ಮಡಿಕೇರಿ ಏ.10 NEWS DESK : 2024-25 ನೇ ಸಾಲಿನ ಅಖಿಲ ಭಾರತ ಅಂತರ ಸೈನಿಕ ಶಾಲೆಗಳ ಗ್ರೂಪ್ (ಗುಂಪು-ಹೆಚ್) ಫುಟ್ಬಾಲ್ ಸ್ಪರ್ಧೆಯು ಸೈನಿಕ ಶಾಲೆಯಲ್ಲಿ ಉದ್ಘಾಟನೆಗೊಂಡಿತು.
ಪಂದ್ಯಾವಳಿಯನ್ನು ಉದ್ಘಾಟಿಸಿ ಮಾತನಾಡಿದ ಕೊಡಗಿನ ಸೈನಿಕ ಶಾಲೆಯ ಪ್ರಾಂಶುಪಾಲರಾದ ಕರ್ನಲ್ ಅಮರ್ ಜೀತ್ ಸಿಂಗ್ ಕ್ರೀಡೆಯಲ್ಲಿ ವೃತ್ತಿಜೀವನವನ್ನು ಮುಂದುವರಿಸಲು ಬಯಸುವವರಿಗೆ ನೈಜ ಕ್ರೀಡಾ ಮನೋಭಾವ, ಕಠಿಣ ತರಬೇತಿ ಮತ್ತು ನಿರಂತರ ಪ್ರಯತ್ನಗಳ ಅವಶ್ಯಕತೆ ಇದೆ ಎಂದರು.
ಸ್ಪರ್ಧೆಯಲ್ಲಿ ಗೆಲುವು ಸಂಪಾದಿಸಲು ಶಿಸ್ತು, ಶ್ರೇಷ್ಠತೆ ಮತ್ತು ಸಾಂಘಿಕ ಹೋರಾಟದ ಅನಿವಾರ್ಯತೆಯ ಅವಶ್ಯಕತೆಯನ್ನು ತಿಳಿಸಿದರು. ಇಂಥಹ ಕ್ರೀಡೆಗಳು ವಿದ್ಯಾರ್ಥಿಗಳಲ್ಲಿ ನಾಯಕತ್ವ, ತಂಡ ಸ್ಪೂರ್ತಿ ಮತ್ತು ಪರಿಶ್ರಮದ ಮೌಲ್ಯಗಳನ್ನು ತುಂಬುವಲ್ಲಿ ಮಹತ್ವದ ಪಾತ್ರವನ್ನು ವಹಿಸುತ್ತವೆ ಎಂದು ತಿಳಿಸಿದರು.
ಫುಟ್ಬಾಲ್ನಲ್ಲಿ ಯಶಸ್ಸು ಗಳಿಸಲು, ಮೂಲಭೂತವಾಗಿ ಅಸಾಧಾರಣ ಸಾಂಘಿಕ ಹೋರಾಟ ಪ್ರದರ್ಶನ ನೀಡಲು ಸಹಕಾರಿಯಾಗಿದೆ. ಭಾಗವಹಿಸಿದ ಕ್ರೀಡಾಪಟುಗಳು ಉತ್ಸಾಹ, ಸಮಗ್ರತೆ ಮತ್ತು ತಮ್ಮ ಎದುರಾಳಿಗಳನ್ನು ಗೌರವದಿಂದ ಕಾಣುವುದರೊಂದಿಗೆ, ಕ್ರೀಡಾ ಮನೋಭಾವ ಮತ್ತು ನ್ಯಾಯೋಚಿತ ಗುಣಗಳನ್ನು ಕ್ರೀಡೆಗಳಲ್ಲಿ ಪ್ರದರ್ಶಿಸಲು ಕರೆ ನೀಡಿದರು.
ಈ ಸ್ಪರ್ಧೆಯು ಸೈನಿಕ ಶಾಲೆ ನಡೆಯುತ್ತಿರುವ ಮೂರನೇ ರಾಷ್ಟ್ರೀಯ ಮಟ್ಟದ ಕ್ರೀಡಾಕೂಟವಾಗಿದ್ದು, ಭಾರತದ ದಕ್ಷಿಣ ವಲಯದ ನಾಲ್ಕು ಪ್ರತಿಷ್ಠಿತ ಸೈನಿಕ ಶಾಲೆಗಳಾದ ಸೈನಿಕ ಶಾಲೆ ಕಜಕೂಟಂ (ಕೇರಳ), ಸೈನಿಕ ಶಾಲೆ ಅಮರಾವತಿನಗರ (ತಮಿಳುನಾಡು), ಸೈನಿಕ ಶಾಲೆ ಕಲಿಕೇರಿ (ಆಂಧ್ರಪ್ರದೇಶ), ಮತ್ತು ಆತಿಥ್ಯ ವಹಿಸಿರುವ ಸೈನಿಕ ಶಾಲೆ ಕೊಡಗು ಪಾಲ್ಗೊಂಡಿದ್ದರು.
ನಾಲ್ಕು ಶಾಲೆಗಳವಿದ್ಯಾರ್ಥಿಗಳಿಂದ ನಡೆದ ಪಥಸಂಚಲನ ಎಲ್ಲರ ಗಮನ ಸೆಳೆಯಿತು.
ಕೊಡಗಿನ ಸೈನಿಕ ಶಾಲೆ ವಿದ್ಯಾರ್ಥಿ ಕೆಡೆಟ್ ಶರಣಬಸು ನಾಲ್ಕು ತಂಡಗಳ ನಾಯಕರಿಗೆ ಮತ್ತು ಅವರ ತಂಡದ ಸಹ ಆಟಗಾರರಿಗೆ ಪ್ರಮಾಣ ವಚನ ಬೋಧಿಸಿದರು.
ಸಾಂಸ್ಕೃತಿಕ ಕಾರ್ಯಕ್ರಮಗಳಲ್ಲಿ ಕೆಡೆಟ್ ರಮಣ್ ಕುಮಾರ್ ಮತ್ತು ತಂಡದಿಂದ ಸ್ವಾಗತ ಗೀತೆ, ಕೆಡೆಟ್ ಲೋಹಿತ್ ಕುಮಾರ್ ಮತ್ತು ತಂಡದಿಂದ ಜಾನಪದ ನೃತ್ಯವಾದ ತಮಟೆ ಬಡಿಯವುಯುದರ ಮೂಲಕ ನೃತ್ಯವನ್ನು ಪ್ರದರ್ಶಿಸಿದರು.
ಶಾಲೆಯ ಆಡಳಿತಾಧಿಕಾರಿಗಳಾದ ವಿಂಗ್ ಕಮಾಂಡರ್ ಪಿ.ಪ್ರಕಾಶ್ ರಾವ್, ಹಿರಿಯ ಶಿಕ್ಷಕ ಎನ್.ವಿಬಿನ್ ಕುಮಾರ್, ಸ್ಪರ್ಧೆಯ ಸಂಚಾಲಕ ಶಿಕ್ಷಕ ಬಿ ಎಲ್ ವಿ ಪ್ರಸಾದ್ ರಾಜು, ಬೋಧಕ-ಬೋಧಕೇತರ ವರ್ಗ, ದೈಹಿಕ ಶಿಕ್ಷಕರು, ಎನ್.ಸಿ.ಸಿ ಸಿಬ್ಬಂದಿವರ್ಗ ಹಾಗೂ ಭಾಗವಹಿಸಿದ ಇತರೆ ಶಾಲೆಗಳ ತಂಡದ ವ್ಯವಸ್ಥಾಪಕರು, ಸದಸ್ಯರು, ಅಧ್ಯಾಪಕರು ಮತ್ತು ಸಿಬ್ಬಂದಿಗಳು ಮತ್ತು ಸೈನಿಕ ಶಾಲೆಯ ಕೊಡಗಿನ ಎಲ್ಲಾ ವಿದ್ಯಾರ್ಥಿಗಳು ಪಾಲ್ಗೊಂಡಿದ್ದರು.
