*ಯದುವೀರ್ ಒಡೆಯರ್ ಪರಿಚಯ : ರಾಜಪರಂಪರೆಗೆ ಚ್ಯುತಿ ಬಾರದಂತೆ ಜನಸೇವೆ ಮತ್ತು ಸಮಾಜಸೇವೆ ಮಾಡುವುದೇ ನನ್ನ ಗುರಿ*

ಮಡಿಕೇರಿ ಏ.19 NEWS DESK : ಯದುವೀರ್ ಕೃಷ್ಣದತ್ತ ಚಾಮರಾಜ ಒಡೆಯರ್ ಅವರು ಭಾರತದ ರಾಜಮನೆತನಗಳಲ್ಲಿ ಪ್ರತಿಷ್ಠಿತವಾದ ಮೈಸೂರು ರಾಜವಂಶಸ್ಥ ಕುಟುಂಬದವರು. ಮೈಸೂರಿನ ಹೆಸರಾಂತ ಮಹಾರಾಜರಾಗಿದ್ದ ಶ್ರೀ ಜಯಚಾಮರಾಜೇಂದ್ರ ಒಡೆಯರ್ ಅವರ ಮರಿ ಮೊಮ್ಮಗನಾಗಿರುವ ಯದುವೀರ್ ಮೈಸೂರಿನ ಮಹಾರಾಜ ಎಂದೇ ರಾಜಮನೆತನದಲ್ಲಿ, ಜನಮಾನಸದಲ್ಲಿ ಖ್ಯಾತಿ ಪಡೆದಿದ್ದಾರೆ.
ಬೆಂಗಳೂರಿನ ವಿದ್ಯಾನಿಕೇತನ ಶಾಲೆಯಲ್ಲಿ ಪ್ರಾಥಮಿಕ ಶಿಕ್ಷಣ ಪಡೆದ ಯದುವೀರ್ ತರುವಾಯ ಕೆನಡಿಯನ್ ಇಂಟರ್ ನ್ಯಾಷನಲ್ ಸ್ಕೂಲ್ ನಲ್ಲಿ ಶಿಕ್ಷಣ ಪಡೆದು, ಅಮ್ ರೆಸ್ಟ್ ನ ವಿಶ್ವವಿದ್ಯಾನಿಲಯದಲ್ಲಿ ಇಂಗ್ಲೀಷ್ ಇತಿಹಾಸ ಮತ್ತು ಎಕಾನಾಮಿಕ್ಸ್ ನಲ್ಲಿ ಪದವಿ ಪಡೆದಿದ್ದಾರೆ.
ತನ್ನ 23 ನೇ ವಯಸ್ಸಿನಲ್ಲಿಯೇ ಮೈಸೂರು ರಾಜಮನೆತನದ 27ನೇ ಮಹಾರಾಜರಾಗಿ ಅಧಿಕಾರ ಪಡೆದ ಯದುವೀರ್ ಅಂದಿನಿಂದ ಇಂದಿನವರೆಗೂ ರಾಜಪರಂಪರೆಗೆ ಚ್ಯುತಿ ಬಾರದಂತೆ ಜನಸೇವೆ ಮತ್ತು ಸಮಾಜಸೇವೆ ಮಾಡಿಕೊಂಡು ಬಂದಿದ್ದಾರೆ. ವಿಶ್ವವಿಖ್ಯಾತವಾಗಿರುವ ಮೈಸೂರು ದಸರಾ ಖಾಸಗಿ ದರ್ಬಾರ್ ನ್ನು 2015 ರಿಂದಲೂ ಯದುವೀರ್ ಪರಂಪರೆಗೆ ದಕ್ಕೆ ಬಾರದಂತೆ ನಿರ್ವಹಿಸಿಕೊಂಡು ಬಂದಿರುವುದು ಕೂಡ ಈ ತರುಣನ ಚಾಕಚಕ್ಯತೆಗೆ ಉದಾಹರಣೆಯಾಗಿದೆ.
ಯದುವೀರ್ ಅವರು ರಾಜಾಸ್ತಾನದ ಪ್ರತಿಷ್ಠಿತ ದುಂಗನ್ ಪುರ್ ರಾಜಮನೆತನದ ಹರ್ಷವರ್ಧನ್ – ಮಹೇಶ್ರೀ ಕುಮಾರಿ ದಂಪತಿಯ ಪುತ್ರಿ ತ್ರಿಷಿಕಾ ಅವರನ್ನು ಮದುವೆಯಾದರು. ಈ ದಂಪತಿಗೆ ಆದ್ಯವೀರ್ ನರಸಿಂಹರಾಜ ಒಡೆಯರ್ ಎಂಬ 7 ವರ್ಷದ ಪುತ್ರನಿದ್ದಾನೆ.
ಸಾಂಸ್ಕೃತಿಕ ನಗರವಾಗಿ ಕಂಗೊಳಿಸುತ್ತಿರುವ ಅರಮನೆಯ ವೈಭವದ ಮೈಸೂರು ಬಹಳ ವರ್ಷಗಳಿಂದಲೂ ಪ್ರಗತಿಯನ್ನು ಕಾಣುತ್ತಲೇ ಬಂದಿದೆ. ಮೈಸೂರು ಇಂದಿಗೂ ಭಾರತದ ಅತ್ಯಂತ ವ್ಯವಸ್ಥಿತ ನಗರವಾಗಿ ಗುರುತಿಸಲ್ಪಟ್ಟಿದೆ. ಇದಕ್ಕೆ ಮೈಸೂರನ್ನು ಆಳಿದ್ದ ರಾಜಮಹಾರಾಜರೇ ಮುಖ್ಯ ಕಾರಣ.
ರೈತರಿಗೆ ನೀರಿನ ಅನುಕೂಲಕ್ಕಾಗಿ ಕನ್ನಂಬಾಡಿ ಅಣೆಕಟ್ಟು ನಿರ್ಮಾಣ, ರೈತರು ಬೆಳೆದ ಬೆಳೆಗಳಿಗೆ ಸೂಕ್ತ ಬೆಲೆ ದೊರಕಿಸಲು ನೆರವಾಗುತ್ತಿರುವ ಮೈಸೂರು ಮಾರುಕಟ್ಟೆ, ಮೈಸೂರಿನ ಗಲ್ಲಿಗಲ್ಲಿಗೂ ಕುಡಿಯುವ ನೀರಿನ ಯೋಜನೆ, ಮೈಸೂರು ಮತ್ತು ಮೈಸೂರು ಪ್ರಾಂತ್ಯದಲ್ಲಿ ಸುಸಜ್ಜಿತ ರಸ್ತೆಗಳ ನಿರ್ಮಾಣ ಸೇರಿದಂತೆ ನೂರಾರು ಅಭಿವೃದ್ಧಿ ಯೋಜನೆಗಳನ್ನು ಅಂದಿನ ಕಾಲದಲ್ಲಿಯೇ ಮೈಸೂರು ರಾಜರು ಕಲ್ಪಿಸಿದ್ದರು.
::: ಅಭಿಪ್ರಾಯ :::
::: ಸುವರ್ಣ ಯುಗ :::
ಜನಹಿತಕ್ಕಾಗಿ ಮೈಸೂರು ಅರಸರು ಜಾರಿಗೊಳಿಸಿದ್ದ ಯೋಜನೆಗಳು ಇಂದಿಗೂ ಜನರಿಗೆ ಪ್ರಯೋಜನವಾಗುತ್ತಾ ಬಂದಿವೆ. ಮೈಸೂರು ರಾಜರ ಕಾಲದ ಆಡಳಿತ ಕನ್ನಡ ನಾಡಿನಲ್ಲಿ ಸ್ವರ್ಣ ಯುಗವನ್ನೇ ಸೃಷ್ಟಿಸಿತ್ತು. ಜನರು ನೆಮ್ಮದಿಯಾಗಿ ಜೀವಿಸುತ್ತಿದ್ದ ಸಂಭ್ರಮದ ಕಾಲ ಅದಾಗಿತ್ತು. ಇದೀಗ ಭಾರತದಲ್ಲಿ ಪ್ರಧಾನಿ ನರೇಂದ್ರ ಮೋದಿಯವರು ಕೂಡ ಭಾರತದ ಸುವರ್ಣ ಯುಗಕ್ಕಾಗಿ ನಾನಾ ರೀತಿಯಲ್ಲಿ ಕಟಿಬದ್ಧರಾಗಿ ಅಪೂರ್ವ ಯೋಜನೆಗಳನ್ನು ಜಾರಿಗೊಳಿಸುತ್ತಾ ಬಂದಿದ್ದಾರೆ. ಮೋದಿಯವರ ಅದ್ಭುತ ಕನಸುಗಳು ಜಾರಿಗೊಳ್ಳುತ್ತಿರುವ ಪರಿಣಾಮವೇ ಭಾರತವನ್ನು ಜಗತ್ತು ನಿಬ್ಬೆರಗಾಗಿ ನೋಡುತ್ತಿದೆ. ಮೋದಿಯವರು ವಿಶ್ವಗುರುವಾಗಿ ಕಂಗೊಳಿಸುತ್ತಿದ್ದಾರೆ. 10 ವರ್ಷಗಳ ಆಡಳಿತ ಟ್ರಯಲ್ ಮಾತ್ರ. ಭಾರತದ ವಿಕಾಸದ ಸುವರ್ಣ ಯುಗ ತನ್ನ ಮೂರನೇ ಅವಧಿಯ ಆಡಳಿತದಲ್ಲಿ ಜಾರಿಯಾಗಲಿದೆ ಎಂದು ಮೋದಿ ಹೇಳಿದ್ದಾರೆ. ಇಂತಹ ಸುವರ್ಣ ಯುಗದ ಕನಸುಗಳ ಸಾಕಾರಕ್ಕೆ ಮೈಸೂರು- ಕೊಡಗು ಕ್ಷೇತ್ರದಿಂದ ಯದುವೀರ್ ಒಡೆಯರ್ ಅವರಂಥ ಅಪೂರ್ವ ಕನಸುಗಾರ ಮಾನವೀಯ ಗುಣವುಳ್ಳ ಹೃದಯವಂತ ಸಂಸದರಾಗಿ ಆಯ್ಕೆಯಾಗಲೇಬೇಕಾಗಿದೆ ಎಂದು ಕೊಡಗು ಜಿಲ್ಲಾ ಬಿಜೆಪಿಯ ಎಸ್‌ಸಿ ಮೋರ್ಚಾದ ಜಿಲ್ಲಾಧ್ಯಕ್ಷ ಪಿ.ಎಂ.ರವಿ ಹೇಳುತ್ತಾರೆ.
::: ವಿಶ್ವಗುರು :::
ಮೋದಿಯಂತಹ ವಿಶ್ವಗುರುವಿಗೆ ಯದುವೀರ್ ಅವರಂತಹ ಯುವ ನಾಯಕನ ಸಾಥ್ ಅಗತ್ಯವಾಗಿದೆ. ಹೀಗಾಗಿಯೇ ಮೈಸೂರು- ಕೊಡಗು ಕ್ಷೇತ್ರದಲ್ಲಿ ಯದುವೀರ್ ಒಡೆಯರ್ ಅವರನ್ನು ಗೆಲ್ಲಿಸಬೇಕು. ಆ ಮೂಲಕ ಕೇಂದ್ರದಲ್ಲಿ ಮೂರನೇ ಬಾರಿಗೆ ಮತ್ತೊಮ್ಮೆ ಮೋದಿ ಅವರು ಪ್ರಧಾನಿಯಾಗಿ ತಮ್ಮ ಅದ್ಭುತವಾದ ಕನಸಿನ ಯೋಜನೆಗಳನ್ನು ಯಶಸ್ವಿಯಾಗಿ ಜಾರಿಗೊಳಿಸಲಿ ಎನ್ನುವುದು ಬಿಜೆಪಿ ಕಾರ್ಯಕರ್ತರು ಮಾತ್ರವಲ್ಲ, ಬಹುತೇಕ ಜನರ ಅಭಿಲಾಷೆಯಾಗಿದೆ.
ರಾಜಮನೆತನದಲ್ಲಿ ಅತ್ಯಂತ ಸಂಸ್ಕಾರವಂತನಾಗಿ ಬೆಳೆದಿರುವ ಯದುವೀರ್ ಒಡೆಯರ್ ಸದಾ ಜನರ ಬಗ್ಗೆ ಕಾಳಜಿ ತೋರುತ್ತಿದ್ದಾರೆ. ಮೈಸೂರು ಮತ್ತು ಸುತ್ತಲಿನ ಪ್ರದೇಶಗಳ ಅಭಿವೃದ್ಧಿಗಾಗಿ ತನ್ನ ಮುತ್ತಜ್ಜ, ಅಜ್ಜ, ತಂದೆ ಸೇರಿದಂತೆ ರಾಜವಂಶಸ್ಥರು ತೋರಿದ್ದ ಕಾಳಜಿ ಮತ್ತು ಜನಸೇವೆಯ ತುಡಿತ ಯದುವೀರ್ ಅವರಲ್ಲಿಯೂ ಇದೆ. ಅರಮನೆಗೆ ಮಾತ್ರ ಸೀಮಿತವಾಗದೇ ಕಳೆದ ಹಲವು ವರ್ಷಗಳಿಂದ ಮೈಸೂರು ಮತ್ತು ಕೊಡಗು ಜಿಲ್ಲೆಗಳಿಗೆ ತೆರಳಿ ಅಲ್ಲಿನ ಅಗತ್ಯತೆಗಳನ್ನು ಮನಗಂಡಿದ್ದ ಯದುವೀರ್ ಅವರು ಈಗ ಭಾರತದ ಪ್ರಧಾನಿ ನರೇಂದ್ರ ಮೋದಿ ಅವರ ಆಹ್ವಾನಕ್ಕೆ ಮನ್ನಣೆ ನೀಡಿ ಭಾರತೀಯ ಜನತಾ ಪಾರ್ಟಿಯನ್ನು ಸೇರ್ಪಡೆಯಾಗಿದ್ದಾರೆ. ಮೋದಿ ಅವರ ಇಚ್ಛೆಯಂತೆ ಯದುವೀರ್ ಇದೀಗ ಮೈಸೂರು – ಕೊಡಗು ಲೋಕಸಭಾ ಕ್ಷೇತ್ರದಿಂದ ಬಿಜೆಪಿ ಅಭ್ಯರ್ಥಿಯಾಗಿ ಸ್ಪರ್ಧಿಸುತ್ತಿದ್ದಾರೆ. ಇವರನ್ನು ಎಲ್ಲರೂ ಬೆಂಬಲಿಸಲಿದ್ದಾರೆ ಎಂದು ಕೊಡಗು ಜಿಲ್ಲಾ ಬಿಜೆಪಿಯ ಸಾಮಾಜಿಕ ಜಾಲತಾಣದ ಅಧ್ಯಕ್ಷ ತೇಲಪಂಡ ಶಿವಕುಮಾರ್ ನಾಣಯ್ಯ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.
::: ನಾನೊಬ್ಬ ಸಾಮಾನ್ಯ ವ್ಯಕ್ತಿ :::
ತಾನೋರ್ವ ಸಾಮಾನ್ಯ ವ್ಯಕ್ತಿ, ಜನಸಾಮಾನ್ಯರ ಕಷ್ಟಕಾರ್ಪಣ್ಯಗಳಿಗೆ ಸ್ಪಂದಿಸುವುದು ನನ್ನ ಗುರಿಯಾಗಿದೆ. ಅರಮನೆಗೆ ಮಾತ್ರ ತಾನು ಸೀಮಿತವಾಗಿಲ್ಲ ಎಂದು ಹೇಳುವ ಯದುವೀರ್ ಅವರು, ಮೈಸೂರು- ಕೊಡಗು ಕ್ಷೇತ್ರದಲ್ಲಿ ಅನೇಕ ದೇವಾಲಯಗಳಿದ್ದು, ಇವುಗಳನ್ನು ಅಭಿವೃದ್ಧಿ ಪಡಿಸಲು ತನ್ನದೇ ಅರಮನೆಯಲ್ಲಿ ಪ್ರತ್ಯೇಕ ವಿಭಾಗವಿದೆ. ಈ ವಿಭಾಗದ ಪ್ರಯೋಜನ ಪಡೆದುಕೊಳ್ಳುವ ನಿಟ್ಟಿನಲ್ಲಿ ಜನ ಮುಂದಾಗಬೇಕೆಂದು ಕೋರಿದ್ದಾರೆ.
ಮೈಸೂರು ಅರಮನೆಗೆ ತಾನು ಸೀಮಿತನಾಗಿಲ್ಲ. ತನ್ನ ವಂಶಸ್ಥರು ಜನಸೇವೆಯನ್ನೇ ಹೇಗೆ ಜೀವನದ ಉದ್ದೇಶವಾಗಿರಿಸಿಕೊಂಡಿದ್ದರೋ ಅಂತೆಯೇ ತಾನೂ ಕೂಡ ಸಂಸದನಾಗಿ ಆಯ್ಕೆಯಾದರೆ ಜನಸೇವೆಗೆ ಆದ್ಯತೆ ನೀಡುತ್ತೇನೆ. ಸಂಸದನಾದಲ್ಲಿ ಯಾರೂ ಕೂಡ ತನ್ನನ್ನು ಕಾಣಲು ಕಷ್ಟ ಪಡಬೇಕಾಗಿಲ್ಲ. ತನ್ನದೇ ಪ್ರತ್ಯೇಕ ಕಛೇರಿ ತೆರೆದು ಅಲ್ಲಿ ಜನರಿಗೆ ಸುಲಭವಾಗಿ ಸಿಕ್ಕುವ ಮೂಲಕ ಜನರ ಸಮಸ್ಯೆ ಪರಿಹರಿಸಲು ಬದ್ಧನಾಗಿದ್ದೇನೆ ಎಂದು ಯದುವೀರ್ ಭರವಸೆ ನೀಡಿದ್ದಾರೆ.
ಕಳೆದ 10 ವರ್ಷಗಳ ಅವಧಿಯಲ್ಲಿ ಪ್ರಧಾನಿ ನರೇಂದ್ರಮೋದಿ ಅವರ ನೇತೃತ್ವದ ಬಿಜೆಪಿ ಆಡಳಿತದಲ್ಲಿ ಮೈಸೂರು- ಕೊಡಗು ಕ್ಷೇತ್ರದಲ್ಲಿ ಕ್ರಾಂತಿಕಾರಿ ಪ್ರಗತಿ ಯೋಜನೆ ಜಾರಿಗೊಂಡಿದೆ. ಮುಂದಿನ ಹಂತದಲ್ಲಿ ಮತ್ತಷ್ಟು ಯೋಜನೆಗಳನ್ನು ಕ್ಷೇತ್ರವ್ಯಾಪ್ತಿ ಜಾರಿಗೊಳಿಸಲಿದ್ದೇನೆ. ಮುಖ್ಯವಾಗಿ ಆರೋಗ್ಯ ಕ್ಷೇತ್ರ, ಶಿಕ್ಷಣ ಮತ್ತು ಮೂಲಸೌಕರ್ಯಗಳ ಅಭಿವೃದ್ಧಿ ಜೊತೆಗೆ ನಿರುದ್ಯೋಗ ಸಮಸ್ಯೆ ಹೋಗಲಾಡಿಸಲು ಉದ್ಯೋಗ ಸೃಷ್ಟಿಗೆ ಕೇಂದ್ರ ಸರ್ಕಾರದ ವಿಕಸಿತ ಭಾರತ ಯೋಜನೆಯನ್ನು ಬಳಸಿಕೊಂಡು ಕ್ರಾಂತಿಕಾರಿ ಪ್ರಗತಿ ಜಾರಿಗೊಳಿಸುತ್ತೇನೆ. ಜನ ಏನು ಬಯಸುತ್ತಾರೆಯೋ ಅದನ್ನು ಜನರ ಸೇವಕನಾಗಿ ಈಡೇರಿಸುವುದು ನನ್ನ ಧರ್ಮ. ರಾಜಮನೆತನದ ಬಗ್ಗೆ ಮೈಸೂರು – ಕೊಡಗಿನ ಜನತೆ ಸಾಕಷ್ಟು ಗೌರವ ಹೊಂದಿದ್ದಾರೆ. ಈ ಗೌರವಕ್ಕೆ ಚ್ಯುತಿ ಬಾರದಂತೆ ಜನರ ಸೇವಕನಾಗಿ ಕಾರ್ಯನಿರ್ವಹಿಸುವುದು ನನ್ನ ಜವಾಬ್ದಾರಿ ಕೂಡ ಆಗಿರುತ್ತದೆ. ಈ ಬಗ್ಗೆ ಸಂಶಯ ಬೇಡ ಎಂದೂ ಯದುವೀರ್ ವಿಶ್ವಾಸದ ಮಾತುಗಳನ್ನಾಡಿದ್ದಾರೆ.
ರಾಜರು, ಮಹಾರಾಜರ ಕಾಲ ಈಗಿಲ್ಲ. ಈಗ ಏನಿದ್ದರೂ ಪ್ರಜೆಗಳೇ ರಾಜರು ಎನಿಸಿಕೊಂಡ ಕಾಲ. ಈ ದಿನಗಳಲ್ಲಿ ತಾನು ಜನರ ಹೃದಯ ಗೆಲ್ಲುವ ಸಾಮ್ರಾಟನಾಗಿ ಜನರ ಕೆಲಸ, ಕಾರ್ಯ ನಿರ್ವಹಿಸಬೇಕು. ಇದಕ್ಕಾಗಿಯೇ ತಾನು ರಾಜಕೀಯ ಕ್ಷೇತ್ರಕ್ಕೆ ಕಾಲಿರಿಸಿದ್ದೇನೆ. ಪ್ರಜೆಗಳ ಮತದ ಆಶೀರ್ವಾದ ನನಗೆ ಮುಖ್ಯ ಎಂದು ಯದುವೀರ್ ಹೇಳಿಕೊಂಡಿದ್ದಾರೆ.
::: ಅಹಂ ಇಲ್ಲದ ವ್ಯಕ್ತಿ :::
32 ವರ್ಷದ ತರುಣ ಯದುವೀರ್ ಅವರ ಮನಸ್ಸಿನಲ್ಲಿ ಮೈಸೂರು- ಕೊಡಗು ಜಿಲ್ಲೆಗಳ ಸರ್ವಾಂಗೀಣ ಪ್ರಗತಿಯ ಬಗ್ಗೆ ಸಾಕಷ್ಟು ಕನಸುಗಳಿವೆ. ರಾಜಮನೆತನದವನು ಎಂಬ ಅಹಂ ಇಲ್ಲದೇ ಜನರೊಂದಿಗೆ ಬಿಸಿಲು ಗಾಳಿ, ಚಳಿ ಲೆಕ್ಕಿಸದೇ ಸಾಮಾನ್ಯರಲ್ಲಿ ಸಾಮಾನ್ಯರಾಗಿ ಬೆರೆಯುತ್ತಾ ಈಗಾಗಲೇ ಜನರ ಮನಸ್ಸು ಗೆದ್ದಿದ್ದಾರೆ. ಪ್ರತಿಷ್ಠಿತ ರಾಜಮನೆತನದ ಯುವಕ ಜನರ ಹೃದಯ ಸಾಮ್ರಾಟನಾಗಿ ವಿಜೃಂಭಿಸಲು ಎಲ್ಲಾ ಸಿದ್ಧತೆ ಮಾಡಿಕೊಂಡಿದ್ದಾರೆ ಎಂದು ಸೋಮವಾರಪೇಟೆ ಮಂಡಲ ಬಿಜೆಪಿಯ ವಕ್ತಾರ ಬಲ್ಲಾರಂಡ ಕಂಠಿ ಕಾರ್ಯಪ್ಪ ಹರ್ಷ ವ್ಯಕ್ತಪಡಿಸಿದ್ದಾರೆ.