ಮಡಿಕೇರಿ ಮಾ.27 NEWS DESK : ಕೊಡಗು ಜಿಲ್ಲಾ ಫುಟ್ಬಾಲ್ ಸಂಸ್ಥೆಯ ಅಧೀನದಲ್ಲಿ ಅಮ್ಮತ್ತಿಯ ಪ್ರೌಢ ಶಾಲಾ ಮೈದಾನದಲ್ಲಿ ಜಿಲ್ಲಾ ಮಟ್ಟದ ಫುಟ್ಬಾಲ್ ಲೀಗ್ ಪಂದ್ಯಾವಳಿಗೆ ಜಿಲ್ಲಾ ಫುಟ್ಬಾಲ್ ಸಂಸ್ಥೆಯ ಮಹಾಪೋಷಕ ನೆಲ್ಲಮಕ್ಕಡ ಮೋಹನ್ ಅಯ್ಯಪ್ಪ ಚಾಲನೆ ನೀಡಿದರು.
ಜಿಲ್ಲಾ ಫುಟ್ಬಾಲ್ ಅಸೋಸಿಯೇಷನ್ ಅಧ್ಯಕ್ಷ ಪಾಣತ್ತಲೆ ಜಗದೀಶ್ ಮಂದಪ್ಪ,ರಾಜ್ಯ ಫುಟ್ಬಾಲ್ ಸಂಸ್ಥೆಯ ಮಾಜಿ ಉಪಾಧ್ಯಕ್ಷ ಜಗದೀಶ್ ಕೊಡಗರಹಳ್ಳಿ, ಜಿಲ್ಲಾ ಫುಟ್ಬಾಲ್ ಸಂಸ್ಥೆಯ ಖಜಾಂಚಿ ದೀಪು ಮಾಚಯ್ಯ, ಸದಸ್ಯರಾದ ಲಿಜೇಶ್ ಅಮ್ಮತ್ತಿ ಹಾಜರಿದ್ದರು.
ಮೊದಲ ದಿನ ಆರು ತಂಡಗಳಿಗೆ ಗೆಲುವು:
ಕೊಡಗು ಜಿಲ್ಲಾ ಮಟ್ಟದ ಫುಟ್ಬಾಲ್ ಲೀಗ್ ಪಂದ್ಯಾವಳಿಯ ಮೊದಲ ದಿನ ಆರು ತಂಡಗಳು ಶುಭಾರಂಭ ಮಾಡಿದೆ.
ಮೊದಲ ಪಂದ್ಯದಲ್ಲಿ ಚೌಡೇಶ್ವರಿ ಎಫ್.ಸಿ ಅಮ್ಮತ್ತಿ ತಂಡವು 4-0 ಗೋಲುಗಳ ಅಂತರದಿಂದ ಕ್ಯಾಪ್ಟನ್ಸ್ ಇಲೆವೆನ್ ಪಾಲಿಬೆಟ್ಟ ತಂಡವನ್ನು ಮಣಿಸಿತು.
ಎರಡನೇ ಪಂದ್ಯದಲ್ಲಿ ಎನ್.ವೈ.ಸಿ ಕೊಡಗರಹಳ್ಳಿ ತಂಡವು 1-0 ಗೋಲುಗಳ ಅಂತರದಿಂದ ಎಂ.ಸಿಸಿ ಮಡಿಕೇರಿ ತಂಡವನ್ನು ಸೋಲಿಸಿತು.
ಮೂರನೇ ಪಂದ್ಯದಲ್ಲಿ ಅಮಿಟಿ ಯುನೈಟೆಡ್ ಎಫ್.ಸಿ ಗದ್ದೆಹಳ್ಳ ತಂಡವು 4-0 ಗೋಲುಗಳ ಅಂತರದಿಂದ ಐಎನ್ಎಸ್ ಗುಡ್ಡೆಹೊಸೂರು ತಂಡವನ್ನು ಸೋಲಿಸಿತು. ನಾಲ್ಕನೇ ಪಂದ್ಯದಲ್ಲಿ ಬಿ.ಎಫ್.ಸಿ ಬೋಯಿಕೇರಿ ತಂಡವು 7-0 ಗೋಲುಗಳ ಅಂತರದಿಂದ ಎಸ್.ಎಸ್.ಸಿ ಪೊನ್ನಂಪೇಟೆ ತಂಡದ ವಿರುದ್ಧ ಭರ್ಜರಿ ಗೆಲುವು ಸಾಧಿಸಿತು.
ಐದನೇ ಪಂದ್ಯವು ವೈಷ್ಣವಿ ಎಫ್.ಸಿ ಮರಗೋಡು ಮತ್ತು ಸಹರಾ ಯೂತ್ ಅಸೋಸಿಯೇಷನ್ ಒಂಟಿಯಂಗಡಿ ತಂಡಗಳ ನಡುವಿನ ಪಂದ್ಯದಲ್ಲಿ ಸಹರಾ ಎಫ್.ಸಿ ತಂಡವು 5-1 ಗೋಲುಗಳ ಅಂತರದಿಂದ ಗೆಲುವು ಸಾಧಿಸಿತು.
ಆರನೇ ಪಂದ್ಯವು ಆಕ್ಸ್‌ಫರ್ಡ್ ಎಫ್.ಸಿ ವಿರಾಜಪೇಟೆ ತಂಡವು 9-0 ಗೋಲುಗಳ ಅಂತರದಿಂದ ವಿ.ವೈಸಿ ಕೋಟೆಕೊಪ್ಪ ತಂಡವನ್ನು ಮಣಿಸಿತು.
