ನಾಪೋಕ್ಲು ಡಿ.1 : ಮಡಿಕೇರಿ ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ತು ಮತ್ತು ಬಲಮುರಿ ನೆಬ್ಬೂರು ಗೌಡ ಸಂಘದ ಸಂಯುಕ್ತ ಆಶ್ರಯದಲ್ಲಿ ನಡೆಯಿತು.
ನೆಬ್ಬೂರು ಗೌಡ ಸಂಘದ ಅಧ್ಯಕ್ಷ ಕೊಟ್ಟಕೇರಿಯನ ಬಿ.ಲೋಕನಾಥ ಪರೆಗೆ ಭತ್ತ ತುಂಬಿಸುವ ಮೂಲಕ ಕಾರ್ಯಕ್ರವನ್ನು ಉದ್ಘಾಟಿಸಿದರು.
ಮಡಿಕೇರಿ ವಕೀಲರ ಸಂಘದ ಮಾಜಿ ಅಧ್ಯಕ್ಷ ಕೊಟ್ಟಕೇರಿಯನ ದಯಾನಂದ ತಮ್ಮ ಪ್ರಾಸ್ತಾವಿಕ ನುಡಿಯಲ್ಲಿ ನೆಬ್ಬೂರು ಗೌಡ ಸಂಘ ನಾಲ್ಕು ತಲೆಮಾರಿನಿಂದ ನಡೆದುಕೊಂಡು ಬಂದಿದ್ದು, ಕೇವಲ ಮೂರು ಕುಟುಂಬಗಳು ಮಾತ್ರ ಸೇರಿ ಕಟ್ಟಿದ ಸಂಘವಾಗಿದೆ. ಯಾವುದೇ ಕಟ್ಟಡವಿಲ್ಲ, ಕಚೇರಿ ಇಲ್ಲದೆ ವರ್ಷಕ್ಕೊಮ್ಮೆ ಗ್ರಾಮೀಣ ಕ್ರೀಡಾಕೂಟ ನಡೆಸಿಕೊಂಡು ಹಬ್ಬ ಹರಿ ದಿನಗಳನ್ನು ಒಂದಾಗಿ ಸೇರಿ ಆಚರಿಸಿಕೊಂಡು ಬರುತ್ತಿದ್ದೇವೆ, ಹಾಗೆಯೇ ಹಲವಾರು ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದ ಸಾಧಕರನ್ನು ಗುರುತಿಸಿ ಗೌರವಿಸುವ ಕೆಲಸವನ್ನು ಮಾಡುತ್ತಾ ಬಂದಿದ್ದೇವೆ ಎಂದರು.
ಕೊಡಗು ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತಿನ ಮಾಜಿ ಅಧ್ಯಕ್ಷ ಟಿ.ಪಿ.ರಮೇಶ್ ಮಾತನಾಡಿ, ಜಾನಪದ ಸಿರಿ ಸಂಪತ್ತು ಉಳಿಯಬೇಕಾದರೆ ಹಳ್ಳಿಗಳಲ್ಲಿ ಇಂತಹ ಸಂಘ-ಸಂಸ್ಥೆಗಳಿರಬೇಕು. ಜಾನಪದ ಸೊಗಡು ಚಿಗುರಬೇಕಾದರೆ ಮಕ್ಕಳಿಗೆ ಇಂತಹ ಗ್ರಾಮೀಣ ಕ್ರೀಡಾಕೂಟ ಜಾನಪದ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಬೇಕು. ಅಂತ ಕೆಲಸವನ್ನ ಇಂದು ನೆಬ್ಬೂರು ಗೌಡ ಸಂಘ ಅರ್ಥಪೂರ್ಣವಾಗಿ ಮಾಡಿದೆ ಎಂದು ಮೆಚ್ಚುಗೆ ವ್ಯಕ್ತಪಡಿಸಿದರು.
ಹಿಂದಿನ ಕಾಲದಲ್ಲಿ ಜಾನಪದ ಬದುಕು ತುಂಬಾ ಚೆನ್ನಾಗಿತ್ತು. ಜಾನಪದ ಕಲೆ ಸಂಸ್ಕೃತಿ ಹಿರಿಯರಿಂದ ಮಕ್ಕಳಿಗೆ ಪರಿಚಯವಾಗಿ ಪೀಳಿಗೆಯಿಂದ ಪೀಳಿಗೆಗೆ ಬಂದಿದೆ ಎಂದರು. ಕರ್ನಾಟಕ ಸುವರ್ಣ ಸಂಭ್ರಮಾಚರಣೆಯನ್ನು ಗ್ರಾಮಸಿರಿ ಕಾರ್ಯಕ್ರಮದ ಮೂಲಕ ವರ್ಷ ಪೂರ್ತಿ ಹಳ್ಳಿ ಹಳ್ಳಿ ಗಳಲ್ಲಿ ನಡೆಸಲಾಗುವುದು ಎಂದರು.
ಮಡಿಕೇರಿ ತಾಲೂಕು ಕನ್ನಡ ಸಾಹಿತ್ಯ ಪರಿಷತ್ ಅಧ್ಯಕ್ಷರಾದ ಕಡ್ಲೇರ ತುಳಸಿ ಮೋಹನ್ ಅಧ್ಯಕ್ಷತೆ ವಹಿಸಿ ಮಾತನಾಡಿ, ಕೇವಲ ಮೂರು ಕುಟುಂಬಗಳು ಸೇರಿಕೊಂಡು ಯಾವುದೇ ಕಟ್ಟಡದ ಸಹಕಾರವಿಲ್ಲದೆ ಕುಟುಂಬದ ಬಾಣೆಯೊಂದರಲ್ಲಿ ಪ್ರತಿ ವರ್ಷ ಗ್ರಾಮೀಣ ಕ್ರೀಡಾಕೂಟಗಳನ್ನು ಹಮ್ಮಿಕೊಳ್ಳುವ ಮೂಲಕ ಗ್ರಾಮೀಣ ಸೊಗಡನ್ನು ಪೋಷಿಸುತ್ತಿರುವ ನೆಬ್ಬೂರು ಸಂಘ ಕನ್ನಡ ಸಾಹಿತ್ಯ ಪರಿಷತ್ತಿನೊಂದಿಗೆ ಸೇರಿಕೊಂಡುನಡೆಸಿದ ಕಾರ್ಯಕ್ರಮ ಜಾನಪದ ಹಾಗೂ ಕನ್ನಡದ ಕಂಪು ಒಂದಾಗಿ ಬೆರೆತು ಅರ್ಥಪೂರ್ಣ ಯಶಸ್ವಿ ಜಾನಪದ ಸಿರಿ ಕಾರ್ಯಕ್ರಮ ಹೊರ ಸೂಸಿದೆ ಎಂದರು.
ಪೊನ್ನಚನ ರೋಹಿತ್ ತಂಡದಿಂದ ಸ್ವಾಗತ ಗೀತೆ, ಪಾರೆಮಜ್ಲು ದೇವಮ್ಮ, ಶಿರಕಜೆ ಹೇಮಾವತಿ ಅವರಿಂದ ಸೋಬಾನೆ ಪದ, ಕೊಟ್ಟಕೇರಿಯನ ಲೀಲಾ ದಯಾನಂದ ಅವರಿಂದ ಕವನ ವಾಚನ, ಪುಟಾಣಿ ಯಶಿಕಾಳಿಂದ ದೇಶದ ರಾಜ್ಯ ರಾಜಧಾನಿಗಳ ಹೆಸರು ಹೇಳುವಿಕೆ, ಪೊನ್ನಚನ ದಿನೇಶ್ ಅವರಿಂದ ಕನ್ನಡ ಗೀತ ಗಾಯನ ,ಕೊಟ್ಟಕೇರಿಯನ ದೀಕ್ಷಾ ಜಾನಪದ ನೃತ್ಯ, ಪೊನ್ನಚನ ಸೇಜಲ್ ಜಾನಪದ ನೃತ್ಯ ,ನಂಗಾರು ಪುಣ್ಯ ಬಸವರಾಜ್ ಅವರಿಂದ ಕಂಸಾಳೆ ನೃತ್ಯ ,ಪೊನ್ನಚನ ಅಂಜನಾ ತಂಡದಿಂದ ಜಾನಪದ ನೃತ್ಯ ವೈವಿಧ್ಯಗಳು ಜನಮನ ಸೂರೆಗೊಂಡವು.
ಹಿರಿಯ ಕ್ರೀಡಾಪಟುಗಳಾದ ಪೊನ್ನಚ್ಚನ ಮಾದಪ್ಪ ತೆಂಗಿನಕಾಯಿಗೆ ಗುಂಡು ಹೊಡೆಯುವ ಮೂಲಕ ಕ್ರೀಡಾಕೂಟಕ್ಕೆ ಚಾಲನೆ ನೀಡಿದರು. ಮಕ್ಕಳಿಗೆ ಕಾಳು ಹೆಕ್ಕುವುದು ಮಹಿಳೆಯರಿಗೆ ನೀರು ಚೆಂಬಿನ ಓಟ , ಕಾಯಿಗೆ ಕಲ್ಲು ಹೊಡೆಯುವುದು, ಬಕೇಟಿಗೆ ಚೆಂಡು ಹಾಕುವುದು, ಕಣ್ಣಿಗೆ ಮಡಿಕೆ ಕಟ್ಟಿ ಹೊಡೆಯುವುದು ಸೇರಿದಂತೆ ಹಲವು ಗ್ರಾಮೀಣ ಕ್ರೀಡಾಕೂಟಗಳನ್ನು ಹಮ್ಮಿಕೊಂಡಿದ್ದು, ವಿಜೇತರಿಗೆ ಬಹುಮಾನ ಹಾಗೂ ಪ್ರಶಂಸಾ ಪತ್ರ ನೀಡಲಾಯಿತು.
ಸಾಹಿತ್ಯ ಶಿಕ್ಷಣ ಕ್ರೀಡೆ ಸೇನೆ ವೈದ್ಯಕೀಯ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದ ಸಾಧಕರುಗಳನ್ನು ಗುರುತಿಸಿ ಸನ್ಮಾನಿಸಿ ಗೌರವಿಸಲಾಯಿತು. ಸಾಹಿತ್ಯ ಕ್ಷೇತ್ರದಲ್ಲಿ ಕಟ್ರರತನ ಲಲಿತ ಅಯ್ಯಣ್ಣ ,ಶಿಕ್ಷಣ ಕ್ಷೇತ್ರದಲ್ಲಿ ಕೊಟ್ಟಕೇರಿಯನ ಶ್ರೀಜಾ ದಯಾನಂದ, ಪೊನ್ನಚನ ತ್ರಿನೇಶ್ ಅಪ್ಪಯ್ಯ, ಕೊಟ್ಟಕೇರಿಯ ನ ಚಂದ್ರಿಕ ಧಮೇಂದ್ರ, ಆರೋಗ್ಯ ಕ್ಷೇತ್ರದಲ್ಲಿ ಕೊಟ್ಟಕೇರಿಯನ ಸುಲೋಚನಾ ಬಾಲಕೃಷ್ಣ , ಶಿಕ್ಷಣ ಕ್ಷೇತ್ರದಲ್ಲಿ ಕಟ್ರತನ ಪ್ರೇಮ ಮಧುರಾಜ್ , ಕಟ್ರತನ ಕುಸುಮ ಸುಲೋಚನ, ಕ್ರೀಡಾ ಕ್ಷೇತ್ರದಲ್ಲಿ ಪೊನ್ನಚನ ಬೃಂದಾ ದಿನೇಶ್ , ಸೇನಾ ಕ್ಷೇತ್ರದಲ್ಲಿ ಪೊನ್ನಚನ ಪ್ರಶಾಂತ್ ಪೂಣಚ್ಚ ,ಪೊನ್ನಚನ ಹಿತನ್ ಕರುಂಬಯ್ಯ ಅವರನ್ನು ಸನ್ಮಾನಿಸಿ, ಗೌರವಿಸಲಾಯಿತು.
ಕಾರ್ಯಕ್ರಮದಲ್ಲಿ ಬಲಮುರಿ ದೇವನೂರು ಗೌಡ ಒಕ್ಕೂಟದ ಅಧ್ಯಕ್ಷ ಪೊನ್ನಚ್ಚನ ಜಯ, ಜಿಲ್ಲಾ ಸಾಹಿತ್ಯ ಪರಿಷತ್ತಿನ ಸಮಿತಿ ಸದಸ್ಯರಾದ ಕೆ.ಜಿ.ರಮ್ಯಾ, ತಾಲೂಕು ಕಾರ್ಯದರ್ಶಿಗಳಾದ ಪುದಿಯ ನೆರವನ ರಿಶಿತ್ ಮಾದಯ್ಯ, ಬಾಳೆಯಡ ದಿವ್ಯ ಮಂದಪ್ಪ ,ಸಂಘಟನಾ ಕಾರ್ಯದರ್ಶಿಗಳಾದ ಚೊಕ್ಕಡಿ ಪ್ರೇಮ ರಾಘವಯ್ಯ ಸೇರಿದಂತೆ ಹೆಚ್ಚಿನ ಸಂಖ್ಯೆಯಲ್ಲಿ ಗ್ರಾಮಸ್ಥರು ನೆರೆ, ಕರೆಯುವರು ಸೇರಿದ್ದರು.
ಪೊನ್ನಚ್ಚನ ಡೈನ ಸರ್ವರನ್ನು ಸ್ವಾಗತಿಸಿ, ಕೊಟ್ಟಕೇರಿಯನ ಧಮೇಂದ್ರ ಕಾರ್ಯಕ್ರಮ ನಿರೂಪಿಸಿ ಕಟ್ರತನ ರೋಹಿಣಿ ವಂದಿಸಿದರು.
ವರದಿ : ದುಗ್ಗಳ ಸದಾನಂದ.
