ಮಡಿಕೇರಿ, NEWS DESK ಅ.7: ಸಿಖ್ ಧರ್ಮದ ಕಿರ್ಪಾನ್, ಗೂರ್ಖಾರ ಕುಕ್ರಿ ಮತ್ತು ಸಿರೂರ್ ಮಠ’ದ ಆಚರಣೆಗಳಂತೆ, ಕೊಡವರ *ಗನ್-ತೋಕ್ ಕೂಡ ಅತ್ಯಗತ್ಯ ಧಾರ್ಮಿಕ ಆಚರಣೆ ಎಂದು ಘೋಷಿಸಬೇಕು ಅ.9 ರಂದು ಬೆಳಿಗ್ಗೆ 10.30ಕ್ಕೆ ಕೊಡಗು ಜಿಲ್ಲಾಧಿಕಾರಿಗಳ ಕಚೇರಿ ಎದುರು ಸತ್ಯಾಗ್ರಹ ನಡೆಯಲಿದೆ ಎಂದು ಸಿಎನ್‌ಸಿ ಅಧ್ಯಕ್ಷ ಎನ್.ಯು. ನಾಚಪ್ಪ ತಿಳಿಸಿದ್ದಾರೆ.
ಸಿಖ್ ಧರ್ಮದ ಕಿರ್ಪಾನ್, ಗೂರ್ಖರ ಕುಕ್ರಿ ಸೇರಿದಂತೆ ಧಾರ್ಮಿಕ ಆಚರಣೆಗಳಿಗೆ ದೊರೆಯುತ್ತಿರುವ ಸಾಂವಿಧಾನಿಕ ರಕ್ಷಣೆಯ ಮಾದರಿಯಲ್ಲಿ ಕೊಡವರ ಗನ್-ತೋಕ್‌ಗೂ ರಕ್ಷಣೆ ನೀಡಬೇಕು ಎಂದು ಒತ್ತಾಯಿಸಿ ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರಿಗೆ ಮನವಿ ಸಲ್ಲಿಸಲಾಗುವುದು ಎಂದು ಅವರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.
ಕೊಡವರು, ಸಿಖ್ ಹಾಗೂ ಗೂರ್ಖ ಸಮುದಾಯಗಳಿಗೆ ಶಸ್ತ್ರಾಸ್ತ್ರ ಕಾಯ್ದೆಯಡಿ ಕೆಲವು ವಿನಾಯಿತಿಗಳು ಲಭ್ಯವಿದ್ದರೂ, ಸಿಖ್ ಮತ್ತು ಗೂರ್ಖ ಸಮುದಾಯಗಳಿಗೆ ಇರುವಂತಹ ಸಾಂವಿಧಾನಿಕ ಖಾತರಿ ಕೊಡವರಿಗೆ ಇಲ್ಲ. ಹೀಗಾಗಿ ಕೊಡವರ ಗನ್-ತೋಕ್‌ಗೂ ಇದೇ ರೀತಿಯ ಸಾಂವಿಧಾನಿಕ ರಕ್ಷಣೆ ಒದಗಿಸಬೇಕು ಎಂದು ಕೇಂದ್ರ ಗೃಹ ಸಚಿವಾಲಯಕ್ಕೆ ಮನವಿ ಸಲ್ಲಿಸಲಾಗುವುದು ಎಂದು ನಾಚಪ್ಪ ಹೇಳಿದ್ದಾರೆ.
ಧಾರ್ಮಿಕ-ಸಾಂಸ್ಕೃತಿಕ ಮಹತ್ವ
ಗನ್-ತೋಕ್ ಕೊಡವರ ಜೀವನದ ವಿವಿಧ ಹಂತಗಳಲ್ಲಿ ಆಧ್ಯಾತ್ಮಿಕ ಮಹತ್ವ ಹೊಂದಿರುವ ಪವಿತ್ರ ಸಂಸ್ಕಾರವಾಗಿದೆ. ಕರೋಣವ, ಬಲ್ಯಮನೆ, ಮಂದ್ ಹಾಗೂ ಕೈಲೋದ್ಗಳಲ್ಲಿ ಇದನ್ನು ಪೂಜಿಸಲಾಗುತ್ತದೆ. ಹುಟ್ಟಿನಿಂದ ಸಾವಿನವರೆಗಿನ ಜೀವನಚಕ್ರದಲ್ಲಿ ಗನ್-ತೋಕ್ ಪವಿತ್ರ ‘ತಾಯತ’ದ ಸ್ಥಾನವನ್ನು ಹೊಂದಿದೆ ಎಂದು ಅವರು ವಿವರಿಸಿದ್ದಾರೆ.
ಆದ್ದರಿಂದ ಭಾರತೀಯ ಶಸ್ತ್ರಾಸ್ತ್ರ ಕಾಯ್ದೆ, 1959ರ ಅಡಿಯಲ್ಲಿ ಅಸ್ತಿತ್ವದಲ್ಲಿರುವ ಶಾಸನಬದ್ಧ ವಿನಾಯಿತಿಯೊಂದಿಗೆ ಗನ್-ತೋಕ್‌ಗೆ ಸಾಂವಿಧಾನಿಕ ರಕ್ಷಣೆಯನ್ನೂ ನೀಡಬೇಕು ಎಂದು ಅವರು ಒತ್ತಾಯಿಸಿದ್ದಾರೆ.
ರಾಜ-ಮಹಾರಾಜರ ಬಂದೂಕುಗಳು ಮನರಂಜನೆಯ ಭಾಗವಾಗಿದ್ದರೆ, ಕೊಡವರ ಗನ್-ತೋಕ್ ಮನರಂಜನೆಯ ವಸ್ತುವಲ್ಲ; ಅದು ಧಾರ್ಮಿಕ ಮತ್ತು ಸಾಂಸ್ಕೃತಿಕ ಸಂಸ್ಕಾರವಾಗಿದೆ ಎಂದು ನಾಚಪ್ಪ ಹೇಳಿದ್ದಾರೆ.
1971ರಲ್ಲಿ ರಾಜಮನೆತನಗಳ ಪಿವಿ ಪರ್ಸ್ ರದ್ದಾದ ಸಂದರ್ಭದಲ್ಲಿ ಅವರಿಗೆ ನೀಡಲಾಗಿದ್ದ ಕೆಲವು ವಿನಾಯಿತಿಗಳು ರದ್ದಾದರೂ, ಕೊಡವರ ಗನ್-ತೋಕ್‌ಗೆ ಸಂಬಂಧಿಸಿದ ವಿನಾಯಿತಿ ಮುಂದುವರಿದಿರುವುದು ಅದರ ವಿಶಿಷ್ಟ ಸಾಂಸ್ಕೃತಿಕ ಮತ್ತು ಧಾರ್ಮಿಕ ಮಹತ್ವವನ್ನು ಪ್ರತಿಬಿಂಬಿಸುತ್ತದೆ ಎಂದು ಅವರು ತಿಳಿಸಿದ್ದಾರೆ.
ಈ ಹಿನ್ನೆಲೆಯಲ್ಲಿ ಗನ್-ತೋಕ್‌ಗೆ ಅಸ್ತಿತ್ವದಲ್ಲಿರುವ ಶಾಸನಬದ್ಧ ವಿನಾಯಿತಿಯೊಂದಿಗೆ ಸಂವಿಧಾನದ 25, 26 ಮತ್ತು 28ನೇ ವಿಧಿಗಳಡಿ ಅತ್ಯಗತ್ಯ ಧಾರ್ಮಿಕ ಆಚರಣೆಯ ಸ್ಥಾನಮಾನ ಹಾಗೂ ಸಾಂವಿಧಾನಿಕ ರಕ್ಷಣೆ ನೀಡಬೇಕು ಎಂದು ಒತ್ತಾಯಿಸಿ ಜಿಲ್ಲಾಧಿಕಾರಿಗಳ ಮೂಲಕ ಸರ್ಕಾರಕ್ಕೆ ಮನವಿ ಸಲ್ಲಿಸಲಾಗುವುದು ಎಂದು ನಾಚಪ್ಪ ತಿಳಿಸಿದ್ದಾರೆ.
