ಸುಂಟಿಕೊಪ್ಪ, NEWS DESK ಅ.10: ಕೊಡಗರಹಳ್ಳಿ, ಕಂಬಿಬಾಣೆ ಹಾಗೂ ಸುಂಟಿಕೊಪ್ಪದ ವಿವಿಧ ದೇವಸ್ಥಾನಗಳಲ್ಲಿ ನವರಾತ್ರಿ ಉತ್ಸವದ ಅಂಗವಾಗಿ ವಿಶೇಷ ಪೂಜೆ, ಧಾರ್ಮಿಕ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗಿದೆ.
ಕೊಡಗರಹಳ್ಳಿಯಲ್ಲಿ ನವರಾತ್ರಿ ಪೂಜೆ
ಕೊಡಗರಹಳ್ಳಿಯ ಶ್ರೀ ಭೈತೊರಪ್ಪ ಪೊವ್ವದಿ ಬಸವೇಶ್ವರ ದೇವಸ್ಥಾನದಲ್ಲಿ ಅ.11ರಿಂದ 19ರವರೆಗೆ ನವರಾತ್ರಿ ಪೂಜೆ ನಡೆಯಲಿದೆ. ಉತ್ಸವದ ಅಂಗವಾಗಿ ಪ್ರತಿದಿನ ಸಂಜೆ ಶ್ರೀ ರಂಗಪೂಜೆ, ಪುಷ್ಪಾರ್ಚನೆ, ಸಹಸ್ರನಾಮ ಕುಂಕುಮಾರ್ಚನೆ, ಪಂಚಾಮೃತ ಅಭಿಷೇಕ ಹಾಗೂ ಶ್ರೀಸೂಕ್ತ ಅಭಿಷೇಕ ಸೇರಿದಂತೆ ವಿವಿಧ ಧಾರ್ಮಿಕ ವಿಧಿವಿಧಾನಗಳು ನೆರವೇರಲಿವೆ. ಭಕ್ತಾದಿಗಳು ಹೆಚ್ಚಿನ ಸಂಖ್ಯೆಯಲ್ಲಿ ಪಾಲ್ಗೊಳ್ಳುವಂತೆ ದೇವಸ್ಥಾನ ಸಮಿತಿ ಮನವಿ ಮಾಡಿದೆ.
ಕಂಬಿಬಾಣೆಯಲ್ಲಿ 71ನೇ ದಸರಾ ಉತ್ಸವ
ಕಂಬಿಬಾಣೆಯಲ್ಲಿ 71ನೇ ದಸರಾ ಉತ್ಸವದ ಅಂಗವಾಗಿ ಅ.11ರಿಂದ 20ರವರೆಗೆ ವಿವಿಧ ಧಾರ್ಮಿಕ ಹಾಗೂ ಸಾಂಸ್ಕೃತಿಕ ಕಾರ್ಯಕ್ರಮಗಳು ವಿಜೃಂಭಣೆಯಿಂದ ನಡೆಯಲಿವೆ. ಅ.11ರಂದು ಮಂಜನಾಡಿ, ಮಂಗಳೂರಿನ ಸುಘೋಷ ಪಾಂಚಜನ್ಯ ಯಕ್ಷ ನಾಟ್ಯಾಲಯದ ವತಿಯಿಂದ ‘ಶ್ರೀದೇವಿ ಮಹಾತ್ಮೆ’ ಯಕ್ಷಗಾನ ಪ್ರದರ್ಶನ ನಡೆಯಲಿದೆ.
ಅ.13ರಂದು ಚಾಮುಂಡೇಶ್ವರಿ ಭಜನಾ ಮಂಡಳಿ, ಕೊಡಗರಹಳ್ಳಿ ತಂಡದಿಂದ ಭಜನಾ ಕಾರ್ಯಕ್ರಮ, ಅ.15ರಂದು ಓಂ ಶಕ್ತಿ ಭೂತನಕಾಡು ತಂಡದಿಂದ ಭಜನೆ, ಅ.16ರಂದು ದುರ್ಗಾಹೋಮ, ಅ.17ರಂದು ಕಂಬಿಬಾಣೆಯ ಶ್ರೀರಾಮ ಮತ್ತು ಚಾಮುಂಡೇಶ್ವರಿ ಮಹಿಳಾ ಭಜನಾ ಕಾರ್ಯಕ್ರಮ ಹಾಗೂ ಅ.18ರಂದು ಮಕ್ಕಳ ಸಾಂಸ್ಕೃತಿಕ ಕಾರ್ಯಕ್ರಮ ನಡೆಯಲಿದೆ.
ಅ.19ರಂದು ವಾಹನ ಪೂಜೆ ನೆರವೇರಲಿದ್ದು, ಅ.20ರಂದು ದೇವಿಯ ಶೋಭಾಯಾತ್ರೆಯೊಂದಿಗೆ ನವರಾತ್ರಿ ಉತ್ಸವ ಸಂಪನ್ನಗೊಳ್ಳಲಿದೆ ಎಂದು ದೇವಸ್ಥಾನದ ಆಡಳಿತ ಮಂಡಳಿ ತಿಳಿಸಿದೆ.
ಸುಂಟಿಕೊಪ್ಪದಲ್ಲಿ 10ನೇ ವರ್ಷದ ನವರಾತ್ರಿ ಉತ್ಸವ
ಸುಂಟಿಕೊಪ್ಪದ ಶ್ರೀ ಚಾಮುಂಡೇಶ್ವರಿ ಮತ್ತು ಶ್ರೀ ಮುತ್ತಪ್ಪ ದೇವಸ್ಥಾನದಲ್ಲಿ 10ನೇ ವರ್ಷದ ನವರಾತ್ರಿ ಉತ್ಸವದ ಅಂಗವಾಗಿ ಅ.11ರಿಂದ 19ರವರೆಗೆ ಪ್ರತಿದಿನ ದೇವಿಗೆ ವಿವಿಧ ವಿಶೇಷ ಅಲಂಕಾರ ಹಾಗೂ ಪೂಜೆಗಳನ್ನು ನೆರವೇರಿಸಲಾಗುತ್ತದೆ.
ಅ.11ರಂದು ಅರಿಶಿನ ಅಲಂಕಾರ, ಅ.12ರಂದು ಕುಂಕುಮ ಅಲಂಕಾರ, ಅ.13ರಂದು ಗಂಧದ ಅಲಂಕಾರ, ಅ.14ರಂದು ಭಸ್ಮ ಅಲಂಕಾರ, ಅ.15ರಂದು ಕಡಲೆ ಅಲಂಕಾರ, ಅ.16ರಂದು ಬೆಣ್ಣೆ ಅಲಂಕಾರ, ಅ.17ರಂದು ದ್ರಾಕ್ಷಿ ಮತ್ತು ಗೋಡಂಬಿ ಅಲಂಕಾರ, ಅ.18ರಂದು ಅರಿಶಿನ-ಕುಂಕುಮ ಅಲಂಕಾರ ಹಾಗೂ ಅ.19ರಂದು ಆಭರಣ ಮತ್ತು ಹೂವಿನ ಅಲಂಕಾರ ಮಾಡಲಾಗುವುದು.
ಅ.18ರಂದು ಸಂಜೆ ಆಯುಧಪೂಜೆಯ ಅಂಗವಾಗಿ ವಾಹನ ಪೂಜೆಯನ್ನೂ ನೆರವೇರಿಸಲಾಗುವುದು ಎಂದು ದೇವಸ್ಥಾನ ಸಮಿತಿ ತಿಳಿಸಿದೆ.
