ಪೊನ್ನಂಪೇಟೆ, ಡಿ.9 NEWS DESK : ದ. ಕೊಡಗಿನ ವಿ. ಬಾಡಗದ ಹೈ ಪ್ಲೈಯರ್ಸ್ ಸಂಸ್ಥೆಯ ವತಿಯಿಂದ ಸ್ಥಳೀಯ ಸರಕಾರಿ ಹಿರಿಯ ಪ್ರಾಥಮಿಕ ಶಾಲಾ ಮೈದಾನದಲ್ಲಿ ನಡೆಯುತ್ತಿರುವ ಬಿಟ್ಟಂಗಾಲ, ಬಿ. ಶೆಟ್ಟಿಗೇರಿ ಮತ್ತು ಹಾತೂರು ಗ್ರಾ. ಪಂ. ವ್ಯಾಪ್ತಿಯಲ್ಲಿ ಐನ್ ಮನೆಗಳನ್ನು ಹೊಂದಿರುವ ಕೊಡವ ಮನೆತನಗಳ ನಡುವಿನ 3ನೇ ವರ್ಷದ ಕೊಡವ ಕೌಟುಂಬಿಕ ಹಾಕಿ ಪಂದ್ಯಾವಳಿ ಹೈಫ್ಲೈಯರ್ಸ್ ಕಪ್-2024ರ 3ನೇ ದಿನದ ಪಂದ್ಯಾವಳಿಯಲ್ಲಿ ಕಾದಾಡಿದ ತಂಡಗಳ ಪೈಕಿ 4 ಬಲಿಷ್ಠ ಕುಟುಂಬ ತಂಡಗಳು ಸೆಮಿ ಫೈನಲ್ಸ್ ಪ್ರವೇಶಿಸಿದೆ. ಪಂದ್ಯಾವಳಿಯ ಸೆಮಿ ಫೈನಲ್ಸ್ ಇಂದು (ಡಿ.9) ನಡೆಯಲಿದೆ. 3ನೇ ದಿನದ ಪಂದ್ಯದಲ್ಲಿ ,ಚಂದೂರ, ಚೇಂದಂಡ, ಮುರುವಂಡ ಮತ್ತು ತೀತಮಾಡ ತಂಡಗಳು ವಿಜಯ ಸಾಧಿಸಿ ಪಂದ್ಯಾವಳಿಯ ಸೆಮಿ ಫೈನಲ್ಸ್ ಗೆ ಅರ್ಹತೆ ಪಡೆದುಕೊಂಡಿತು. ಈ ನಾಲ್ಕು ತಂಡಗಳು ಇಂದು ನಡೆಯಲಿರುವ ಸೆಮಿ ಫೈನಲ್ಸ್ ಪಂದ್ಯಾವಳಿಯಲ್ಲಿ ಎದುರಾಳಿಗಳನ್ನು ಮಣಿಸಿ ಚಾಂಪಿಯನ್ ಆಗುವ ಹೆಗ್ಗುರಿಯೊಂದಿಗೆ ಫೈನಲ್ ಪ್ರವೇಶಿಸಲು ತೀವ್ರ ಹೋರಾಟ ನಡೆಸಲಿದೆ. ಮೊದಲ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಚಂದೂರ ತಂಡವು ಕಂಜಿತಂಡ ತಂಡವನ್ನು 5-4 ಗೋಲುಗಳಿಂದ ಶೂಟ್ ಔಟ್ ನಲ್ಲಿ ಪರಾಭವಗೊಳಿಸಿ ಸೆಮಿ ಫೈನಲ್ ಗೆ ಅರ್ಹತೆ ಪಡೆದುಕೊಂಡಿತು. ಪ್ರಥಮಾರ್ಧದ 19ನೇ ನಿಮಿಷದಲ್ಲಿ ಚಂದೂರ ತಂಡದ ಪ್ರಶಾಂತ್ ಮಿಂಚಿನ ಗೋಲೊಂದನ್ನು ದಾಖಲಿಸಿ ತಂಡದ ಖಾತೆ ತೆರೆದರು. ದ್ವಿತೀಯಾರ್ಥದ 38ನೇ ನಿಮಿಷದಲ್ಲಿ ಕಂಜಿತಂಡ ತಂಡಕ್ಕೆ ದೊರೆತ ಪೆನಾಲ್ಟಿ ಕಾರ್ನರನ್ನು ಸಮರ್ಥವಾಗಿ ಬಳಸಿಕೊಂಡ ತಂಡದ ಅತಿಥಿ ಆಟಗಾರ ದಿವಾನ್ ಅದನ್ನು ಗೋಲಾಗಿ ಪರಿವರ್ತಿಸುವಲ್ಲಿ ಯಶಸ್ವಿಯಾದರಲ್ಲದೆ, ಗೋಲಿನ ಅಂತರವನ್ನು ಸಮವಾಗಿಸಿದರು. ನಂತರ ಉಭಯ ತಂಡಗಳು ಯಾವುದೇ ಗೋಲು ದಾಖಲಿಸಿದ ಕಾರಣ ಶೂಟ್ ಔಟ್ ಅಳವಡಿಸಲಾಯಿತು. ಈ ವೇಳೆ ವಿಜೇತ ತಂಡದ ಪರ 4 ಗೋಲುಗಳು ದಾಖಲಾದರೆ, ಪರಾಜಿತ ತಂಡದ ಪರ 3 ಗೋಲುಗಳು ದಾಖಲಾಯಿತು. 2ನೇ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಚೇಂದಂಡ ತಂಡ ಕೊಂಗಂಡ ತಂಡವನ್ನು 3 -1 ಗೋಲುಗಳಿಂದ ಮಣಿಸಿತು. ಪಂದ್ಯ ಆರಂಭಗೊಂಡ 3ನೇ ನಿಮಿಷದಲ್ಲೇ ಕೊಂಗಂಡ ತಂಡದ ಅತಿಥಿ ಆಟಗಾರ ನಾಚಪ್ಪ ಮಿಂಚಿನ ಗೋಲೊಂದನ್ನು ಬಾರಿಸಿ ತಂಡದ ಖಾತೆ ತೆರೆದರಲ್ಲದೆ, ಗೆಲುವಿನ ಭರವಸೆ ಮೂಡಿಸಿದರು. ಇದಾದ ಬಳಿಕ ಚೇಂದಂಡ ತಂಡದ ಆಟಗಾರ ಚಿರಾಗ್ 27ನೇ ನಿಮಿಷದಲ್ಲಿ ಗೋಲು ದಾಖಲಿಸಿ ಅಂತರವನ್ನು ಸಮನಾಗಿಸಿದರು. ಇದರಿಂದಾಗಿ ಬಿರುಸಿನ ಆಟಕ್ಕೆ ಒತ್ತು ನೀಡಿದ ಕೊಂಗಂಡ ತಂಡ ಎದುರಾಳಿಯ ‘ಡಿ’ ಆವರಣದೊಳಗೆ ನಿರಂತರವಾಗಿ ದಾಳಿ ನಡೆಸಿದರೂ ಗೋಲು ಗಳಿಸುವಲ್ಲಿ ಮಾತ್ರ ಯಶಸ್ವಿಯಾಗಲಿಲ್ಲ. ಬಿರುಸಿನ ಆಟ ಮುಂದುವರಿಯುತ್ತಿದ್ದಂತೆ ವಿಜೇತ ತಂಡದ ಅತಿಥಿ ಆಟಗಾರ ಅವಿನಾಶ್ 51ನೇ ನಿಮಿಷದಲ್ಲಿ ಗೋಲು ಬಾರಿಸಿ ಅಂತರ ಹೆಚ್ಚಿಸಿದರು. ಇದಾದ ಕೂಡಲೇ 53ನೇ ನಿಮಿಷದಲ್ಲಿ ತಂಡದ ಮತ್ತೋರ್ವ ಅತಿಥಿ ಆಟಗಾರ ಪೊನ್ನಣ್ಣ ಆಕರ್ಷಕ ಫೀಲ್ಡ್ ಗೋಲೊಂದನ್ನು ಬಾರಿಸಿ ತಂಡದ ವಿಜಯದಲ್ಲಿ ಪ್ರಮುಖ ಪಾತ್ರ ವಹಿಸಿದರು. 3ನೇ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಮುರುವಂಡ ತಂಡ ಮಳವಂಡ ತಂಡವನ್ನು ಶೂಟ್ ಔಟ್ ನಲ್ಲಿ 2-1 ಗೋಲುಗಳಿಂದ ಸೋಲಿಸಿ ಮುನ್ನಡೆ ಸಾಧಿಸಿತು. ಆರಂಭದಿಂದಲೇ ಸಮಬಲದ ಹೋರಾಟ ಕಂಡುಬಂದ ಈ ಪಂದ್ಯದಲ್ಲಿ ದ್ವಿತೀಯಾರ್ಧ ಕೊನೆಗೊಳ್ಳುವವರೆಗೂ ಉಭಯ ತಂಡಗಳು ಯಾವುದೇ ಗೋಲುಗಳು ಗಳಿಸಿರಲಿಲ್ಲ. ಇದರಿಂದ ಪಂದ್ಯದ ವಿಜಯ ನಿರ್ಣಯಕ್ಕಾಗಿ ಕೊನೆಯಲ್ಲಿ ಶೂಟ್ ಔಟ್ ನಿಯಮಾವಳಿಯನ್ನು ಅಳವಡಿಸಲಾಯಿತು. ಈ ಸಂದರ್ಭದಲ್ಲಿ ವಿಜೇತ ತಂಡದ ಪರ 2 ಗೋಲುಗಳು ದಾಖಲಾದರೆ, ಪರಾಜಿತ ತಂಡದ ಪರ ಏಕೈಕ ಗೋಲು ಮಾತ್ರ ದಾಖಲಾಯಿತು. 4ನೇ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ತೀತಮಾಡ ತಂಡವು ಕಡೇಮಾಡ ತಂಡವನ್ನು 3-2 ಗೋಲುಗಳಿಂದ ಶೂಟ್ ಔಟ್ ನಲ್ಲಿ ಸೋಲಿಸಿ ಸೆಮಿ ಫೈನಲ್ಸಿಗೆ ಅರ್ಹತೆ ಪಡೆದುಕೊಂಡಿತು. ಪ್ರಥಮಾರ್ಧದ 27ನೇ ನಿಮಿಷದಲ್ಲಿ ತೀತಮಾಡ ತಂಡಕ್ಕೆ ದೊರೆತ ಪೆನಾಲ್ಟಿ ಕಾರ್ನರನ್ನು ತಂಡದ ಅತಿಥಿ ಆಟಗಾರ ಮಾದಪ್ಪ ಗೋಲಾಗಿ ಪರಿವರ್ತಿಸಿದರು. ದ್ವಿತೀಯಾರ್ಥದ 59ನೇ ನಿಮಿಷದಲ್ಲಿ ಪರಾಜಿತ ಕಡೇಮಾಡ ತಂಡಕ್ಕೆ ದೊರೆತ ಪೆನಾಲ್ಟಿ ಕಾರ್ನರನ್ನು ತಂಡದ ಆಟಗಾರ ಚರ್ಮಣ ಗೋಲಾಗಿ ಪರಿವರ್ತಿಸಿ ಅಂತರವನ್ನು ಸಮವಾಗಿಸಿದರು. ಇದಾದ ಬಳಿಕ ಉಭಯ ತಂಡಗಳು ಯಾವುದೇ ಗೋಲು ಗಳಿಸದ ಕಾರಣ ಅಂತಿಮವಾಗಿ ಶೂಟ್ ಔಟ್ ಅಳವಡಿಸುವುದು ಅನಿವಾರ್ಯವಾಯಿತು. ಶೂಟ್ ಔಟ್ ನಲ್ಲಿ ವಿಜೇತ ತಂಡದ ಪರ 2 ಗೋಲುಗಳು ದಾಖಲಾದರೆ, ಪರಾಜಿತ ತಂಡದ ಪರ ಕೇವಲ ಒಂದು ಗೋಲುಗಳಷ್ಟೇ ದಾಖಲಾಯಿತು.
