ಮಡಿಕೇರಿ NEWS DESK ಜೂ.30 : 2026ರ ಜುಲೈ 3ರಿಂದ 7ರವರೆಗೆ ಹಾಂಗ್‌ಕಾಂಗ್‌ನಲ್ಲಿ ನಡೆಯಲಿರುವ ಲಯನ್ಸ್ ಅಂತರಾಷ್ಟ್ರೀಯ ಸಮ್ಮೇಳನಕ್ಕೆ ಲಯನ್ಸ್ ಜಿಲ್ಲೆ 317D ಅನ್ನು ಪ್ರತಿನಿಧಿಸುವ ಅಧಿಕೃತ ಮತದಾನ ಪ್ರತಿನಿಧಿಗಳಾಗಿ ಕೊಡಗು ಜಿಲ್ಲೆಯ ನಾಲ್ವರು ಲಯನ್ಸ್ ಸದಸ್ಯರು ಭಾಗವಹಿಸಲಿದ್ದಾರೆ. ಲಯನ್ಸ್ ಸಂಸ್ಥೆ, ಮೂರ್ನಾಡಿನ ಖಜಾಂಚಿ ಲಯನ್ ಅರುಣ್ ಅಪ್ಪಚ್ಚು, ಲಯನ್ ಕನ್ನು ಅಪ್ಪಚ್ಚು, ಲಯನ್ಸ್ ಸಂಸ್ಥೆ, ಮಡಿಕೇರಿಯ ಕಾರ್ಯದರ್ಶಿ ಲಯನ್ ಮಧುಕರ್ ಕೆ. ಹಾಗೂ ಲಯನ್ ಗೀತಾ ಮಧುಕರ್ ಅವರು ಈ ಸಮ್ಮೇಳನದಲ್ಲಿ ಜಿಲ್ಲೆ 317D ಪರವಾಗಿ ಮತದಾನ ಪ್ರತಿನಿಧಿಗಳಾಗಿ ಪಾಲ್ಗೊಳ್ಳಲಿದ್ದಾರೆ. ವಿಶ್ವದ 200ಕ್ಕೂ ಹೆಚ್ಚು ದೇಶಗಳು ಮತ್ತು ಭೌಗೋಳಿಕ ಪ್ರದೇಶಗಳಿಂದ ಸಾವಿರಾರು ಲಯನ್ಸ್ ಸದಸ್ಯರು ಈ ಅಂತರಾಷ್ಟ್ರೀಯ ಸಮ್ಮೇಳನದಲ್ಲಿ ಭಾಗವಹಿಸಲಿದ್ದು, ಸಂಘಟನೆಯ ನೀತಿ-ನಿರ್ಧಾರಗಳು, ಅಂತರಾಷ್ಟ್ರೀಯ ಪದಾಧಿಕಾರಿಗಳ ಚುನಾವಣೆ, ಸೇವಾ ಚಟುವಟಿಕೆಗಳ ವಿನಿಮಯ ಹಾಗೂ ವಿಶ್ವ ಲಯನ್ಸ್ ಸದಸ್ಯರ ಪರಸ್ಪರ ಸ್ನೇಹ-ಸಹಕಾರಕ್ಕೆ ಈ ಮಹಾಸಭೆ ವೇದಿಕೆಯಾಗಲಿದೆ. ಈ ಮಹಾಸಭೆಯಲ್ಲಿ ಜಿಲ್ಲಾ 317Dಯಿಂದ 70 ಸದಸ್ಯರ ನಿಯೋಗ ಭಾಗವಹಿಸುತ್ತಿದ್ದು, ಈ ನಿಯೋಗದಲ್ಲಿ ದಕ್ಷಿಣ ಕನ್ನಡ, ಹಾಸನ, ಚಿಕ್ಕಮಗಳೂರು ಹಾಗೂ ಕೊಡಗು ಎಂಬ ನಾಲ್ಕು ಕಂದಾಯ ಜಿಲ್ಲೆಗಳ ಪ್ರತಿನಿಧಿಗಳು ಸೇರಿದ್ದಾರೆ. ಕೊಡಗು ಜಿಲ್ಲೆಯ ನಾಲ್ವರು ಲಯನ್ಸ್ ಸದಸ್ಯರು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಜಿಲ್ಲೆಯ ಪ್ರತಿನಿಧಿಗಳಾಗಿ ಭಾಗವಹಿಸುತ್ತಿರುವುದು ಜಿಲ್ಲೆಯ ಲಯನ್ಸ್ ಕುಟುಂಬಕ್ಕೆ ಹೆಮ್ಮೆಯ ವಿಷಯವಾಗಿದೆ. ಅವರ ಯಶಸ್ವಿ ಭಾಗವಹಿಸುವಿಕೆಗೆ ಜಿಲ್ಲೆಯ ಲಯನ್ಸ್ ಸದಸ್ಯರು ಹಾಗೂ ಸಾರ್ವಜನಿಕರು ಶುಭ ಹಾರೈಸಿದ್ದಾರೆ.
