ಮಡಿಕೇರಿ, NEWS DESK ಅ.2 : ಉದಿಯನ ಅನಿಲ್ ಉಲ್ಲಾಸ್ ನಿರ್ದೇಶನದ ‘ಮುತ್ತು ನಾಡ್’ ಕಿರುಚಿತ್ರವು ಚಿಕಾಗೋ ಸ್ಕ್ರಿಪ್ಟ್ ಅವಾರ್ಡ್‌ನ ‘ಬೆಸ್ಟ್ ಒರಿಜಿನಲ್ ಸ್ಕ್ರೀನ್‌ಪ್ಲೇ’ ಪ್ರಶಸ್ತಿಗೆ ಭಾಜನವಾಗಿದೆ.
ನಗರದ ಪತ್ರಿಕಾ ಭವನದಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಚಿತ್ರದ ನಿರ್ದೇಶಕ ಉದಿಯನ ಅನಿಲ್ ಉಲ್ಲಾಸ್, 2018ರ ಮುಂಗಾರು ಅವಧಿಯಲ್ಲಿ ಕೊಡಗು ಜಿಲ್ಲೆಯಲ್ಲಿ ಸಂಭವಿಸಿದ ಗುಡ್ಡ ಕುಸಿತದಿಂದ ಮನೆ-ಮಠ ಹಾಗೂ ಬಂಧು-ಬಾಂಧವರನ್ನು ಕಳೆದುಕೊಂಡ ಕುಟುಂಬಗಳ ಅಂತರಾಳದ ನೋವು ಮತ್ತು ಅನುಭವಗಳನ್ನು ‘ಮುತ್ತು ನಾಡ್’ ಕಿರುಚಿತ್ರದ ಮೂಲಕ ಕಟ್ಟಿಕೊಡಲಾಗಿದೆ ಎಂದು ತಿಳಿಸಿದರು.
ವಿಕೋಪದ ನಂತರದ ಬದುಕನ್ನು ಅತ್ಯಂತ ಪರಿಣಾಮಕಾರಿಯಾಗಿ ಚಿತ್ರಿಸುವ ಈ ಸಿನಿಮಾ, ಮೌನದ ಮೂಲಕ ನೋವು-ನಲಿವುಗಳನ್ನು ಪ್ರೇಕ್ಷಕರಿಗೆ ತಲುಪಿಸುವ ಸೂಕ್ಷ್ಮ ಸಂವೇದನೆಯೊಂದಿಗೆ ರೂಪಿಸಲಾಗಿದೆ. ಚಿತ್ರವು ಪ್ರೇಕ್ಷಕರ ವೀಕ್ಷಣೆಗೆ ಸಜ್ಜಾಗಿದೆ ಎಂದರು.
ಮಡಿಕೇರಿ ಹಾಗೂ ಕಾಲೂರು ಭಾಗದಲ್ಲಿ ಪ್ರಸಕ್ತ ಸಾಲಿನ ಮೇ ಮತ್ತು ಜೂನ್ ತಿಂಗಳಲ್ಲಿ ಚಿತ್ರದ ಚಿತ್ರೀಕರಣ ನಡೆಸಲಾಗಿದೆ. ಸುಮಾರು 1 ಗಂಟೆ 30 ನಿಮಿಷಗಳ ಅವಧಿಯ ಈ ಚಿತ್ರದಲ್ಲಿ ಆರಂಭದಲ್ಲಿ ಅರೆಭಾಷೆಯ ಕೆಲವು ಮಾತುಗಳನ್ನು ಹೊರತುಪಡಿಸಿ, ಬಹುತೇಕ ಚಿತ್ರದುದ್ದಕ್ಕೂ ಭಾವನೆಗಳು ಮತ್ತು ಪ್ರಕೃತಿಯೇ ಪ್ರೇಕ್ಷಕರೊಂದಿಗೆ ಮೌನ ಸಂಭಾಷಣೆ ನಡೆಸುತ್ತವೆ.
ಭಾಷೆಯ ಮಿತಿಗಳನ್ನು ಮೀರಿ ಮೌನದ ಮೂಲಕವೇ ಚಿತ್ರವು ಜನರನ್ನು ತಲುಪಲಿದೆ ಎಂಬ ವಿಶ್ವಾಸವನ್ನು ನಿರ್ದೇಶಕರು ವ್ಯಕ್ತಪಡಿಸಿದರು.
ತಾಯಿಯನ್ನು ಕಳೆದುಕೊಂಡ ಮಗ ಹಾಗೂ ಪತ್ನಿಯನ್ನು ಕಳೆದುಕೊಂಡ ತಂದೆ ಎಂಬ ಎರಡು ಪ್ರಮುಖ ಪಾತ್ರಗಳ ಸುತ್ತ ಚಿತ್ರವನ್ನು ರೂಪಿಸಲಾಗಿದೆ. ಈ ಪಾತ್ರಗಳಿಗೆ ಕಲಾವಿದರಾದ ಅಲ್ಲಾರಂಡ ವಿಠಲ್ ನಂಜಪ್ಪ ಹಾಗೂ ಕಾಡ್ಯಮಾಡ ಸುಮನ್ ಜೀವ ತುಂಬಿದ್ದಾರೆ.
ಈಗಾಗಲೇ ‘ಮುತ್ತು ನಾಡ್’ ಕಿರುಚಿತ್ರವು ಚಿಕಾಗೋ ಸ್ಕ್ರಿಪ್ಟ್ ಅವಾರ್ಡ್‌ನ ‘ಬೆಸ್ಟ್ ಒರಿಜಿನಲ್ ಸ್ಕ್ರೀನ್‌ಪ್ಲೇ’ ಪ್ರಶಸ್ತಿಗೆ ಭಾಜನವಾಗಿರುವುದಾಗಿ ಚಿತ್ರದ ಸಹ ನಿರ್ದೇಶಕ ವೈಶಾಖ್ ಪೆರುಮನ ತಿಳಿಸಿದರು.
ಸಿನಿಮಾ ಕ್ಷೇತ್ರದ ಬೆಳವಣಿಗೆಯಲ್ಲಿ ಕಿರುಚಿತ್ರಗಳ ಕೊಡುಗೆಯೂ ಮಹತ್ವದ್ದಾಗಿದೆ. ಹೊಸ ಪರಿಕಲ್ಪನೆಯ ‘ಮುತ್ತು ನಾಡ್’ ಚಿತ್ರವನ್ನು ನಾಡಿನ ಜನತೆ ಪ್ರೋತ್ಸಾಹಿಸಿ ಗೆಲ್ಲಿಸಿಕೊಡಬೇಕು ಎಂದು ಅವರು ಮನವಿ ಮಾಡಿದರು.
ನಟ ಅಲ್ಲಾರಂಡ ವಿಠಲ್ ನಂಜಪ್ಪ ಮಾತನಾಡಿ, ಚಿತ್ರದ ಬಗ್ಗೆ ಆಸಕ್ತಿ ಹೊಂದಿರುವ ಸಮಾನ ಮನಸ್ಕರು ಒಗ್ಗೂಡಿ ಚಿತ್ರವನ್ನು ನಿರ್ಮಿಸಿದ್ದು, ಈ ಚಿತ್ರದ ಮೂಲಕ ಸಾಮರಸ್ಯದ ಸಂದೇಶವನ್ನು ಕಟ್ಟಿಕೊಡುವ ಪ್ರಯತ್ನ ಮಾಡಲಾಗಿದೆ ಎಂದರು. ಅಲ್ಲಾರಂಡ ಮುಕುಲ್ ನಂಜಪ್ಪ ಛಾಯಾಗ್ರಹಣ ನಿರ್ವಹಿಸಿದ್ದಾರೆ ಎಂದು ತಿಳಿಸಿದರು.
ಶೀಘ್ರದಲ್ಲೇ ಮಡಿಕೇರಿಯ ಗಾಂಧಿ ಭವನದಲ್ಲಿ ಚಿತ್ರದ ಪ್ರದರ್ಶನ ಆಯೋಜಿಸುವ ಉದ್ದೇಶವಿದೆ. ಅಲ್ಲದೆ ಗೋಣಿಕೊಪ್ಪಲು, ಸುಂಟಿಕೊಪ್ಪ ಹಾಗೂ ಮೈಸೂರು ಸೇರಿದಂತೆ ಕೆಲವು ಚಿತ್ರಮಂದಿರಗಳಲ್ಲಿ ಪ್ರದರ್ಶನಕ್ಕೆ ರೂಪುರೇಷೆ ಸಿದ್ಧಪಡಿಸಲಾಗುತ್ತಿದೆ ಎಂದು ಚಿತ್ರತಂಡ ತಿಳಿಸಿದೆ.
ಸುದ್ದಿಗೋಷ್ಠಿಯಲ್ಲಿ ಕಲಾವಿದರಾದ ಕಾಡ್ಯಮಾಡ ಸುಮನ್, ಮಿಟ್ಟು ರಂಜಿತ್ ಹಾಗೂ ಬರಹಗಾರ ರಂಜಿತ್ ಕವಲಪಾರ ಉಪಸ್ಥಿತರಿದ್ದರು.
