ಮಡಿಕೇರಿ ಜ.28 NEWS DESK : ಬೆಳಗಾವಿ ಜಿಲ್ಲೆಯ ಆಜುರ ಪ್ರತಿಷ್ಠಾನದ ವತಿಯಿಂದ ಕೃಪಾ ದೇವರಾಜ್ ಅವರ ಮರ್ಮರ ಕಥಾ ಸಂಕಲನಕ್ಕೆ ರಾಜ್ಯ ಪ್ರಶಸ್ತಿ ಪ್ರದಾನ ಮಾಡಲಾಯಿತು. ಬೆಳಗಾವಿ ಜಿಲ್ಲೆಯ ರಾಯಬಾಗ ತಾಲ್ಲೂಕಿನ ಹಾರೋಗೇರಿಯಲ್ಲಿ ಆಜೂರ ಕುಟುಂಬದ ತೋಟದ ಮಹಾಮನೆಯಲ್ಲಿ ನಡೆದ ಕಾರ್ಯಕ್ರಮದಲ್ಲಿ ರಾಜ್ಯ ಮಟ್ಟದ ಪ್ರತಿಷ್ಠಿತ ಆಜೂರ ಪುಸ್ತಕ ಪ್ರಶಸ್ತಿಗೆ ಆಯ್ಕೆಯಾದ ರಮೇಶ್ ಗುಬ್ಬಿ ಕಾರವಾರ, ಕೃಪಾ ದೇವರಾಜ್ ಮಡಿಕೇರಿ, ಎ.ಎಂ.ಜಯಶ್ರೀ ಬಳ್ಳಾರಿ, ಡಾ.ತಿಪ್ಪೇಸ್ವಾಮಿ ಹುನಗುಂದ, ಡಾ.ಅಶೋಕ ನರೋಡೆ ಮಹಾಲಿಂಗಪುರ, ವಿಜಯ ಬಡಿಗೇರ ಇಟಗಿ, ಭಾಗ್ಯಶ್ರೀ ಗವಿಸಿದ್ಧಯ್ಯ ಗದಗ, ಟಿ.ಎಸ್.ವಂಟಗುಡಿ ಹಿಟಗಲ್ಲು ಅವರನ್ನು ಶಾಲು ಹೊದಿಸಿ, ಪ್ರಶಸ್ತಿ ಫಲಕ, ನಗದು ನೀಡಿ ಸನ್ಮಾನಿಸಲಾಯಿತು. ಆಜೂರ ಪ್ರತಿಷ್ಠಾನದ ಪ್ರತಿಷ್ಠಿತ ರಾಜ್ಯ ಮಟ್ಟದ ಪ್ರಶಸ್ತಿ ಸಮಾರಂಭವನ್ನು ಶ್ರೀ ಶಿವಾನಂದ ಮಹಾಸ್ವಾಮಿ, ಶ್ರೀ ಶಶಿಕಾಂತ ಗುರೂಜಿ ದರೂರ, ಶ್ರೀ ವಿಠಲ ಶರಣರು ಇನ್ನಿತರ ಸ್ವಾಮೀಜಿಗಳ ಸಾನಿಧ್ಯದಲ್ಲಿ, ನೇತಾರಾದ ಬಸವರಾಜ ಆಜೂರ ಹಾಗೂ ಪ್ರಶಸ್ತಿ ಪುರಸ್ಕೃತರಾದ ಸಾಹಿತಿಗಳ ಸಮ್ಮುಖದಲ್ಲಿ ಉದ್ಘಾಟಿಸಲಾಯಿತು. ಕಾರ್ಯಕ್ರಮದಲ್ಲಿ ಶಿವಾನಂದ ಮಹಾಸ್ವಾಮಿ ಮಾತನಾಡಿ, ಆಯ್ಕೆಗೆ ಬಂದ ಅಷ್ಟೂ ಪುಸ್ತಕಗಳನ್ನು ಓದಿ ರಾಜ್ಯಮಟ್ಟದ ಪ್ರಶಸ್ತಿಗೆ ಆಯ್ಕೆ ಮಾಡುವುದು ಸುಲಭದ ವಿಷಯವಾಗಿರಲಿಲ್ಲ, ಪ್ರತಿಯೊಂದು ಪುಸ್ತಕವನ್ನು ತಾವೇ ಖುದ್ದಾಗಿ ಓದಿ ಆಯ್ಕೆ ಮಾಡಿದುದನ್ನು ವೇದಿಕೆಯಲ್ಲಿ ನುಡಿದರು. ಬಂದಂತಹ ಪ್ರತೀ ಕೃತಿಯೂ ಉತ್ತಮವಾಗಿದ್ದು, ಆಯ್ಕೆ ಸಮಿತಿಯ ಮಾನದಂಡದ ಮೇಲೆ ಪುರಸ್ಕಾರ ಯೋಗ್ಯವಾದ ಕೃತಿಗಳನ್ನು ಆಯ್ಕೆ ಮಾಡಲಾಯಿತು ಎಂದರು. ಕಳೆದ ಮೂವತ್ತೈದು ವರ್ಷಗಳಿಂದಲೂ ನೀಡಲಾಗುತ್ತಿರುವ ಈ ಪ್ರತಿಷ್ಠಿತ ಪ್ರಶಸ್ತಿಗೆ ನಾಡಿನ ಹಲವಾರು ಸಾಹಿತಿಗಳು ಭಾಜನರಾಗಿದ್ದಾರೆ ಎಂದರು. ಪ್ರತಿಷ್ಠಾನದ ಶಾಲಾ ವಿದ್ಯಾರ್ಥಿಗಳು ನಾಡಗೀತೆಯನ್ನು ಹಾಡಿದರು. ಕೃಪಾ ದೇವರಾಜ್ “ಭಾವದ ಕದತಟ್ಟಿ” ಕವನ ಸಂಕಲನ, “ಮರ್ಮರ” ಕಥಾ ಸಂಕಲನ, “ಚೌಚೌ ಬಾತ್” ಲಲಿತ ಪ್ರಬಂಧಗಳ ಸಂಕಲನ ಹಾಗೂ “ಕಾರ್ಪಣ್ಯದ ಹೂವು” ಕವನ ಸಂಕಲನ ಕೃತಿಗಳನ್ನು ರಚಿಸಿದ್ದಾರೆ. ಮಡಿಕೇರಿಯಲ್ಲಿ ವಾಸವಿರುವ ಇವರು, ಮಡಿಕೇರಿ ತಾಲೂಕು ಕಚೇರಿಯ ಶಿರಸ್ತೆದಾರರಾದ ಪಿ.ಎಲ್.ದೇವರಾಜ್ ಅವರ ಪತ್ನಿ.
