ಮಡಿಕೇರಿ ಅ.10 NEWS DESK : ಐತಿಹಾಸಿಕ ನಾಡಹಬ್ಬ ಮಡಿಕೇರಿ ದಸರಾ ಉತ್ಸವದಲ್ಲಿ ನೂರಾರು ವರ್ಷಗಳಿಂದ ಭಾಗವಹಿಸುತ್ತಾ ದಶಮಂಟಪಗಳ ಸಾರಥಿಯಾಗಿರುವ ನಗರದ ಪೇಟೆ ಶ್ರೀ ರಾಮಮಂದಿರ ದೇವಾಲಯ ದಸರಾ ಮಂಟಪ ಸಮಿತಿ ಈ ಬಾರಿಯ ಉತ್ಸವಕ್ಕಾಗಿ ಸಜ್ಜಾಗುತ್ತಿದೆ ಎಂದು ಸಮಿತಿಯ ಅಧ್ಯಕ್ಷ ಎಂ. ಚೇತನ್ ತಿಳಿಸಿದ್ದಾರೆ. ಮಂಟಪಕ್ಕಾಗಿ ಎರಡು ಟ್ರ್ಯಾಕ್ಟರ್‍ಗಳನ್ನು ಬಳಸಲಾಗುತ್ತಿದ್ದು, ಲೋಕ ಕಲ್ಯಾಣಕ್ಕಾಗಿ ವಿಷ್ಣುವಿನ ಮತ್ಸಾವತಾರ ಎಂಬ ಕಥಾ ಸಾರಾಂಶವನ್ನು ಮಂಟಪದಲ್ಲಿ ಅಳವಡಿಸಲಾಗುತ್ತಿದೆ. ಲೈಟಿಂಗ್ ಬೋರ್ಡನ್ನು ದಿಂಡಿಗಲ್‍ನ ಸೆಲ್ವಂ ಎಲೆಕ್ಟಿಕಲ್ಸ್‍ನವರು ಒದಗಿಸಲಿದ್ದಾರೆ. ಪ್ಲಾಟ್ ಫಾರಂ ನಿರ್ಮಾಣ ಸ್ಟುಡಿಯೋ ಸೆಟ್ಟಿಂಗ್ಸ್, ಟ್ರ್ಯಾಕ್ಟರ್ ಸೆಟ್ಟಿಂಗ್ಸ್‍ನ್ನು ಮಡಿಕೇರಿಯ ಎಸ್‍ಕೈವೈಸಿ ತಂಡದವರು ಮಾಡಲಿದ್ದಾರೆ. ಒಟ್ಟು 4 ಕಲಾಕೃತಿಗಳನ್ನು ಬಳಸಲಾಗುತ್ತಿದ್ದು, ಕೇರಳದ ಪಯ್ಯನೂರಿನ ಕಲಾವಿದ ಮಧುಕರ್ ಮತ್ತು ತಂಡದವರು ಕಲಾಕೃತಿಗಳನ್ನು ತಯಾರಿಸಲಿದ್ದಾರೆ. ರೂ.10 ಲಕ್ಷ ವೆಚ್ಚದಲ್ಲಿ ಮಂಟಪವನ್ನು ಹೊರತರಲಾಗುತ್ತಿದ್ದು, ಧ್ವನಿವರ್ಧಕ ಮಂಟಪವನ್ನು ಮುನ್ನಡೆಸಲಿದೆ ಎಂದು ಚೇತನ್ ಮಾಹಿತಿ ನೀಡಿದ್ದಾರೆ.
