ಕುಶಾಲನಗರ, NEWS DESK ಅ.15: ಇಲ್ಲಿನ ಪಾಮ್ ಎರಾ ರೆಸಾರ್ಟ್‌ನಲ್ಲಿ ಗುರುವಾರ ಮಾಜಿ ಸೈನಿಕರ 84ನೇ ಇಎಂಇ (EME) ಕಾರ್ಪ್ಸ್ ದಿನಾಚರಣೆಯ ಪ್ರಯುಕ್ತ ಸಂತೋಷಕೂಟವನ್ನು ಸಂಭ್ರಮದಿಂದ ಆಯೋಜಿಸಲಾಯಿತು.
ಕಾರ್ಯಕ್ರಮದ ಮುಖ್ಯ ಸಂಘಟಕರಾದ ಮಾಜಿ ಸೈನಿಕ ನಾಯಬ್ ಸುಬೇದಾರ್ ಪೆಮ್ಮಯ್ಯ ಅವರ ನೇತೃತ್ವದಲ್ಲಿ ಆಯೋಜಿಸಲಾದ ಈ ಸಮಾರಂಭದಲ್ಲಿ ಸುಮಾರು 53 ಮಾಜಿ ಸೈನಿಕರು ಒಂದೆಡೆ ಸೇರಿ ತಮ್ಮ ಸೇನಾ ಸೇವೆಯ ದಿನಗಳನ್ನು ಮೆಲುಕು ಹಾಕಿದರು.
ಜ್ಯೋತಿ ಬೆಳಗಿಸುವ ಮೂಲಕ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ನಾಯಬ್ ಸುಬೇದಾರ್ ಪೆಮ್ಮಯ್ಯ, ನಿರಂತರ ಪ್ರಯತ್ನ ಹಾಗೂ ಪರಸ್ಪರ ಸಹಕಾರದ ಮೂಲಕ ಮಾಜಿ ಸೈನಿಕರನ್ನು ಸಂಪರ್ಕಿಸಿ 53 ಯೋಧರ ತಂಡವನ್ನು ರಚಿಸಲು ಸಾಧ್ಯವಾಗಿದೆ. ಇದು ಕೇವಲ ಶುಭಾರಂಭವಾಗಿದ್ದು, ಮುಂದಿನ ದಿನಗಳಲ್ಲಿ ಸೈನಿಕರ ಕುಟುಂಬದ ಸದಸ್ಯರನ್ನೂ ಒಳಗೊಂಡಂತೆ ಇನ್ನಷ್ಟು ದೊಡ್ಡ ಮಟ್ಟದಲ್ಲಿ ಕಾರ್ಯಕ್ರಮಗಳನ್ನು ಆಯೋಜಿಸುವ ಉದ್ದೇಶವಿದೆ ಎಂದು ತಿಳಿಸಿದರು.
ಇಎಂಇ ಕಾರ್ಪ್ಸ್ ನಮಗೆ ‘ಕರ್ಮ ಹಿ ಧರ್ಮ’ ಎಂಬ ತತ್ವವನ್ನು ಕಲಿಸಿದೆ. ಸಕ್ರಿಯ ಸೇನಾ ಸೇವೆಯಿಂದ ನಿವೃತ್ತರಾಗಿದ್ದರೂ, ಸಮವಸ್ತ್ರ ಬದಲಾದರೂ ನಮ್ಮಲ್ಲಿರುವ ಆಲಿವ್ ಗ್ರೀನ್ ರಕ್ತ, ಶಿಸ್ತು ಮತ್ತು ಕಾರ್ಪ್ಸ್‌ನ ಬಾಂಧವ್ಯ ನಮ್ಮನ್ನು ಇಂದಿಗೂ ಒಂದಾಗಿಸಿದೆ. ಹಿರಿಯ ಸೈನಿಕರ ಇಂತಹ ಒಗ್ಗಟ್ಟು ಮುಂದಿನ ಪೀಳಿಗೆಯ ಯುವಕರಿಗೂ ಮಾದರಿಯಾಗಬೇಕು. ಕೊಡಗಿನ ಯುವಜನರು ಸೇನೆಗೆ ಸೇರುವ ಬಗ್ಗೆ ಹೆಚ್ಚಿನ ಆಸಕ್ತಿ ಬೆಳೆಸಿಕೊಳ್ಳಬೇಕು ಎಂದು ಕರೆ ನೀಡಿದರು.
ಹಿರಿಯ ಸೈನಿಕರು ಹಾಗೂ ಕ್ರೀಡಾ ಸಾಧಕರಿಗೆ ಸನ್ಮಾನ
ಕಾರ್ಯಕ್ರಮದಲ್ಲಿ ಇಎಂಇ ಸೇನೆಯಲ್ಲಿ ಸೇವೆ ಸಲ್ಲಿಸಿ ನಿವೃತ್ತರಾದ 84 ವರ್ಷದ ಶ್ರೀ ಪೂವಯ್ಯ ಹಾಗೂ 80 ವರ್ಷದ ಶ್ರೀ ಸೂರಯ್ಯ ಅವರನ್ನು ಗೌರವಿಸಲಾಯಿತು.
ರಾಷ್ಟ್ರೀಯ ಮತ್ತು ಅಂತರರಾಷ್ಟ್ರೀಯ ಮಟ್ಟದ ರಾಫ್ಟಿಂಗ್ ಚಾಂಪಿಯನ್‌ಶಿಪ್‌ಗಳಲ್ಲಿ ಸಾಧನೆ ಮಾಡಿರುವ, ಲೇಹ್‌ನಿಂದ ಕನ್ಯಾಕುಮಾರಿವರೆಗೆ ಸೈಕ್ಲಿಂಗ್ ಹಾಗೂ ಸಿಯಾಚಿನ್ ರಾಫ್ಟಿಂಗ್ ದಂಡಯಾತ್ರೆಯಲ್ಲಿ ಭಾಗವಹಿಸಿ ಕ್ರೀಡಾ ಕ್ಷೇತ್ರದಲ್ಲಿ ಗಮನಾರ್ಹ ಸಾಧನೆ ಮಾಡಿರುವ ಮಾಜಿ ಸೈನಿಕ ಶ್ರೀ ಅಬ್ರಹಾಂ ಅವರನ್ನೂ ಸನ್ಮಾನಿಸಲಾಯಿತು. ಸತತ ಏಳು ಬಾರಿ ಚಿನ್ನದ ಪದಕ ಸೇರಿದಂತೆ ಬೆಳ್ಳಿ ಹಾಗೂ ಕಂಚಿನ ಪದಕಗಳನ್ನು ಗೆದ್ದಿರುವ ಅವರ ಸಾಧನೆ ಲಿಮ್ಕಾ ಬುಕ್ ಆಫ್ ರೆಕಾರ್ಡ್ಸ್‌ನಲ್ಲಿಯೂ ದಾಖಲಾಗಿದೆ.
ಸನ್ಮಾನ ಸ್ವೀಕರಿಸಿದ ಗಣ್ಯರು ತಮ್ಮ ಅನಿಸಿಕೆಗಳನ್ನು ಹಂಚಿಕೊಂಡು, ಈ ಸಂಘಟನೆ ಮುಂದಿನ ದಿನಗಳಲ್ಲಿ ಇನ್ನಷ್ಟು ದೊಡ್ಡ ಮಟ್ಟದಲ್ಲಿ ಬೆಳೆದು ಮಾಜಿ ಸೈನಿಕರ ಒಗ್ಗಟ್ಟಿಗೆ ವೇದಿಕೆಯಾಗಲಿ ಎಂದು ಶುಭ ಹಾರೈಸಿದರು.
ಸೇನಾ ಸೇವೆಯ ನೆನಪುಗಳನ್ನು ಜೀವಂತವಾಗಿರಿಸುವ ಸಂಘಟನೆ
ಪ್ರಾಸ್ತಾವಿಕವಾಗಿ ಮಾತನಾಡಿದ ಮಾಜಿ ಸೈನಿಕ ನಾಯಬ್ ಸುಬೇದಾರ್ ಚಿದಾನಂದ ಅವರು, ಇಎಂಇ ಕಾರ್ಪ್ಸ್ ಬೆಳೆದು ಬಂದ ಹಾದಿ ಹಾಗೂ ಸೇನೆಯಲ್ಲಿ ಸೇವೆ ಸಲ್ಲಿಸಿದ ದಿನಗಳ ಗೌರವಯುತ ನೆನಪುಗಳನ್ನು ನಿವೃತ್ತಿಯ ನಂತರವೂ ಜೀವಂತವಾಗಿಡಲು ಇಂತಹ ಸಂಘಟನೆಗಳು ಸಹಕಾರಿಯಾಗುತ್ತವೆ. ಮಾಜಿ ಸೈನಿಕರು ಪರಸ್ಪರ ಒಗ್ಗಟ್ಟಿನಿಂದ ಮುಂದಿನ ದಿನಗಳಲ್ಲಿಯೂ ಇಂತಹ ಕಾರ್ಯಕ್ರಮಗಳಲ್ಲಿ ಭಾಗವಹಿಸಬೇಕು ಎಂದು ಹೇಳಿದರು.
ಕಾರ್ಯಕ್ರಮದಲ್ಲಿ ಭಾಗವಹಿಸಿದ ಎಲ್ಲರಿಗೂ ಸುಬೇದಾರ್ ಲವ ಕುಮಾರ್ ವಂದಿಸಿದರು. ನಿವೃತ್ತ ಸುಬೇದಾರ್ ವೆಂಕಟೇಶ್ ಅವರ ಪತ್ನಿ ಪ್ರಮೀಳ ಅವರು ಅತಿಥಿಗಳನ್ನು ಸ್ವಾಗತಿಸಿ ಕಾರ್ಯಕ್ರಮ ನಿರೂಪಿಸಿದರು.
ರಾಷ್ಟ್ರಗೀತೆಯೊಂದಿಗೆ ಸಭಾ ಕಾರ್ಯಕ್ರಮ ಮುಕ್ತಾಯಗೊಂಡ ಬಳಿಕ ಎಲ್ಲರಿಗೂ ಔತಣಕೂಟ ಏರ್ಪಡಿಸಲಾಗಿತ್ತು. ಮಾಜಿ ಸೈನಿಕರ ಸ್ನೇಹ, ಒಗ್ಗಟ್ಟು ಹಾಗೂ ಸೇನಾ ಬಾಂಧವ್ಯವನ್ನು ಮತ್ತಷ್ಟು ಗಟ್ಟಿಗೊಳಿಸಿದ ಈ ಸಮಾರಂಭ ಆತ್ಮೀಯ ವಾತಾವರಣದಲ್ಲಿ ನಡೆಯಿತು.
