ಮಡಿಕೇರಿ NEWS DESK ಮೇ 18 : ನಾಡಿನ ಗತ ಇತಿಹಾಸವನ್ನು ಪುಷ್ಠೀಕರಿಸುವ ಮೂಲಕ, ರಾಜ ವಂಶಸ್ಥರ ಆಳ್ವಿಕೆಯ ಮೇಲೆ ಬೆಳಕು ಚೆಲ್ಲುವ ‘ಪ್ರಾಚೀನ ನಾಣ್ಯ ಮತ್ತು ನೋಟು’ಗಳ ಪ್ರದರ್ಶನ ನಗರದ ಕೋಟೆಯ ಆವರಣದ ವಸ್ತುಸಂಗ್ರಹಾಲಯದಲ್ಲಿ ಅತ್ಯಪೂರ್ವವಾಗಿ ನಡೆಯಿತು.
‘ಅಂತರರಾಷ್ಟ್ರೀಯ ವಸ್ತುಸಂಗ್ರಹಾಲಯ ದಿನಾಚರಣೆ’ಯ ಅಂಗವಾಗಿ ದಿ ಫ್ಯೂಚರ್ ಆಫ್ ಮ್ಯೂಸಿಯಂ ಇನ್ ರ್ಯಾಪಿಡ್ಲಿ ಚೇಜಿಂಗ್ ಕಮ್ಯುನಿಟೀಸ್ ಘೋಷವಾಕ್ಯದಡಿ, ಖ್ಯಾತ ನಾಣ್ಯ ನೊಟು ಸಂಗ್ರಹಕಾರರಾದ ಹುಣಸೂರು ಪಿ.ಕೆ.ಕೇಶವಮೂರ್ತಿ ಅವರ 169ನೇ ‘ಪ್ರಾಚೀನ ನಾಣ್ಯ-ನೋಟುಗಳ ಪ್ರದರ್ಶನ’ ಕುತೂಹಲಕಾರಿಯಾಗಿ ಮೂಡಿ ಬಂದು ನೂರಾರು ಸಂಖ್ಯೆಯ ಜನರನ್ನು ಆಕರ್ಷಿಸಿತು. ಪ್ರಾಚೀನ ನಾಣ್ಯ ಮತ್ತು ನೋಟುಗಳ ಪ್ರದರ್ಶನವನ್ನು ನಾಡಿನ ಖ್ಯಾತ ವೈದ್ಯರು ಹಾಗೂ ನಾಣ್ಯ ಸಂಗ್ರಹಕಾರರೂ ಆಗಿರುವ ಡಾ. ಎಂ.ಜಿ.ಪಾಟ್ಕರ್ ಮತ್ತು ವಿಜಯಲಕ್ಷೀ ಪಾಟ್ಕರ್ ಅವರು ಉದ್ಘಾಟಿಸಿದರು. ಸರ್ಕಾರಿ ವಸ್ತು ಸಂಗ್ರಹಾಲಯದ ಕ್ಯೂರೇಟರ್ ಬಿ.ಪಿ.ರೇಖಾ ಉಪಸ್ಥಿತರಿದ್ದರು. ಪಂಚ್ ಮಾರ್ಕ್ ನಾಣ್ಯಗಳು- ನಾಣ್ಯ ಸಂಗ್ರಹಣೆಯಲ್ಲಿ ಪಂಚ್ ಮಾರ್ಕ್ ನಾಣ್ಯಗಳಿಗೆ ವಿಶೇಷ ಸ್ಥಾನ. ಇವು ಸರಿ ಸುಮಾರು ಕ್ರಿಸ್ತ ಪೂರ್ವ 6 ಇಲ್ಲವೆ 5 ಶತಮಾನದಲ್ಲಿ ಚಲಾವಣೆಯಲ್ಲಿದ್ದ ನಾಣ್ಯಗಳು. ಇವುಗಳ ವೀಕ್ಷಣೆೆ ಇತಿಹಾಸದ ಪುಟಗಳನ್ನು ಮೊಗುಚಿ ಹಾಕಿದಂತೆ ಜ್ಞಾನಪ್ರದವಾದುದು. ಈ ಪಂಚ್ ಮಾರ್ಕ್ ನಾಣ್ಯ ಸಂಗ್ರಹದಲ್ಲಿ ಗ್ರೀಕ್, ರೋಮನ್, ಕುಶಾನರು, ಗುಪ್ತ, ಶಾತವಾಹನ, ಕದಂಬ, ಚೋಳ, ಪಾಂಡ್ಯರ ಕಾಲದ ನಾಣ್ಯಗಳನ್ನು ನೊಡುವ ಅಪೂರ್ವ ಅವಕಾಶ ಸಾರ್ವಜನಿಕರಿಗೆ ದೊರಕಿತು. ನೂರಾರು ದೇಶ ನೂರಾರು ನೋಟುಗಳು- ಭಾರತವನ್ನು ಒಳಗೊಂಡಂತೆ ವಿಶ್ವದ ವಿವಿಧ ರಾಷ್ಟ್ರಗಳು ಹೊರ ತಂದಿರುವ ನೋಟುಗಳ ಪ್ರದರ್ಶನ ನಿಜಕ್ಕೂ ಕುತೂಹಲಕಾರಿ. ಇಂಡೋನೇಷಿಯ ಭಾರತದೊಂದಿಗೆ ಸೌಹಾರ್ದ ಸಂಬಂಧಗಳ ಹಿನ್ನೆಲೆಯಲ್ಲಿ ಹೊರ ತಂದ ‘ಗಣೇಶ’ನ ಚಿತ್ರವನ್ನು ಹೊಂದಿದ ನೋಟು ಅಪರೂಪದ್ದು. ನಿಜಾಮರ ಕಾಲದ ಕ್ರಿ.ಶ. 1657-1672ರ ಅವಧಿಯ ಸಿಲ್ವರ್ ಕಾಯಿನ್ ‘ಲ್ಯಾರಿನ್’ ನಾಣ್ಯ ‘ಸೂಜಿ’ಯಂತೆ ಇದ್ದು, ಇದನ್ನು ಸ್ಥಳೀಯವಾಗಿ ಸೂಜಿ ನಾಣ್ಯವೆಂದು ಕರೆಯುವ ರೂಢಿಯಲಿದೆಯೆಂದು ಕೇಶವಮೂರ್ತಿ ಅವರು ಮಾಹಿತಿ ನೀಡಿದರು. ಇವುಗಳೊಂದಿಗೆ ತಾಮ್ರ, ಬೆಳ್ಳಿ, ಚಿನ್ನ, ಸೀಸ, ಹಿತ್ತಾಳೆಯ ನೂರಾರು ನಾಣ್ಯಗಳು ಪ್ರದರ್ಶನದ ಪ್ರಮುಖ ಆಕರ್ಷಣೆಯಾಗಿದೆ.
