ಮಡಿಕೇರಿ, NEWS DESK ಅ.11: ಉತ್ತರ ಪ್ರದೇಶದ ಗೋರಖ್‌ಪುರದಲ್ಲಿ ನಡೆದ CISCE ಅಂಡರ್‌-17 ಬಾಲಕರ ರಾಷ್ಟ್ರೀಯ ಬ್ಯಾಸ್ಕೆಟ್‌ಬಾಲ್ ಚಾಂಪಿಯನ್‌ಶಿಪ್‌ನಲ್ಲಿ ಕರ್ನಾಟಕ ತಂಡ ಚಿನ್ನದ ಪದಕ ಗೆದ್ದು ಸಾಧನೆ ಮಾಡಿದೆ. ತಂಡದ ಸದಸ್ಯನಾಗಿದ್ದ ಕೊಡವ ಯುವ ಪ್ರತಿಭೆ ಡ್ಯೂಕ್ ಮುತ್ತಣ್ಣ ಚೋಕಂಡ ಅವರು ಈ ಗೆಲುವಿನಲ್ಲಿ ಮಹತ್ವದ ಪಾತ್ರ ವಹಿಸಿದ್ದು, ರಾಷ್ಟ್ರೀಯ ಮಟ್ಟದಲ್ಲಿ ಗಮನ ಸೆಳೆದಿದ್ದಾರೆ.
ಬೆಂಗಳೂರಿನ ಹೆಬ್ಬಾಳದಲ್ಲಿರುವ ವಿದ್ಯಾ ನಿಕೇತನ ಶಾಲೆಯ (VNS) 8ನೇ ತರಗತಿಯ ವಿದ್ಯಾರ್ಥಿಯಾಗಿರುವ 14 ವರ್ಷದ ಡ್ಯೂಕ್, 17 ವರ್ಷದೊಳಗಿನವರ ವಿಭಾಗದಲ್ಲಿ ಸ್ಪರ್ಧಿಸಿ ಗಮನಾರ್ಹ ಸಾಧನೆ ಮಾಡಿದ್ದಾರೆ. ಫೈನಲ್ ಪಂದ್ಯದಲ್ಲಿ ಕರ್ನಾಟಕ ತಂಡ ಒಡಿಶಾ ತಂಡವನ್ನು 54–34 ಅಂಕಗಳ ಅಂತರದಿಂದ ಸೋಲಿಸಿ ಚಾಂಪಿಯನ್ ಪಟ್ಟ ಅಲಂಕರಿಸಿತು.
ಕಿರಿಯ ವಯಸ್ಸಿನಲ್ಲೇ ರಾಷ್ಟ್ರೀಯ ಮಟ್ಟದ ಚಾಂಪಿಯನ್‌ಶಿಪ್‌ನಲ್ಲಿ ಚಿನ್ನದ ಪದಕ ಗೆದ್ದಿರುವ ಡ್ಯೂಕ್ ಅವರ ಸಾಧನೆಯು ಬ್ಯಾಸ್ಕೆಟ್‌ಬಾಲ್ ಕ್ರೀಡೆಯಲ್ಲಿನ ಅವರ ಆಸಕ್ತಿ, ಶಿಸ್ತು ಮತ್ತು ಪರಿಶ್ರಮಕ್ಕೆ ಸಾಕ್ಷಿಯಾಗಿದೆ. ಈ ಸಾಧನೆ ಅವರ ಕ್ರೀಡಾ ಬದುಕಿನಲ್ಲಿ ಮಹತ್ವದ ಮೈಲಿಗಲ್ಲಾಗಿದ್ದು, ಮುಂದಿನ ದಿನಗಳಲ್ಲಿ ಇನ್ನಷ್ಟು ಸಾಧನೆ ಮಾಡುವ ನಿರೀಕ್ಷೆ ಮೂಡಿಸಿದೆ.
ಡ್ಯೂಕ್ ಅವರು ಬೆಂಗಳೂರಿನಲ್ಲಿ ‘ಪ್ಲಾನೆಟ್ ಕಾಫಿ’ ಎಂಬ ಕಾಫಿ ಸ್ಟಾರ್ಟ್ಅಪ್‌ನ ಸಂಸ್ಥಾಪಕರಾದ ಚೋಕಂಡ ದಿನು ನಂಜಪ್ಪ ಮತ್ತು ದೇವಮ್ಮ ದಂಪತಿಯ ಪುತ್ರ. ದಿವಂಗತ ಚೋಕಂಡ ಚರ್ಮಣ್ಣ ಮತ್ತು ಸರಳಾ ಚರ್ಮಣ್ಣ ಹಾಗೂ ಮಲ್ಲಂಗಡ ಅಪ್ಪಾಜಿ ಮತ್ತು ಶೀಲಾ ಅಪ್ಪಾಜಿ ಅವರ ಮೊಮ್ಮಗನಾಗಿರುವ ಅವರು, ಚೋಕಂಡ ಮುತ್ತಣ್ಣ ಅವರ ಮರಿಮೊಮ್ಮಗನೂ ಆಗಿದ್ದಾರೆ.
ಕ್ರೀಡಾ ಕ್ಷೇತ್ರದಲ್ಲಿ ಕೊಡವ ಸಮುದಾಯವು ತನ್ನದೇ ಆದ ಪರಂಪರೆಯನ್ನು ಹೊಂದಿದ್ದು, ಡ್ಯೂಕ್ ಅವರ ಸಾಧನೆ ಸಮುದಾಯದ ಯುವ ಪ್ರತಿಭೆಗಳಿಗೆ ಪ್ರೇರಣೆಯಾಗಲಿದೆ. ರಾಷ್ಟ್ರೀಯ ಮಟ್ಟದಲ್ಲಿ ಕರ್ನಾಟಕದ ಗೆಲುವಿಗೆ ಕೊಡುಗೆ ನೀಡಿರುವ ಅವರ ಸಾಧನೆಗೆ ಕುಟುಂಬದವರು, ಶಾಲೆಯ ಆಡಳಿತ ಮಂಡಳಿ, ಶಿಕ್ಷಕರು, ತರಬೇತುದಾರರು ಹಾಗೂ ತಂಡದ ಸಹ ಆಟಗಾರರು ಅಭಿನಂದನೆ ಸಲ್ಲಿಸಿದ್ದಾರೆ.
ಕರ್ನಾಟಕ ಹಾಗೂ ಕೊಡವ ಸಮುದಾಯಕ್ಕೆ ಹೆಮ್ಮೆ ತಂದಿರುವ ಡ್ಯೂಕ್ ಮುತ್ತಣ್ಣ ಅವರು ಮುಂದಿನ ದಿನಗಳಲ್ಲಿಯೂ ಬ್ಯಾಸ್ಕೆಟ್‌ಬಾಲ್ ಕ್ಷೇತ್ರದಲ್ಲಿ ಉನ್ನತ ಸಾಧನೆಗಳನ್ನು ಮಾಡಲಿ ಎಂದು ಹಾರೈಸಿದ್ದಾರೆ.
