗಳಲ್ಲಿ ಭಾಗವಹಿಸಿದ ಆಕರ್ಷಕ ರ್ಯಾಂಪ್ ವಾಕ್ ಪ್ರೇಕ್ಷಕರ ಗಮನ ಸೆಳೆಯಿತು. ಶಿಕ್ಷಕರ ಗಾಯನ ಕಾರ್ಯಕ್ರಮ ಮಕ್ಕಳಿಗೆ ಮನರಂಜನೆಯ ರಸದೌತಣ ನೀಡಿದರೆ, ಶಿಕ್ಷಕಿ ದಿವ್ಯ ಮತ್ತು ತಂಡದ ನೃತ್ಯ ಪ್ರದರ್ಶನ ಸಂಭ್ರಮದ ಕಳೆ ಹೆಚ್ಚಿಸಿ ಮೆಚ್ಚುಗೆಗೆ ಪಾತ್ರವಾಯಿತು.
ಶಾಲಾ ನಾಯಕ ನಿರಂಜನ್ ಎನ್. ಮಕ್ಕಳ ದಿನಾಚರಣೆಯ ಮಹತ್ವದ ಕುರಿತು ತಮ್ಮ ಅನಿಸಿಕೆಗಳನ್ನು ಹಂಚಿಕೊಂಡರು.
ಮಕ್ಕಳಿಗಾಗಿ ಶಿಕ್ಷಕರೇ ವಿವಿಧ ರೂಪಗಳಲ್ಲಿ ಸಿದ್ಧರಾಗಿ ತಮ್ಮಲ್ಲಿರುವ ಗಾಯನ, ನೃತ್ಯ, ಅಭಿನಯ ಹಾಗೂ ಹಾಸ್ಯ ಪ್ರತಿಭೆಗಳನ್ನು ಅನಾವರಣಗೊಳಿಸಿದ್ದು ಈ ಬಾರಿಯ ಮಕ್ಕಳ ದಿನಾಚರಣೆಯ ವಿಶೇಷ ಆಕರ್ಷಣೆಯಾಗಿತ್ತು.
ವೀಣಾ ಹೊಳ್ಳ ಪ್ರಾರ್ಥಿಸಿದರು. ಚಿತ್ರಾ ನಂಜಪ್ಪ ಸ್ವಾಗತಿಸಿದರು. ಶಿಕ್ಷಕಿಯರಾದ ರೇಖಾ ಕೆ.ಕೆ. ಮತ್ತು ಜಯಶ್ರೀ ಎನ್. ಕಾರ್ಯಕ್ರಮ ನಿರೂಪಿಸಿದರು. ಶಿಕ್ಷಕಿ ಸೋನಾ ಮುತ್ತಮ್ಮ ವಂದಿಸಿದರು.
















