ಬೆಂಗಳೂರು ಮೇ 6 NEWS DESK : ಕಳೆದ ಕೆಲ ತಿಂಗಳುಗಳಿಂದ ಏರುಮುಖವಾಗಿದ್ದ ಕಾಫಿ ದರವು ಕಳೆದ ಐದು ದಿನಗಳಿಂದ ಇಳಿಮುಖವಾಗಿರುವುದು ಕಾಫಿ ಬೆಳೆಗಾರರಲ್ಲಿ ಆತಂಕ ಸೃಷ್ಟಿಸಿದೆ.
ಕಳೆದ ಏಪ್ರಿಲ್ ಕೊನೆ ವಾರದಲ್ಲಿ ಸರ್ವಕಾಲಿಕ ದಾಖಲೆ ಏರಿಕೆ ಆಗಿ ಬೆಳೆಗಾರರಿಗೆ ಸಂತಸ ನೀಡಿದ್ದ ರೋಬಸ್ಟಾ ಕಾಫಿ ದರ ಕಳೆದ ಏಪ್ರಿಲ್ 29 ರಿಂದ ಕುಸಿತ ಕಾಣುತಿದ್ದು ಆತಂಕದ ಅಲೆ ಸೃಷ್ಟಿಸಿದೆ. ಲಂಡನ್ ಕಾಫಿ ಮಾರುಕಟ್ಟೆಯಲ್ಲಿ ರೊಬಸ್ಟಾ ಪಾರ್ಚ್ ಮೆಂಟ್ ಪ್ರತೀ ಟನ್ ಗೆ 4165 ಅಮೆರಿಕನ್ ಡಾಲರ್ ಗಳಿಗೆ ವಹಿವಾಟು ಆಗುತಿದ್ದ ಕಾಫಿ ನಾಲ್ಕು ದಿನಗಳ ಸತತ ಕುಸಿತದ ನಂತರ ಶುಕ್ರವಾರ ಸಂಜೆಯ ವೇಳೆಗೆ ಪುನಃ ಕುಸಿದು 3550 ಡಾಲರ್ ಗಳಿಗೆ ವಹಿವಾಟು ಮುಗಿಸಿದೆ.
ಭಾರತೀಯ ಕಾಫಿಯು ತನ್ನ ಉತ್ಕೃಷ್ಟ ಗುಣಮಟ್ಟದ ಕಾರಣದಿಂದಾಗಿ ಮೊದಲಿನಿಂದಲೂ ಪ್ರೀಮಿಯಂ ಬೆಲೆಗೆ ಮಾರಾಟ ಆಗುತ್ತಿದೆ. ದೇಶದಲ್ಲಿ ಉತ್ಪಾದನೆಯಾಗುವ ಬಹುತೇಕ ಕಾಫಿ ರಫ್ತು ಆಗುವುದರಿಂದಾಗಿ ಅಂತರ್ರಾಷ್ಟ್ರೀಯ ಮಾರುಕಟ್ಟೆಯಲ್ಲಿಯೇ ದರ ನಿಗದಿ ಆಗುತ್ತದೆ.
ಏರುಮುಖವಾಗಿದ್ದ ಕಾಫಿ ದರ ಕುಸಿತಕ್ಕೆ ನಿರ್ದಿರ್ಷ ಕಾರಣಗಳೇನೂ ಇಲ್ಲ ಎಂದು ಮಾರುಕಟ್ಟೆ ತಜ್ಞರು ಅಭಿಪ್ರಾಯಿಸಿದ್ದಾರೆ. ಅಂತರ್ರಾಷ್ಟ್ರೀಯ ವಾಗಿ ಸರಕುಗಳ ಮಾರಾಟವು ಆನ್ಲೈನ್ ಮತ್ತು ಕಮಾಡಿಟಿ ಫ್ಯೂಚರ್ ಮಾರುಕಟ್ಟೆಯ ಮೂಲಕವೇ ನಡೆಯುವುದರಿಂದ ಮತ್ತು ಇಂದೇ ದರ ನಿಗದಿ ಆಗಿದ್ದರೂ ಭೌತಿಕವಾಗಿ ಸರಕುಗಳನ್ನು ಸರಬರಾಜು ಮಾಡಲು 1-2 ತಿಂಗಳ ಸಮಯಾವಕಾಶವೂ ಇರುತ್ತದೆ. ಉದಾಹರಣೆಗೆ ಕಂಪೆನಿಯೊಂದು ತಾನು ಭೌತಿಕವಾಗಿ ಕಾಫಿ ಸ್ಟಾಕ್ ನ್ನೇ ಹೊಂದಿರದಿದ್ದರೂ ಖರೀದಿದಾರರಿಗೆ 1000 ಟನ್ ಕಾಫಿಯನ್ನು ಸರಬರಾಜು ಮಾಡಲು ಒಪ್ಪಂದ ಮಾಡಿಕೊಳ್ಳುತ್ತದೆ ಎಂದಿಟ್ಟುಕೊಳ್ಳಿ. ಕಂಪೆನಿಯ ಬಳಿ ಕೇವಲ ನೂರು ಟನ್ ಕಾಫಿ ಭೌತಿಕ ದಾಸ್ತಾನು ಇರುತ್ತದೆ. ಉಳಿದ 900 ಟನ್ ಗಳನ್ನು ಮುಕ್ತ ಮಾರುಕಟ್ಟೆಯಲ್ಲಿ ಖರೀದಿಸಿ ಸರಬರಾಜು ಮಾಡಬೇಕಾಗುತ್ತದೆ. ಕಂಪೆನಿ ಮಾರಾಟ ಒಪ್ಪಂದದಂತೆ ಸರಬರಾಜು ಮಾಡಲೇ ಬೇಕಿರುವುದರಿಂದ ಕೆಲವೊಮ್ಮೆ ನಷ್ಟ ಆದರೂ ಕ್ಯಾಶ್ ಮಾರುಕಟ್ಟೆಯಲ್ಲಿ ಕಾಫಿ ಖರೀದಿಸುತ್ತದೆ. ಇದೇ ರೀತಿ ನೂರಾರು ಮಾರಾಟಗಾರರು ಖರೀದಿಗೆ ಮುಂದಾದಾಗ ಮಾರುಕಟ್ಟೆಯಲ್ಲಿ ಸತತ ದರ ಏರಿಕೆಗೆ ಕಾರಣವಾಗುತ್ತದೆ. ಇದನ್ನು ಶಾರ್ಟ್ ಬೈಯಿಂಗ್ (short buying) ಎನ್ನುತ್ಥಾರೆ ಶಾರ್ಟ್ ಸೆಲ್ಲಿಂಗ್ ಕೂಡ ಇರುತ್ತದೆ..ಕೆಲವೊಮ್ಮೆ ಬಳಕೆ ಹೆಚ್ಚಾದಾಗ ಬೇಡಿಕೆಯೂ ಹೆಚ್ಚಿ ದರ ಏರಿಕೆಗೆ ಕಾರಣ ಆಗುತ್ತದೆ.
ಇನ್ನು ದರ ಕುಸಿತವಾಗಲೂ ಇದೇ ರೀತಿಯ ವಹಿವಾಟು ಕಾರಣ ಆಗಬಹುದು. ಬೇಡಿಕೆ ಕಡಿಮೆ ಆಗಿ ಅಥವಾ ಮಾರಾಟಗಾರರು ಸಾಕಷ್ಟು ಭೌತಿಕ ದಾಸ್ತಾನು ಹೊಂದಿದ್ದಾಗ ಖರೀದಿಗೆ ಮುಂದಾಗುವುದಿಲ್ಲ ಆಗ ದರ ಕುಸಿತಕ್ಕೆ ಕಾರಣ ಆಗಬಹುದು. ಪ್ರಸ್ತುತ ಮಾರುಕಟ್ಟೆಯಲ್ಲಿ ದರ ಕುಸಿತಕ್ಕೂ ಇದೇ ಕಾರಣ ಎಂದು ತಜ್ಞರು ಹೇಳುತ್ತಾರೆ. ಇದಲ್ಲದೆ ಕ್ಯಾಶ್ ಮಾರುಕಟ್ಟೆಯ ಮೂಲಕವೂ ವಹಿವಾಟು ನಡೆಯುತ್ತದೆ. ಒಟ್ಟಿನಲ್ಲಿ ಅಲ್ಲದವರೂ ಕೂಡ ಆನ್ ಲೈನ್ ನಲ್ಲಿ ಕಾಫಿ ಖರೀದಿ ಅಥವಾ ಮಾರಾಟ ಮಾಡಬಹುದಾಗಿದೆ. ಇದಕ್ಕೂ ಷೇರು ಮಾರುಕಟ್ಟೆಯ ಫ್ಯೂಚರ್ ಮಾರುಕಟ್ಟೆಗೂ ವ್ಯತ್ಯಾಸವೇನೂ ಇಲ್ಲ. ಒಟ್ಟು ಮೌಲ್ಯದ ಶೇಕಡಾ 10-20 ರಷ್ಟು ಹಣ ಹೂಡಿಕೆ ಮಾಡಿದರೆ ವಹಿವಾಟು ಮಾಡಬಹುದಾಗಿದೆ.
ವಿಶ್ವದ ಅತ್ಯಂತ ದೊಡ್ಡ ಕಾಫಿ ಉತ್ಪಾದಕ ದೇಶಗಳಾದ ಬ್ರೆಜಿಲ್ , ವಿಯಟ್ನಾಂ ದೇಶಗಳಲ್ಲಿ ಹವಾಮಾನದ ಕಾರಣದಿಂದಾಗಿ ಕಾಫಿ ಉತ್ಪಾದನೆ ಕಡಿಮೆ ಆಗಿರುವ ಹಿನ್ನೆಲೆಯಲ್ಲಿ ಮುಂದಿನ ಬೆಳೆ ಬರುವವರೆಗೆ ಕಾಫಿ ದರ ಏರಿಕೆ ಆಗಲಿದೆ ಎಂದೇ ತಜ್ಞರ ಅಭಿಪ್ರಾಯ ಆಗಿದೆ.
ಪ್ರಸ್ತುತ ಮಾರುಕಟ್ಟೆಯಲ್ಲಿ ರೊಬಸ್ಟಾ ಚೆರಿ ದರ 50 ಕೆಜಿ ಚೀಲಕ್ಕೆ 8500-8700 ಕ್ಕೆ ಹಾಗೂ ಪಾರ್ಚ್ಮೆಂಟ್ ದರ 14,500-14,600 ಕ್ಕೆ ಇಳಿಕೆ ಆಗಿದೆ. ಈ ದರಗಳು ಮೊದಲು 10,500 ಮತ್ತು 16,400 ರ ವರೆಗೂ ಸರ್ವಕಾಲಿಕ ಏರಿಕೆ ದಾಖಲಿಸಿತ್ತು. ಅರೇಬಿಕಾ ಚೆರಿ ಹಾಗೂ ಪಾರ್ಚ್ಮೆಂಟ್ ದರಗಳು ರೊಬಸ್ಟಾ ದರಕ್ಕೆ ಸನಿಹದಲ್ಲಿಯೇ ಇವೆ.
ವರದಿ : ಕೋವರ್ ಕೊಲ್ಲಿ ಇಂದ್ರೇಶ್