ಮಡಿಕೇರಿ ನ.12 NEWS DESK : ಕೊಡಗು ಜಿಲ್ಲಾ ಪೊಲೀಸ್ ಇಲಾಖೆ ವತಿಯಿಂದ ಇದೇ ಪ್ರಥಮ ಬಾರಿಗೆ ಏರ್ಪಡಿಸಲಾಗಿದ್ದ ಕೊಡಗು ಪೊಲೀಸ್ ಕ್ರಿಕೆಟ್ ಲೀಗ್ ಪಂದ್ಯಾವಳಿಯ ಸೌಹಾರ್ದ ಪಂದ್ಯಾವಳಿಯಲ್ಲಿ ಕೊಡಗು ಪೊಲೀಸ್ -11 ಹಾಗೂ ಕೊಡಗು ಪತ್ರಕರ್ತರ ಸಂಘದ ಕೊಡಗು ಪ್ರೆಸ್ ರಾಕರ್ಸ್ ತಂಡಗಳು ಗೆಲುವು ಸಾಧಿಸಿದವು. ನಗರದ ಫೀಲ್ಡ್ ಮಾರ್ಷಲ್ ಕಾರ್ಯಪ್ಪ ಕಾಲೇಜು ಮೈದಾನದಲ್ಲಿ ನಡೆದ ಪಂದ್ಯಾವಳಿಯ ಪ್ರಥಮ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಕೊಡಗು ಜಿಲ್ಲಾ ಪತ್ರಕರ್ತರ ಸಂಘದ ಮೀಡಿಯಾ ವಾರಿಯರ್ಸ್ ತಂಡ 5 ಓವರ್‍ಗಳಲ್ಲಿ ಮೂರು ವಿಕೆಟ್ ಕಳೆದುಕೊಂಡು 45 ರನ್ ಕಲೆಹಾಕಿತು. ಉತ್ತರವಾಗಿ ಆಡಿದ ಕೊಡಗು ಪೊಲೀಸ್ ತಂಡ ಯಾವುದೇ ವಿಕೆಟ್ ನಷ್ಟವಿಲ್ಲದೆ ಗೆಲುವು ಸಾಧಿಸಿತು. ಪೊಲೀಸ್ ತಂಡದ ಮನು ಪಂದ್ಯ ಪುರುಷ ಪ್ರಶಸ್ತಿ ಪಡೆದರು. ಎರಡನೇ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ ಕೊಡಗು ಪತ್ರಕರ್ತರ ಸಂಘದ ಕೊಡಗು ಪ್ರೆಸ್ ರಾಕರ್ಸ್ ತಂಡ 5 ಓವರ್‍ಗಳಲ್ಲಿ ಒಂದು ವಿಕೆಟ್ ಕಳೆದುಕೊಂಡು 67 ರನ್‍ಗಳನ್ನು ಕಲೆಹಾಕಿತು. ಉತ್ತರವಾಗಿ ಆಡಿದ ಕೊಡಗು ಪೊಲೀಸ್-ಎ ತಂಡ ಐದು ವಿಕೆಟ್‍ಗಳನ್ನು ಕಳೆದುಕೊಂಡು 62 ರನ್‍ಗಳಿಸಿ ಸೋಲನ್ನುಭವಿಸಿತು. ಪ್ರೆಸ್ ರಾಕರ್ಸ್ ತಂಡದ ನಾಯಕ ಖಲೀಲ್ ಪಂದ್ಯ ಪರುಷ ಪ್ರಶಸ್ತಿ ಪಡೆದುಕೊಂಡರು.
