ಬೆಂಗಳೂರು ನ.21 NEWS DESK : ಇಂಡಿಯನ್ ಸೊಸೈಟಿ ಆಫ್ ಏರೋಸ್ಪೇಸ್ ಮೆಡಿಸಿನ್ (ಐಎಸ್ ಎಎಂ) ನ 64 ನೇ ವಾರ್ಷಿಕ ಸಮ್ಮೇಳನವು ಬೆಂಗಳೂರಿನ ಇನ್ಸ್ಟಿಟ್ಯೂಟ್ ಆಫ್ ಏರೋಸ್ಪೇಸ್ ಮೆಡಿಸಿನ್ (ಐಎಎಂ) ನಲ್ಲಿ 2025ರ ನವೆಂಬರ್ 20-21 ರಂದು ನಡೆಯಿತು. ದೇಶದ ನಾನಾ ಮೂಲೆಗಳಿಂದ ಮತ್ತು ವಿದೇಶಗಳಿಂದ ಆಗಮಿಸಿದ್ದ ಮಿಲಿಟರಿ ಮತ್ತು ನಾಗರಿಕ ಗಣ್ಯರ ಸಮಕ್ಷಮದಲ್ಲಿ ವಾಯುಪಡೆಯ ಮುಖ್ಯಸ್ಥ (ಸಿಎಎಸ್) ಏರ್ ಚೀಫ್ ಮಾರ್ಷಲ್ ಎ.ಪಿ.ಸಿಂಗ್ ಅವರು ಸಮ್ಮೇಳನವನ್ನು ಉದ್ಘಾಟಿಸಿದರು. ಸಮ್ಮೇಳನದ ಘೋಷವಾಕ್ಯ ‘ಏರೋಸ್ಪೇಸ್ ಔಷಧಗಳಲ್ಲಿ ನಾವೀನ್ಯತೆಗಳು: ಅನಂತ ಸಾಧ್ಯತೆಗಳು’ ಎಂಬುದಾಗಿದ್ದು, ಅದರಲ್ಲಿ ವಿಮಾನ ಚಾಲಕರ ಸುರಕ್ಷತೆ ಮತ್ತು ಅತ್ಯುತ್ತಮ ಕಾರ್ಯಕ್ಷಮತೆಯ ಅವಶ್ಯಕತೆಗಳನ್ನು ಸಮತೋಲನಗೊಳಿಸುವಲ್ಲಿ ಏರೋಸ್ಪೇಸ್ ಮೆಡಿಸಿನ್ ವೃತ್ತಿಪರರ ನವೀನ ವಿಧಾನಗಳನ್ನು ಬಿಂಬಿಸಲಾಯಿತು. ಸಮ್ಮೇಳನದಲ್ಲಿ ಸಶಸ್ತ್ರ ಪಡೆಗಳ ಪ್ರತಿನಿಧಿಗಳು, ಭಾರತೀಯ ವಾಯುಪಡೆ ಮತ್ತು ನಾಗರಿಕ ವಿಮಾನಯಾನದ ವಿಮಾನ ಸಿಬ್ಬಂದಿ ಮತ್ತು ಡಿಆರ್ ಡಿಒ, ಎಚ್ ಎಎಲ್ ಮತ್ತು ಇಸ್ರೋದ ವಿಜ್ಞಾನಿಗಳು ಭಾಗವಹಿಸಿದ್ದರು. ವೈದ್ಯಕೀಯ ಸೇವೆಗಳ (ವಾಯು) ಮಹಾನಿರ್ದೇಶಕ ಏರ್ ಮಾರ್ಷಲ್ ಸಂದೀಪ್ ಥರೇಜಾ ಅವರು ಅಧ್ಯಕ್ಷೀಯ ಭಾಷಣ ಮಾಡಿ, ವಾಯುಪಡೆಯ ಕಾರ್ಯಕ್ಷಮತೆಯನ್ನು ಉತ್ತಮಗೊಳಿಸುವಲ್ಲಿ ಮತ್ತು ಬಾಹ್ಯಾಕಾಶ ಪ್ರಯಾಣಿಕ ಗಗನಯಾತ್ರಿಗಳ ಜೀವನ ಮತ್ತು ಕಾರ್ಯವನ್ನು ಬೆಂಬಲಿಸುವಲ್ಲಿ ಏರೋಸ್ಪೇಸ್ ಮೆಡಿಸಿನ್‌ನ ಮಹತ್ವವನ್ನು ಒತ್ತಿ ಹೇಳಿದರು. ಭಾರತೀಯ ವಾಯುಪಡೆಯ ಮೊದಲ ಮುಖ್ಯಸ್ಥರ ಗೌರವಾರ್ಥವಾಗಿ ಸ್ಥಾಪಿಸಲಾದ ಪ್ರತಿಷ್ಠಿತ ಏರ್ ಮಾರ್ಷಲ್ ಸುಬ್ರೋತೋ ಮುಖರ್ಜಿ ಸ್ಮಾರಕ ಉಪನ್ಯಾಸವನ್ನು ಉತ್ಸಾಹಿ ಇತಿಹಾಸಕಾರ ಶ್ರೀ ಅಂಚಿತ್ ಗುಪ್ತಾ ಅವರು ನೀಡಿದರು. ಹಿಂದಿನ ಹಲವು ವರ್ಷಗಳಲ್ಲಿ ಗಣ್ಯ ವ್ಯಕ್ತಿಗಳಾದ ಡಾ. ರಾಜಾ ರಾಮಣ್ಣ, ಡಾ. ಎಪಿಜೆ ಅಬ್ದುಲ್ ಕಲಾಂ, ಮಾಧವನ್ ನಾಯರ್, ಡಾ.ನರೇಶ್ ಟ್ರೆಹಾನ್, ವಿಂಗ್ ಕಮಾಂಡರ್ ರಾಕೇಶ್ ಶರ್ಮಾ (ನಿವೃತ್ತ) ಮತ್ತು ಶ್ರೀ ಸೈಯದ್ ಕಿರ್ಮಾನಿ ಮತ್ತಿತರರು ಈ ಪ್ರತಿಷ್ಠಿತ ಸ್ಮಾರಕ ಉಪನ್ಯಾಸವನ್ನು ನೀಡಿದ್ದಾರೆ. ವೈಮಾನಿಕ ವೈದ್ಯಕೀಯ ಕ್ಷೇತ್ರದಲ್ಲಿನ ಖ್ಯಾತ ಮತ್ತು ‘ವಾಯುಯಾನ ವೈದ್ಯಕೀಯದ ಪಿತಾಮಹ’ ಎಂದು ಜನಪ್ರಿಯವಾಗಿ ಕರೆಯಲ್ಪಡುವ ಏರ್ ವೈಸ್ ಮಾರ್ಷಲ್ ಎಂ.ಎಂ. ಶ್ರೀನಾಗೇಶ್ ಅವರನ್ನು ಗೌರವಾರ್ಥ ಸ್ಥಾಪಿಸಲಾದ ಏರ್ ವೈಸ್ ಮಾರ್ಷಲ್ ಎಂ.ಎಂ. ಶ್ರೀನಾಗೇಶ್ ಸ್ಮಾರಕ ಭಾಷಣವನ್ನು ಏರ್ ವೈಸ್ ಮಾರ್ಷಲ್ ದೀಪಕ್ ಗೌರ್ (ನಿವೃತ್ತ) ಅವರು ನೀಡಿದರು. ಹಿಂದೆ ‘ಜೆಮಿ ಹಾರ್ಮುಸ್ಜಿ ಫ್ರಾಮ್ಜಿ ಮಾಣೆಕ್ಷಾ ಪ್ಯಾನೆಲ್’ನಲ್ಲಿ ಪಿಕ್ಸೆಲ್ ಏರೋಸ್ಪೇಸ್ ಟೆಕ್ನಾಲಜೀಸ್ ಸಿಇಒ ಮತ್ತು ಸಂಸ್ಥಾಪಕ ಶ್ರೀ ಅವೈಸ್ ಅಹ್ಮದ್ ಮತ್ತು ಇಂಡಿಗೊ ಏರ್ ಲೈನ್ಸ್ ನ ಮುಖ್ಯ ವಿಮಾನ ಸುರಕ್ಷತಾ ಅಧಿಕಾರಿ ಕ್ಯಾಪ್ಟನ್ ಧ್ರುವ್ ರೆಬ್ಬಪ್ರಗಡ ಸೇರಿದಂತೆ ಅನೇಕ ತಜ್ಞರು ಅತಿಥಿ ಉಪನ್ಯಾಸಗಳನ್ನು ನೀಡಿದ್ದರು. ಸಮ್ಮೇಳನವು ವಿಮಾನ ಸಿಬ್ಬಂದಿ ತರಬೇತಿ ಮತ್ತು ಸಿಮ್ಯುಲೇಶನ್, ಕಾರ್ಯಾಚರಣಾ ಏರೋಸ್ಪೇಸ್ ಔಷಧ, ಬಾಹ್ಯಾಕಾಶ ಹಾರಾಟದ ಶರೀರಶಾಸ್ತ್ರ, ಎತ್ತರದ ಸವಾಲುಗಳು, ವೈದ್ಯಕೀಯ ನಾವೀನ್ಯತೆ, ಮಾನವೀಯ ಅಂಶಗಳು ಮತ್ತು ಕ್ಲಿನಿಕಲ್ ಏರೋಸ್ಪೇಸ್ ಔಷಧವನ್ನು ಒಳಗೊಂಡ ವೈವಿಧ್ಯಮಯ ವೈಜ್ಞಾನಿಕ ಗೋಷ್ಠಿಗಳನ್ನು ಒಳಗೊಂಡಿತ್ತು. ಆಕ್ಸಿಯಮ್ -4 ಕಾರ್ಯಾಚರಣೆಯ ಒಳನೋಟಗಳು, ಹೈಪೋಕ್ಸಿಯಾ ತರಬೇತಿಯಲ್ಲಿನ ಪ್ರಗತಿಗಳು, ಆನ್‌ಬೋರ್ಡ್ ಆಮ್ಲಜನಕ ಉತ್ಪಾದಕ ವ್ಯವಸ್ಥೆ (ಒಬಿಒಜಿಎಸ್-ಔಃಔಉS) ಮೌಲ್ಯಮಾಪನ, ಆಯಾಸ ಪತ್ತೆ, ಸೂಕ್ಷ್ಮ ಗುರುತ್ವಾಕರ್ಷಣೆಗೆ ಸಂಬಂಧಿಸಿದ ಸಂಶೋಧನೆ ಮತ್ತು ವಿಮಾನ ಅಪಘಾತ ತನಿಖೆ ಕೂಡ ಸಮ್ಮೇಳನದ ಮುಖ್ಯಾಂಶಗಳಲ್ಲಿ ಸೇರಿವೆ.
